ތަގައްޔަަރުވެފައިވާ ކޯފް ސިރަޕް ބޮއެގެން ދުނިޔޭގެ އެކި ހިސާބުތަކުގައި ކުޑަކުދިންތަކެއް މަރުވެފައިވާތީ، އެއިން ބޭހަކަށް ސަމާލުވާން ފުޑް އެންޑް ޑްރަގް އޮތޯރިޓީން އެދެފި އެވެ.
އެފްޑީއޭއިން މިއަދު ނެރެފައިވާ އިއުލާނެއްގައި ސަމާލުވާން ބުނެފައިވާ އެމްބްރޮނޯލް ކޯފް ސިރަޕް (Ambrnol Cough Syrup) އާއި ޑޮކް-1 މެކްސް ސިރަޕް (Dok-1 max Syrup) އަކީ ރާއްޖެ އެތެރެ ކުރުމަށް ހުއްދަ ދީފައިވާ ބޭހެއް ނޫނެވެ.
އެހެން ނަމަވެސް، ބޭސް ސިޓީގައި ލިޔެގެންނާއި އެހެނިގެން ގޮތް ގޮތުން އެ ދެ ބޭސް ދިވެހިރާއްޖެއަށް އެތެރެވެފައި ހުރެދާނެތީ އެކަމަށް ސަމާލުވުމަށް އެފްޑީއޭއިން އެދިފައިވެ އެވެ.
"ރައްކާތެރި ކަމުގެ ފިޔަވަޅެއްގެ ގޮތުން ބޭސް ސިޓީއަށް ބޭސް އެތެރެ ކުރާ އިރު ހާއްސަ ސަމާލު ކަމެއްދީގެން ޕޯޓްތަކުގައި ބަލައި ފާސް ކުރަމުން ގެންދާނެ ކަން މައުލޫމާތަށްޓަކައި ދެންނެވިން،" އެ އިއުލާނުފައިވެ އެވެ.
އެ ދެ ބޭސް ވެސް އުފައްދާފައި ވަނީ މެރިއޯން ބަޔޯޓެކް ކިޔާ ކުންފުންޏަކުންނެވެ. އެ ކުންފުނިން މިހާރު ވަނީ ވަގުތީ ގޮތުން ބޭސް އުފެއްދުން ހުއްޓާލައިފަ އެވެ. މެރިއޯން ބަޔޯޓެކްއަކީ އިންޑިއާގެ ވެރިރަށް ނިއު ދިއްލީ ކައިރީގައި އޮންނަ ނޮއިޑާގައި ގާއިމްވެފައިވާ ކުންފުންޏެވެ. ކުންފުނީގެ ވެބްސައިޓް ޑައުންވެފައި ހުރި ނަމަވެސް، ލިންކްޑްއިން ޕޭޖުގައި ބުނީ އެއީ 1999 ވަނަ އަހަރު އުފެދުނު ކުންފުންޏެއް ކަމަށެވެ.
އެފްޑީއޭގެ އިއުލާނުގައި ބުނެފައި ވަނީ އެ ދެ ކޯފް ސިރަޕު ތަގައްޔަރުވެފައި ވަނީ އެތެލީން ގްލައިކޯލް އަދި ޑަޔަތެލީން ގައިކޯލް ކިޔާ ދެ މާއްދާ އެވެ. އެތެލީން ގްލައިކޯލްއަކީ ޕޮލިސްޓާ ފައިބަރު އުފައްދާއިރު ބޭނުންކުރާ އެއްޗެކެވެ. އަދި އެންޓި ފްރީޒް މާއްދާއެއްގެ ގޮތުން ބުރަކި، ގަލަން ފަދަ ތަކެތި އުފައްދާއިރު ވެސް ބޭނުން ކުރެ އެވެ. ޑަޔަތެލީން ގައިކޯލްއަކީ ވެސް އެންޓި ފްރީޒް މާއްދާއެއްގެ ގޮތުން ބޭނުން ކުރާ އެއްޗެކެވެ.
