އިދިކޮޅު ޕީޕީއެމް ޕީއެންސީ ކޯލިޝަންގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުން އިއްވި ޖަލު ހުކުމާއި ޝަރީއަތުގެ މުޅި ރިޕޯޓް ނުލިބޭތީ، އެ ރިޕޯޓް ހޯދަން ޕީޕީއެމްއާއި ޕީއެންސީ ކޯލިޝަންގެ ލީޑާޝިޕް މިއަދު ކޯޓަށް ދާން ނިންމައިފި އެވެ.
އެމްއެމްޕީއާރުސީގެ ބޮޑު ހިޔާނާތުގެ ތެރެއިން، ވ. އާރަށް ކުއްޔަށް ދިނުމުގެ މުއާމަލާތުގައި ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި އެ ފައިސާ ލޯންޑަ ކުރެއްވި ކަމަށް ސާބިތުވާ ކަމަށް ކަނޑައެޅުމަށް ފަހު، 11 އަހަރަށް ޖަލަށް ލުމަށް ހުކުމް ކުރީ މިދިޔަ ޑިސެމްބަރު މަހުގެ 25 ވަނަ ދުވަހުގަ އެވެ.
ހުކުމްކުރިތާ ދެ ހަފުތާ ވެގެން ދިޔައިރު އަދިވެސް ޝަރީއަތުގައި ދެ ފަރާތުން ވެސް ދައްކާ ވާހަކަތައް ހިމެނޭ މަހްޟަރު ބަޔާންތަކާއެކު ޝަރީއަތް ނިންމި ގޮތުގެ ރިޕޯޓް ދޫކޮށްފައެއް ނުވެ އެވެ. ޔާމީންގެ ވަކީލުން ބުނެފައިވަނީ ހައި ކޯޓަށް ފުރިހަމަ އިސްތިއުނާފެއް ހުށަހެޅޭނީ އެ ލިޔެކިޔުން ލިބިގެން ކަމަށެވެ.
"ޝަރީއަތް ނިމުނުގެ ގޮތުގެ ރިޕޯޓް ހޯދަން ލީޑާޝިޕުން މިއަދު މެންދުރުފަހު 1:00 ގައި ކްރިމިނަލް ކޯޓަށް ވަޑައިގަންނަވާނެ،" ނޫސްވެރިންނަށް މައުލޫމާތު ދިނުމަށް އިދިކޮޅު ކޯލިޝަނުން ހަދާފައި އޮންނަ މީޑިއާ ގްރޫޕަށް ޕީޕީއެމްގެ ސެކްރެޓަރީ ޖެނެރަލް އަހުމަދު ތޮލާލް ފޮނުވި މެސެޖްގައިވެ އެވެ.
އިސްތިއުނާފް ކުރުމަށް 60 ދުވަހުގެ މުއްދަތެއް ލިބޭނެ އެވެ. އަދިވެސް މައްސަލަ އިސްތިއުނާފުކޮށްފައި ނުވާތީ، ސަޕޯޓަރުންނާއި ލީޑާޝިޕްގެ ކަންބޮޑުވުންތައް އޮތް ކަމަށް އަޑުފެތުރެމުން އެބަ ދެ އެވެ.
ޕީޕީއެމްގެ ނައިބު ރައީސް އަހުމަދު ޝިޔާމް "އަދަދު" ނޫހަށް ކުރިން ވިދާޅުވެފައިވަނީ ވީހާވެސް އަވަހަށް މައްސަލަ އިސްތިއުނާފްކޮށް ޔާމީން މިނިވަންވުމަށް ސަޕޯޓަރުން އެދޭނެ ކަމަށެވެ. ނަމަވެސް އޭގައި ގާނޫނީ ޓީމާއި ލީޑާޝިޕާ ދެމެދު ހިތްހަމަނުޖެހުމެއް ނެތް ކަމަށެވެ.
"ސަޕޯޓަރުންގެ ތެރޭ އެބަ ގަބޫލުކުރެވޭ ލަސްވެއްޖެއޭ، އެކަމަކު އޭގައި ވަރަށް މުހިންމު ފުރިހަމަ އިސްތިއުނާފެއް ކުރަން، ރައީސް ޔާމީން ބޭނުންފުޅުވާނީ ވެސް އެ ގޮތަށް، މީގެ ކުރިން ވެސް، މިހާރު ވެސް އިސްތިއުނާފަށް ހުށަހެޅުމުގެ ކަންކަން ދާނީ ޔާމީންގެ ފުރިހަމަ އިރުޝާދު ލިބިގެން،" ޝިޔާމް ވިދާޅުވި އެވެ.
ރައީސުލްޖުމްހޫރިއްޔާގެ ޝަރުތުތަކުގެ ގޮތުގައި ގާނޫނީ އަސާސީގައި ބަޔާންކޮށްފައި އޮންނަ އެއް ޝަރުތަކީ، ޖިނާއީ ކުށެއްކުރި ކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވާން ޖެހެ އެވެ.
އެއާއެކު، ޔާމީނަށް ރިޔާސީ އިންތިހާބުގައި ވާދަކުރުމުގެ ފުރުސަތު މި ވަގުތަށް ވަނީ ބަންދުވެފަ އެވެ. އަދި، ކްރިމިނަލް ކޯޓުގައި އެމަނިކުފާނުގެ މައްޗަށް އުފުލާފައިވާ ރިޝްވަތާއި މަނީ ލޯންޑަކުރުމުގެ ދައުވާގެ އިތުރު މައްސަލައެއް ވެސް އެބަ އޮތެވެ. ރ. ފުއްގިރި ކުއްޔަށް ދޫކުރުމުގައި ހިޔާނާތް ހިންގި ކަމަށް ބުނާ މައްސަލަ ކްރިމިނަލް ކޯޓުގައި އަދި އޮތީ ޝަރީއަތުގެ ވަރަށް ކުރީކޮޅުގެ މަރުހަލާއެއްގަ އެވެ.
