އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް ކްރިމިނަލް ކޯޓުން އިވާފައިވާ 11 އަހަރުގެ ޖަލު ހުކުމް އިސްތިއުނާފު ކުރުމަށް ފެށޭ ހަފްތާގެ ތެރޭގައި ހުށަހަޅާނެ ކަމަށް އެމަނިކުފާނުގެ ގާނޫނީ ވަކީލުންގެ ތެރޭގައި އިސްކޮށް އުޅުއްވާ ޑރ. މުހައްމަދު ޖަމީލް އަހުމަދު ރޭ ވިދާޅުވެއްޖެ އެވެ.
ރޭ ޕީޕީއެމުން ބޭއްވި ނޫސްވެރިންގެ ބައްދަލުވުމެއްގައި ބައިވެެރިވެވަޑައިގެން ވާހަކަ ދައްކަވަމުން ޑރ. ޖަމީލް ވަނީ ރައީސް ޔާމީނުގެ ޝަރީއަތުގެ ރިޕޯޓު ލިބުން ލަސްވިކަން ފާހަގަކޮށް ކަންބޮޑުވުން ފާޅުކުރައްވާފަ އެވެ. އަދި، އެތައް ދުވަހެއް ފަހުން ލިބުނު އެ ރިޕޯޓަކީ މައްސަލައެއް ނެތް ރިޕޯޓެއް ކަމަށް ބަލާ އިސްތިއުނާފަށް ހުށަނޭޅޭނެ ކަމަށާއި، ރިޕޯޓު ރަނގަޅަށް ބެލުމަށް ދުވަސް ނަގާނެ ކަމަށް އޭނާ ފާހަގަކުރެއްވި އެވެ.
"އަޅުގަނޑުމެންގެ އަތަށް ވެސް ގިނަ ރިޕޯޓްތަކެއް އަރައިފި. އެކަމަކު މި ރިޕޯޓްގައި އެބަހުރި އެެހެންޏާ އެހެން ރިޕޯޓަކުން ނުފެންނަ ކަހަލަ އާދަޔާ ހިލާފު ކަންތައްތަކެއް. އެކި ތަންތަނުގައި އެކި ކަންތައް އައިސްފައި އޮތުމާއި، އެއް ކަމަކަށް ތަފާތު ހުއްޖައްތަކެއް އައިސްފައި އޮތުމުން އެބަ އިނގޭ މިއީ ވަރަށް ގޯސްކޮށް އޮތް ރިޕޯޓެއްކަން،" ރައީސް ޔާމީނުގެ ޝަރީއަތް ނިމުނުގޮތުގެ ރިޕޯޓު އޮތް ގޮތާއި ގުޅޭގޮތުން ކަންބޮޑުވުން ފާޅުކުރައްވާ ޑރ. ޖަމީލް ވިދާޅުވިއެވެ.
ޔާމީންގެ ވެރިކަމުގައި ނައިބު ރައީސްކަން ވެސް ކުރެއްވި ޖަމީލް ވަނީ މި އަންނަ ހަފްތާގެ ތެރޭގައި އެ މައްސަލަ އިސްތިއުނާފަށް ހުށަހެޅުމަށް ތައްޔާރުވަމުންދާކަން ހާމަކޮށްފަ އެވެ.
ޔާމީންގެ މައްސަލާގައި ކޯޓުން އަމަލުކޮށްފައިވާ ގޮތަކީ މިހާތަނަށް ޖިނާއީ މައްސަލައަކާއި ގުޅިގެން އަމަލުކުރި ގޮތް ނޫން ކަމަށް އޭނާ ވިދާޅުވި އެވެ. އެގޮތުން، ޝަރީއަތް ނިމުނު ގޮތުގެ ރިޕޯޓު ނުލިބި އެތައް ދުވަހެއް ވެގެން ދިއުމާއި، އެމަނިކުފާނަށް ތާއިދުކުރާ ޕީޕީއެމް/ޕީއެންސީގެ ކޯލިޝަނުން ނިކުމެ ރިޕޯޓު ނުލިބިގެން އިހްތިޖާޖު ކުރަން ޖެހުނުކަން ޖަމީލް ފާހަގަކުރެއްވި އެވެ.
ޖަމީލް އިތުރަށް ވިދާޅުވީ ކަފާލާތުގެ ދަށުން މީހަކު މިނިވަން ކުރާއިރު، ކުރެވޭ ތުހުމަތާއި އިސްތިއުނާފުގައި ހުރި ބުރަދަނާއި އެ މީހެއްގެ ގާނޫނީ ނުކުތާތަކުގެ މައްޗަށް ބެލޭނެ ކަމަށާއި، މި ހުކުމްކުރި ގޮތަށް ބަލާއިރު ހައިކޯޓުން މި ހުކުމް ގަބޫލު ނުކުރާނެކަމުގެ ޔަގީންކަން އޮތް ކަމަށް އޭނާ ވިދާޅުވި އެވެ.
ޔާމީންގެ މައްޗަށް ހުކުމް އިއްވާފައި ވަނީ މިދިޔަ ޑިސެމްބަރު މަހުގެ 25 ވަނަ ދުވަހު ކަމަށްވާއިރު އެމަނިކުފާނުގެ ޝަރީއަތް ނިމުނު ގޮތުގެ ރިޕޯޓު ލިބިފައި ވަނީ މި ހިނގާ ޖެނުއަރީ މަހުގެ 15 ވަނަ ދުވަހު އެވެ.
ޔާމީންއަކީ އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ރިޔާސީ ކެންޑިޑޭޓެވެ. ނަަމަވެސް، ހުކުމުގެ ސަބަބުން އިންތިހާބުގައި ވާދަ ކުރުމުގެ ފުރުސަތު ޔާމީނަށް މިވަގުތަށް ވަނީ ގެއްލިފަ އެވެ. އެކަމަކު އިދިކޮޅުން ބުނަނީ ޔާމީން ނޫން ބޭފުޅަކު ޕީޕީއެމުން ރިޔާސީ އިންތިހާބުގައި ވާދަ ނުކުރައްވާނެ ކަމަށެވެ.
