ވެރިކަން ކުރާ މައި ޕާޓީ މޯލްޑިވިއަން ޑިމޮކްރެޓިކް ޕާޓީގެ ޕްރައިމަރީގައި ވާދަކުރައްވާ ރައީސް އިބްރާހިމް މުހައްމަދު ސޯލިހާ މިހާރު މާ ބޮޑު ގުޅުމެއް ނެތް ކަމަށް އެ އިންތިހާބުގައި ރައީސްއާ ވާދަ ކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އަންނަ ހޮނިހިރު ދުވަހު ބާއްވާ އެމްޑީޕީގައި ޕްރައިމަރީގައި ވާދަކުރައްވާ ދެ ބޭފުޅުން މީގެ ކުރިން ފާހަގަވެފައި އޮތީ ވަރަށް ގާތް ދެ އެކުވެރިންގެ ގޮތުގަ އެވެ. އެހެންނަމަވެސް ރައީސް ސޯލިހު ވެރިކަމަށް ވަޑައިގެން ފަހުން އެ ދެ ބޭފުޅުންގެ މެދުގައި ހިޔާލުތަފާތުވުންތައް އިތުރުވެ، ގުޅުން އޮތީ ހީނަރުވެފަ އެވެ.
"އަޅުގަނޑާ ނުގުޅާތާ މިހާރު އަހަރެއްހާ ދުވަސް ވަނީ، ބޮމުގެ ހާދިސާގައި ވެސް އަޅުގަނޑު ޖަރުމަނުގައި އޮތްހާ ދުވަހު ވެސް އިނގިރޭސިވިލާތުގައި އޮތް ހާ ދުވަހު ވެސް ރައީސުލްޖުމްހޫރިއްޔާ ގުޅުއްވީ އެއް ދުވަހު،" ދެ ބޭފުޅުންގެ ގުޅުމާ ގުޅޭ ގޮތުން ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުން ނަޝީދު ވިދާޅުވި އެވެ.
ދެ ބޭފުޅުންގެ ގުޅުމެއް މިހާރު ނެތް ކަން ފާހަގަކުރައްވައި ނަޝީދު ވިދާޅުވީ، އިއްތިހާދުގެ ސަބަބުން ރައީސް އެމަނިކުފާނާ މަޝްވަރާ ކުރެއްވުން ހުއްޓާލައްވާފައިވާތީ ކަންބޮޑުވާ ކަމަށެވެ.
"ރައީސުލްޖުމްހޫރިއްޔާއާއި ކައިރީގައި ތިއްބެވި ބޭފުޅުން ދެކިވަޑައިގަންނަވަނީ އަޅުގަނޑާ މަޝްވަރާ ކޮށްފި ނަމަ، ރައީސުލްޖުމްހޫރިއްޔާ ޝައިން ވާ މިންވަރު ކުޑަވެގެންދާނެ އޭ،" ނަޝީދު ވިދާޅުވި އެވެ.
ގުޅުން ކެނޑިފައިވީ ނަމަވެސް މަޖިލިސް ހުޅުވުމުގައި ވެސް އަދި މަޖިލިސް ކުރިއަށް ގެންދިއުމުގައި ވެސް އެއްވެސް ދައްޗެއް ނެތް ކަމަށް އެމްޑީޕީގެ ޓިކެޓުގައި މަޖިލީހަށް އިންތިހާބުވެ، މަޖިލީހުގެ ރައީސް ކަން ކުރައްވަމުން ގެންދަވާ ނަޝީދު ވިދާޅުވި އެވެ.
ހޮނިހިރު ދުވަހު އެމްޑީޕީގެ ރިޔާސީ ޕްރައިމަރީގައި 57،000 މީހުންނަށް ވޯޓު ދެވެ އެވެ. އެ ޕްރައިމަރީގައި ވާދަކުރައްވާ ނަޝީދަކީ 2008 އަދި 2013 ގައި ވެސް އެމްޑީޕީގެ ރިޔާސީ ކެންޑިޑޭޓެވެ.
އޭގެ އިތުރުން، 2018 ވަނަ އަހަރު ވެސް އެމްޑީޕީގެ ރިޔާސީ ކެންޑިޑޭޓެއްގެ ގޮތުގައި ޕްރައިމަރީން ނިންމީ ނަޝީދެވެ. ނަމަވެސް އޭރު އެމަނިކުފާނަށް އިއްވާފައިވާ ޖަލު ހުކުމުގެ ސަބަބުން އިންތިހާބުގައި ވާދަނުކުރެވޭތީ، އެމްޑީޕީގެ ކޮންގްރެސް މެދުވެރިކޮށް ރައީސް ސޯލިހަށް ޓިކެޓު ދިނުމަށް ނިންމީ އެވެ.
ދެ ބޭފުޅުން ވާދަކުރައްވާ ފުރަތަމަ އިންތިހާބު ބޯމަތިވެފައިވާއިރު، އެއް ބޭފުޅަކު އަނެއް ބޭފުޅަކަށް ވަރަށް ބޮޑަށް ފާޑުވިދާޅުވެ، ބަހުގެ ހަމަލާތައް އަންނަނީ ރައްދު ކުރައްވަމުންނެވެ.
