އިދިކޮޅު ޕީޕީއެމް ޕީއެންސީ ކޯލިޝަންގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުން އިއްވާފައިވާ ޖަލު ހުކުމް ހައި ކޯޓުގައި އިސްތިއުނާފް ކުރުން ލަސްނުވާ ކަމަށާއި ޔާމީން ބޭނުން ވަނީ ވީހާވެސް ފުރިހަމަ އިސްތިއުނާފެއް ހުށަަހަޅަން ކަމަށް ލީޑާޝިޕުން ބުނެފި އެވެ.
އެމްއެމްޕީއާރުސީގެ ބޮޑު ހިޔާނާތުގެ ތެރެއިން، ވ. އާރަށް ކުއްޔަށް ދިނުމުގެ މުއާމަލާތުގައި ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި އެ ފައިސާ ލޯންޑަ ކުރެއްވި ކަމަށް ސާބިތުވާ ކަމަށް ކަނޑައެޅުމަށް ފަހު، 11 އަހަރަށް ޖަލަށް ލުމަށް ހުކުމް ކުރީ މިދިޔަ ޑިސެމްބަރު މަހުގެ 25 ވަނަ ދުވަހުގަ އެވެ.
ހުކުމްކުރިތާ ދެ ހަފުތާ ވެގެން ދިޔައިރު އަދިވެސް މައްސަލަ އިސްތިއުނާފުކޮށްފައި ނުވާތީ، ސަޕޯޓަރުންނާއި ލީޑާޝިޕްގެ ކަންބޮޑުވުންތައް އޮތް ކަމަށް އަޑުފެތުރެމުން އެބަ ދެ އެވެ.
އެ ކަމާ ގުޅޭ ގޮތުން ކުރި ސުވާލަކަށް ޖަވާބު ދެއްވަމުން ޕީޕީއެމްގެ ނައިބު ރައީސް އަހުމަދު ޝިޔާމް "އަދަދު" ނޫހަށް ވިދާޅުވީ ވީހާވެސް އަވަހަށް މައްސަލަ އިސްތިއުނާފްކޮށް ޔާމީން މިނިވަންވުމަށް ސަޕޯޓަރުން އެދޭނެ ކަމަށެވެ. ނަމަވެސް އޭގައި ގާނޫނީ ޓީމާއި ލީޑާޝިޕާ ދެމެދު ހިތްހަމަނުޖެހުމެއް ނެތް ކަމަށެވެ.
"ސަޕޯޓަރުންގެ ތެރޭ އެބަ ގަބޫލުކުރެވޭ ލަސްވެއްޖެއޭ، އެކަމަކު އޭގައި ވަރަށް މުހިންމު ފުރިހަމަ އިސްތިއުނާފެއް ކުރަން، ރައީސް ޔާމީން ބޭނުންފުޅުވާނީ ވެސް އެ ގޮތަށް، މީގެ ކުރިން ވެސް، މިހާރު ވެސް އިސްތިއުނާފަށް ހުށަހެޅުމުގެ ކަންކަން ދާނީ ޔާމީންގެ ފުރިހަމަ އިރުޝާދު ލިބިގެން،" ޝިޔާމް ވިދާޅުވި އެވެ.
ޔާމީންގެ ވަކީލުންގެ ޓީމުގައި ހިމެނޭ ވަކީލު އަބްދުﷲ ސިޔާޒު ވިދާޅުވީ، ޝަރީއަތުގައި ދެ ފަރާތުން ވެސް ދައްކާ ވާހަކަތައް ހިމެނޭ މަހްޟަރު ބަޔާންތަކާއެކު ޝަރީއަތް ނިންމި ގޮތުގެ ރިޕޯޓް ދޫކުރުމަށް، ހުކުމް ކުރި ދުވަހު އެދިފައިވާ ކަމަށެވެ. ނަމަވެސް މިއަދާ ހަމައަށް ވެސް އެ ލިބިފައި ނުވާ ކަމަށް ވިދާޅުވި އެވެ.
"ކޯޓުން ދޫކުރި ރިޕޯޓްގައި ދެ ފަރާތުން ދެއްކި ވާހަކަ އަދި ޝަރީއަތުގައި ކަން ހިނގި ގޮތް ފުރިހަމައަށް ލިޔެފައި ނުވެސް ނެތް، އިސްތިއުނާފްގެ އެއް މަސްދަރަކަށް ވާނީ ދެ ފަރާތުން ޝަރީއަތުގައި ދެއްކި ވާހަކަ ހިމެނޭ މަހްޟަރު ބަޔާންތައް،" ސިޔާޒު ކުރެއްވި ޓްވީޓެއްގައި ލިޔެފައިވެ އެވެ.
ސިޔާޒު އެހެން ވިދާޅުވި ނަމަވެސް، ޝަރީއަތް ނިންމި ގޮތުގެ ހުލާސާ ރިޕޯޓާއެކު ބައެއް އިސްތިއުނާފީ ނުކުތާތަކާއެކު އިސްތިއުނާފް ކުރުމަށް ފަހު، ޝަރީއަތުގެ ފުރިހަމަ ރިޕޯޓާއެކު ދެން ބޭނުންވާ އެހެން ބައެއް އިސްތިއުނާފް ނުކުތާތައް ފަހުން ހުށަހަޅަން ވެސް ގާނޫނުން ޖާގަ ދެ އެވެ.
ރައީސުލްޖުމްހޫރިއްޔާގެ ޝަރުތުތަކުގެ ގޮތުގައި ގާނޫނީ އަސާސީގައި ބަޔާންކޮށްފައި އޮންނަ އެއް ޝަރުތަކީ، ޖިނާއީ ކުށެއްކުރި ކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވާން ޖެހެ އެވެ.
އެއާއެކު، ޔާމީނަށް ރިޔާސީ އިންތިހާބުގައި ވާދަކުރުމުގެ ފުރުސަތު މި ވަގުތަށް ވަނީ ބަންދުވެފަ އެވެ. އަދި، ކްރިމިނަލް ކޯޓުގައި އެމަނިކުފާނުގެ މައްޗަށް އުފުލާފައިވާ ރިޝްވަތާއި މަނީ ލޯންޑަކުރުމުގެ ދައުވާގެ އިތުރު މައްސަލައެއް ވެސް އެބަ އޮތެވެ. ރ. ފުއްގިރި ކުއްޔަށް ދޫކުރުމުގައި ހިޔާނާތް ހިންގި ކަމަށް ބުނާ މައްސަލަ ކްރިމިނަލް ކޯޓުގައި އަދި އޮތީ ޝަރީއަތުގެ ވަރަށް ކުރީކޮޅުގެ މަރުހަލާއެއްގަ އެވެ.
