ވެރިކަަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ފުރަތަމަ ސަރުކާރު ކަމަށްވާ ރައީސް މުހައްމަދު ނަޝީދުގެ ވެރިކަމުގައި 2011 ގައި، އައްޑޫ ސިޓީގައި ބޭއްވި ސާކް ސަމިޓާ ދިމާކޮށް އެ ސިޓީގައި ތަރައްގީގެ މަޝްރޫއުތައް ކުރިއަށްގެންދިޔަ ގޮތަށް ރައީސް އިބްރާހިމް މުހައްމަދު ސޯލިހު ފާޑުވިދާޅުވެއްޖެ އެވެ.
އެމްޑީޕީގެ ޕްރައިމަރީގެ ކެމްޕެއިނަށް މިހާރު އައްޑޫއަށް ކުރައްވަމުން ގެންދަވާ ދަތުރުފުޅުގައި ހިތަދޫ ދެކުނު ދާއިރާގެ އެމްޑީޕީ މެންބަރުންނާ ބައްދަލުކުރައްވައި ރައީސް ވިދާޅުވީ އައްޑޫ ސިޓީއަށް އޮތީ މިއިން ޒަމާނެއްގައި އަޅާނުލެވި ކަމަށެވެ.
ކުރީގެ ސަރުކާރުތަކުން މަސައްކަތްތަކެއް ކުރެވޭތޯ ބެލިނަމަވެސް، އެއިން ކޮންމެ ކަމެއް ކޮށްފައި ހުރީ ވަގުތީ ކަމެއްގެ ގޮތުގައި ކަމަށް ރައީސް ވިދާޅުވި އެވެ. އެ ކަމަށް ރައީސް ނެންގެވީ ސާކް ސަމިޓަށް ވީ ތައްޔާރީތަކުގެ މިސާލެވެ.
"ސާކް ސަމިޓު ނިމިގެން ދިޔައިރުގައި ވެގެން ދިޔަ ގޮތް ތިޔަބޭފުޅުންނަށް އެނގިވަޑައިގަންނަވާނެ، އެތާ ހުރި ގޮނޑިކޮޅާ އެއްޗެހި ހިފައިގެން އޭރުގެ ސަރުކާރުން [މާލެ] ދިޔައީ،" ނަޝީދުގެ ސަރުކާރަށް ފާޑުވިދާޅުވަމުން ރައީސް ވިދާޅުވި އެވެ.
ރައީސް ވިދާޅުވީ އެމަނިކުފާނުގެ ވެރިކަމުގައި ގެންނަނީ "އުފުރާލައިގެން" ގެންދެވޭ ފަދަ ތަރައްގީ ނޫން ކަމަށާއި ދާއިމީ ތަރައްގީ ކަމަށެވެ.
އައްޑޫ ސިޓީއަށް މިފަދަ ބޮޑު ތަރައްގީއެއް ގެނެސްދިން އިތުރު ސަރުކާރެއް މިހާތަނަށް އައިސްފައިވާ ކަމަށް ލިޔެކިޔުންތަކުން ނުފެންނަ ކަމަށް ވެސް ރައީސް ވިދާޅުވި އެވެ.
ރައީސް ސޯލިހު ވަނީ އިއްޔެ ވެސް ސާކް ސަމިޓަށް އައްޑޫއަށް މަގުހެދުމުގައި އަމަލު ކުރި ގޮތަށް ފާޑުވިދާޅުވެފަ އެވެ. ބޮޑެތި ގަސްތައް ކަނޑާލައިގެން އެކަން ކޮށްފައިވަނީ އެންމެ ދެމެހެެއްޓެނިވި ގޮތުގައި ނޫން ކަމަށް އެމަނިކުފާނު ވިދާޅުވި އެވެ.
އައްޑޫއަށް މިހާރު ކުރައްވަމުން ގެންދަވާ ކެމްޕެއިނު ދަތުރުފުޅުގައި ރައީސް މިއަދު ވަނީ ހިތަދޫގެ ގޭގެއަށް ޒިޔާރަތް ކުރައްވައި ރައްޔިތުންނާ ބައްދަލުކުރައްވާފަ އެވެ.
