ވެރިކަން ކުރާ އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ރައީސް އިބްރާހިމް މުހައްމަދު ސޯލިހު އައްޑޫ ސިޓީ މަރަދޫއަށް ވަޑައިގެންނެވުމުން މަސްވެރި އެ ރަށު ރައްޔިތުންގެ އެންމެ ބޮޑު ޝަކުވާއަކަށް ވީ މަހަށް ހަމަ އަގު ނުލިބުމެވެ.
އެ ޝަކުވާއަށް ރައީސް ދެއްވީ އާދައިގެ މަތީން ދެއްވާ ޖަވާބެވެ؛ އެމްޑީޕީއަށް މަސްވެރިން މުހިންމު ކަމެވެ. މި ސަރުކާރުން މަސްވެރިން ދޫކޮށްނުލާނެ ކަމުގެ ޔަގީން ކަމެވެ.
"[ކަންބޮޑުވުންތައް އެބަހުރި] މަސްވެރި ބައެއް ރަށްރަށުގައި އެހެންނަމަވެސް ހަގީގަތަކީ އަޅުގަނޑުމެންނަށް މިވަގުތު އިގުތިސޯދީ ހާލަތުގައި ކުރެވެން އޮތް ގޮތް [މިއީ]،" ކޮވިޑާއި ރަޝިއާ ހަނގުރާމައިގެ ސަބަބުން ތެލުގެ އަގަށް ނުރަނގަޅު އަސަރު ކޮށްފައިވާ ކަން ފާހަގަކުރައްވަމުން ރައީސް ވިދާޅުވި އެވެ.
ރައީސް އިބްރާހިމް މުހައްމަދު ސޯލިހު މަރަދޫގެ ރައްޔިތުންނާ ބައްދަލުކުރައްވަނީ--- ފޮޓޯ: އެމްޑީޕީ
ރައީސް ވިދާޅުވީ ސަބްސިޑީ ދީގެން، މަސްވެރިންނަށް ސަރުކާރުން މިހާރު ވެސް ތެޔޮ ވިއްކަމުން ދަނީ ނުބައްދަލު އަގެއްގައި ކަަމަށެވެ. އެކަމުގެ ސަބަބުން ރާއްޖެއިން ބޭރަށް މަސް ވިއްކަމުން ދަނީ ގެއްލުމުގައި ކަމަށް ރައީސް ވިދާޅުވި އެވެ.
"ރާއްޖެއިން ބޭރަށް މަސް މި ވިއްކަނީ ގެއްލުމުގައި، މި އަށް ވުރެ ބޮޑުކޮށް މަސް މިވަގުތު ގަނެފިއްޔާ ގެއްލުން ފޫބައްދަން ޖެހޭނީ ހަމަ ތިބޭފުޅުން ދެއްވާ ޓެކްސްއިން،" ރައީސް ވިދާޅުވި އެވެ.
ރައީސް ވިދާޅުވި ގޮތުންނަމަ، މިކަމަށް ހައްލެއް ލިބެން އޮތީ ރަށްރަށުގައި ގާއިމްކުރާ ކޯލްޑް ސްޓޯރޭޖު ފެސިލިޓީތައް އަވަސް މުސްތަގުބަލެއްގައި ބޭނުން ކުރެވެން ފަށައިގެންނެވެ.
"މަސްވެރިންނަށް މިއަށް ވުރެ ރަނގަޅު އަގެއް ލިބޭނެ ގޮތް އިރާދަކުރެއްވިއްޔާ އަޅުގަނޑުމެން ހަދައިދޭނަން،" ރައީސް ވިދާޅުވި އެވެ.
މަސްވެރިންނަށް ދިމާވެފައިވާ ދަތިތައް ހައްލުކޮށްދިނުމުގެ ގޮތުން، ދެން ރައީސް ފާހަގަކުރެއްވީ ޑިސެމްބަރު މަހުގެ 10 ވަނަ ދުވަހު ފާހަގަކުރި މަސްވެރިންގެ ދުވަހު ކޮށްދެއްވާނެ ކަމަށް އެމަނިކުފާނު ވިދާޅުވި ކަންކަމެވެ؛ ޑިސްކައުންޓު ރޭޓުގައި އެސްޓީއޯއީން ތެޔޮ ހަމަޖައްސައިދިނުމާއި ކްރެޑިޓަށް އެކަން ކޮށްދިނުމެވެ.
