އައްޑޫ ސިޓީ ފޭދޫއަށް ރައީސް އިބްރާހީމް މުހައްމަދު ސޯލިހު މިދިޔަ ހޮނިހިރު ދުވަހު ވަޑައިގަތް ވަގުތު އިދިކޮޅު ޕީޕީއެމް/ޕީއެންސީގެ ސަޕޯޓަރުން އެއްވެ ކުރަމުން ދިޔަ މުޒާހަރާ ރޫޅާލުމުގައި އެ ސަރަހައްދުގައި ހަރަކާތްތެރިވަމުން ދިޔަ ފުލުހުން އަމަލުކުރި ގޮތުގެ މައްޗަށް "ލޯކަލް ރިވިއު" އެއް ހަދަން ފަށައިފި އެވެ.
ޕީޕީއެމް/ޕީއެންސީގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން މިނިވަން ކުރަން ގޮވާލައި އެއްވެ ތިބި ސަޕޯޓަރުންނާ ދިމާއަށް ފުލުހުން ޕެޕަ ސްޕްރޭ ޖަހައި، ބާރުގެ ބޭނުންކުުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދިޔައީ ދައުރުވަމުންނެވެ.
އެކަމާ ގުޅޭ ގޮތުން ސުވާލުކުރުމުން ޕޮލިސް މީޑީއާ ޔުނިޓްގެ ހެޑް ފާތިމަތު ނަޝްވާ "އަދަދު" ނޫހަށް ވިދާޅުވީ އައްޑޫ ޕޮލިސް ޑިޕާޓްމަންޓުން އޭގެ މައްޗަށް ލޯކަލް ރިވިއުއެއް ހަދަމުންދާ ކަމަށެވެ.
ރިވިއު ނިންމުމަށް ފަހު، ފުލުހުންގެ ޕްރޮފެޝަނަލް ސްޓެންޑަޑްއަށް ފޮނުވާނެ އެވެ. މުޒާހަރާ ރޫޅާލުމުގައި ހާލަތާ ނުބައްދަލު ބާރު ފުލުހުން ބޭނުންކޮށްފައިވާނަމަ، އެ ކަމާ މެދު ފިޔަވަޅު އެޅުމުގައި ގޮތެއް ނިންމާނީ ވެސް ޕްރޮފެޝަނަލް ސްޓެންޑަޑް އިންނެވެ.
އެނގިފައިވާ ގޮތުގައި، ރައީސް ސޯލިހު ފޭދޫ ބަނދަރަށް ވަޑައިގަތް ވަގުތު އެ ސަރަހައްދަށް އެއްވެ ތިބި އިދިކޮޅު ސަޕޯޓަރުން ފުލުހުންގެ އަމުރަށް ނުކިޔަމަންތެރިވެއްޖެނަމަ ލައުޑް ސްޕީކަރުން ފުލުހުން ދިޔައީ ބާރުގެ ބޭނުންކުރާނެ ކަމުގެ އިންޒާރު ދެމުންނެވެ. އަދި ފުލުހުންނާއި، މުޒާހަރާގެ ބައިވެރިންނާ ދެމެދު ކުރިމަތިލުންތަކެއް ހިނގި ކަމަށް އެނގިފައިވެ އެވެ.
ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވީ އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީގެ ހިޔާނާތުގެ ތެރެއިން، ވ. އާރަށް ކުއްޔަށް ދިނުމުގެ މުއާމަލާތުގައި 1.1 މިލިއަން ޑޮލަރުގެ ރިޝްވަތު ނަންގަވައި އެ ފައިސާ ލޯންޑަކުރެއްވި ކަމަށް ކްރިމިނަލް ކޯޓުގައި ކަނޑައެޅުމަށް ފަހުގަ އެވެ.
އޭގެ ފަހުން އެމަނިކުފާނު މިނިވަންކުރުމަށް ގޮވާލައި އެކި ހަރަކާތްތައް ދަނީ ހިންގަމުންނެވެ. މާލޭގައި ވެސް ކޮންމެ ރެއަކު އިދިކޮޅު ފަރާތްތަކުން ދަނީ މުޒާހަރާކުރަމުންނެވެ. މާލޭގައި އެއްވުން ގާނޫނުން މަނާކޮށްފައި އޮންނައިރު، ކޮންމެ ރެއަކު ވެސް މުޒާހަރާގެ ބައެއް ބައިވެރިން ހައްޔަރުކޮށް ފަހުން ދޫކޮށްލަ އެވެ.
