އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގައި ވޯޓު ލާންޖެހޭ ފޮށި ޓެލެގުރާމާއި ވައިބަރު މެދުވެރިކޮށް ބަލާލެވޭނެ އިންތިޒާމް އެ ޕާޓީން ހަމަޖައްސައިފި އެވެ.
އެ ޕާޓީން ބުނީ RP ޖަހާފައި ހުސްތަންކޮޅެއް ދޫކޮށްލުމަށްފަހު އެމީހެއްގެ އައިޑީކާޑު ނަންބަރު ޖަހާފައި ޓެލެގުރާމަށް ނުވަތަ ވައިބަރަށް މެސެޖު ކޮށްލުމުން ވޯޓު ލާންޖެހޭ ފޮށީގެ މައުލޫމާތު ވަގުތުން ލިބޭނެ ކަމަށެވެ.
މިއަހަރު އޮންނަ ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރާނެ ފަރާތެއް ކަނޑައެޅުމަށް ބާއްވާ އިންތިހާބުގައި އެ ޕާޓީގެ ޓިކެޓަށް ވާދަ ކުރައްވަނީ އެޕާޓީގެ ރައީސް މުހައްމަދު ނަޝީދާއި މިވަގުތު ޕާޓީގެ އެންމެ އިސް ލީޑަރުގެ ގޮތުގައި ހުންނެވި، ރައީސް އިބްރާހިމް މުހައްމަދު ސޯލިހެވެ.
ޖުމްލަ 57،255 މީހުންނަށް ވޯޓުލުމުގެ ހައްގު ލިބިފައިވާ މި އިންތިހާބަކީ އެމްޑީޕީގެ ތާރީހުގައި ވެސް އެންމެ ފޯރިގަދަވި ޕުރައިމަރީ އެވެ.
އެގޮތުން އެޕާޓީގެ މެންބަރުން ދެފަޅިއަކަށް ބެހި، ކެމްޕޭނު ކުރަމުން އަންނަ އިރު، ދެ ކެންޑިޑޭޓުންގެ މެދުގައި ދަނީ ސީދާކޮށްނާއި ނުސީދާކޮށް ގިނަ ބަހުގެ ހަމަލާތަކެއް ބަދަލު ކުރަމުންނެވެ.
އެމްޑީޕީގެ ރިޔާސީ ޕްރައިމަރީގެ ވޯޓުލުން ކުރިއަށް ދާނީ އަންނަ ހޮނިހިރު ދުވަހުގެ ހެނދުނު 9:00 އިން ހަވީރު 5:00 އަށެވެ.