އެކަންކަން ވެސް ލަސްތަކެއް ނުވެ ވެގެން ދާނެ ކަމަށް ރައީސް އެ ދުވަހު ވިދާޅުވި އެވެ.
ނަޝީދުގެ ވިސްނުން ތަފާތު
އެހެންނަމަވެސް ޕްރައިމަރީގައި ރައީސް ސޯލިހާ ވާދަކުރައްވާ އެ ޕާޓީގެ ރައީސް މުހައްމަދު ނަޝީދުގެ ވިސްނުން މިކަމުގައި ވަރަށް ތަފާތެވެ. ނަޝީދު ގަބޫލުކުރައްވާ ގޮތުގައި، ރާއްޖެއިން ބޭރަށް ރޯމަސް ބޭރުކުރާހާ ހިނދެއްގައި މަހަށް ލިބެންވާ "ހަމަ އަގު" ނުލިބޭނެ އެވެ.
"މިއަދު މަސް ޓަނެއް މި ވިއްކޭ އަގަކީ އެއްގޮތަކަށް ވެސް އެކަން ވާން އޮތް އަގެއް ނޫން، މަސް ރަނގަޅު އަގުގައި ނުވިއްކުނީމާ، އަޅުގަނޑުމެންނަށް ޖެހިފައި ހުރި ހިސާބުގައި މަހުގެ އަގަކީ ކަޅުބިލަމަސް ކިލޯއެއް 25 ރުފިޔާއަށް ވިއްކޭ ގޮތް ވުން،" މިދިޔަ ހަފްތާ ބަންދުގައި މ. ދިއްގަރަށް ވަޑައިގެން ނަޝީދު ވިދާޅުވި އެވެ.
ޔޫރަޕުގައި ރޯމަސް ކިލޯއެއްގައި 400 އަށް ވެސް ނުލިބޭކަން ފާހަގަކުރައްވައި ނަޝީދު ވިދާޅުވީ މިއީ މަސްވެރިން މަސްކިރާ ބޯޓު ފަހަރަށް 17 ރުފިޔާއަށް ވިއްކާ މަސްކިލޯ ކަމަށެވެ.
ނަޝީދު ވިދާޅުވީ 1980ގެ އަހަރުތަކުގެ ތެރޭގައި ރާއްޖެއިން ބޭރަށް ރޯމަސް އެކްސްޕޯޓު ކުރަން ފެށުމުގެ ކުރިން އެކަން ކުރަމުން އައީ މަސްކައްކާ ހިއްކައިގެން ކަމަށެވެ.
ރައީސް ނަޝީދު މ. ދިއްގަރުގައި މަސްކައްކާ ގެއެއްގައި-- ފޮޓޯ: އަންނި2023
"މަސް ކައްކާއިރު މަސް ޓަނަކުން ރިހާކުރަން އެކަނި އެބަނެގޭ 20 ޓަނު އެއީ 20 ހާސް ރުފިޔާ، ރޮލާ ބޭރުކޮށްލީމާ އެފައިސާ ދިޔައީ، މަސްކުނޑިއަށް އެބަނެގޭ 10 ހާސް ރުފިޔާ ޓަނަކުން ކިލޯއަކަށް 10 ރުފިޔާ، ރޮލާ ވިއްކާލީމާ އެބައިވެސް ދިޔަ،" ނަޝީދު ވިދާޅުވި އެވެ.
އެހެންކަމުން ދެން ވެސް އެކަމަށް އޮތް ހައްލަކީ ރޯމަސް އެކްސްޕޯޓު ކުރުމުގެ ބަދަލުގައި "ގޭދޮށު މަސްފެކްޓަރީ"ތައް ގެނެސް، މަސްކައްކައިގެން އެކްސްޕޯޓުކުރުން ކަމަށް އެމަނިކުފާނު ދެކެވަޑައިގަންނަވަ އެވެ.
