ގދ. ފިޔޯރީ ސްކޫލުގައި މިހާރު ވެސް ކިޔަވައިދިނުމަށް ބޭނުންކުރަމުންދިޔަ އިމާރާތެއްގައި އަލިފާނުގެ ހާދިސާއެއް ހިނގައި ބޮޑެތި ގެއްލުންތަކެއް ލިބިއްޖެ އެވެ.
ފިޔޯރީ ސްކޫލް ހިންގުމާ ހަވާލުވެ ހުންނެވި މުހައްމަދު އިގުބާލް "އަދަދު"އަށް ވިދާޅުވީ އެ ސްކޫލުގައި އަލިފާނުގެ ހާދިސާއެއް ހިނގަން މެދުވެރިވީ ކަރަންޓު ޝޯޓެއް ވެގެން ކަމަށް ބެލެވޭ ކަމަށާއި، އަލިފާން ރޯވެ އަނދަން ފެށި ވަގުތަކީ ސްކޫލްގައި އެއްވެސް ދަރިވަރަކު ނެތް ވަގުތެއް ކަމަށެވެ.
އަލިފާންގަނޑު ރޯވެ އަަނދަން ފެށި ވަގުތު ނިއްވާލުމަށް ވެސް އެތަނާ ކައިރި ނުވެވުނު ކަމަށާއި، މި ހާދިސާގައި މުޅި އިމާރާތް އެކީ އަނދައިގެން ދިޔަ ކަމަށް އިގުބާލް ވިދާޅުވިއެވެ.
"އެ ހުޅު ހިފި ގޮތަށް ހަމަ އަނދާ ހުލިވީ. ނިއްވާލަން ކައިރިވެވޭ ވަރެއް ވެސް ނުވޭ. ފަހުން ޕަންޕުތަކާ އެއްޗިހި ހިފައިގެން ގޮސް މަސައްކަތް ކުރި އާންމުންނާ ޕޮލިހުންނާ ނިކުމެ. އެކަމަކު އޭގެ އެއްވެސް ފައިދާއެއް ނެތް. އިމާރާތް އެއްކޮށް އަދައިގެން ގޮސްފައި ވަނީ" އިގުބާލް ވިދާޅުވިއެވެ.
އިގްްބާލް ވިދާޅުވި ގޮތުގާ މި ހާދިސާ ހިނގާފައި ވަނީ މިއަދު ހަވީރު 17:05 ހާއިރު އެވެ.
އެވަގުތު ސްކޫލު ގޯތިތެރޭގައި ދެ ވޮޗަރަކާއި މަސައްކަތު މީހެއް ހުރި ކަމަށާއި، އެއިން އެއްވެސް މީހަކަށް އަނިޔާއެއް ލިބިފައި ނުވާކަމަށް އޭނާ ވިދާޅުވިއެވެ.
އެ ހާދިސާ ހިނގި އިރު އަލިފާން ނިއްވާލެވޭނެ ޒާތުގެ އެއްވެސް އާލާތެއް އިމާރާތުގައި ނެތް ކަމަށް ވެސް އިގުބާލް މައުލޫމާތު ދިނެވެ.
އޭނާ ވިދާޅުވީ އަދިވެސް ކޮންމެވެސް ވަރަކަށް އަނދަމުން ދާކަމަށާއި، މިހާރު އަލިފާންގަނޑުގެ ބޮޑުބައި ނިވިފައިވާ ކަމަށެވެ.
މި ހާދިސާއާ ގުޅިގެން ތިނަދޫ ފަޔާ ސްޓޭޝަނުގެ ފަޔާމަނުންނަށް ފިޔޯރީއަށް ދެވުނީ މިރޭ 18:45 ގަ އެވެ. އަލިފާން ރޯވި ސީދާ ސަބަބު މިހާތަނަށް ދެނެގަނެވިފައެއް ނުވެ އެވެ.
"މި ކުލާސްރޫމުތައް ވަނީ ބޭނުން ނުކުރެވޭ ވަރަށް އަނދާފައި. އިމާރާތުގެ ފާރުން ބަޔަކާއި ފުރާޅުން ބައެއް ވެއްޓި އިމާރާތް ހުރީ ބަންދުވެފައި. ގދ.ތިނަދޫ ފަޔަރ ސްޓޭޝަނުގެ ފަޔަރމަނުން ގދ.ފިޔޯރީއަށް ދިޔައިރު އަލިފާން ހުރީ ކޮންޓްރޯލް ކުރެވިފައި. އަނގުރު އަލިފާނުގެ އަސަރު ހުރުމާ އެކު ކޮންމެވެސް ވަރަކަށް ދުން ދަނީ އަރަމުން،" އެމްއެންޑީއެފްއިން ހިއްސާކުރި މެސެޖެއްގައި ބުނެފައިވެ އެވެ.
އެ އިމާރާތަކީ ސްކޫލްގެ ސެން ކްލާހާއި، އާންމުކޮށް ކިޔަވައިދޭ ތިން ކްލާސްރޫމުގެ އިތުރުން ސްކޫލުގެ ގުދަންވެސް ހުރި އިމާރާތެވެ.
މި ހާދިސާ ހިނގި އިރު ގުދަނުގައި ގިނަ އަދަދެއްގެ ފޮތާއި، އައު ގޮނޑި އަދި މޭޒުފަދަ ތަކެތިވެސް ހުރި ކަމަށް އިގުބާލް މައުލޫމާތު ދެއްވިއެވެ. އަދި, އެ އިމާރާތުގެ ތެރޭގައި އަގުބޮޑެތި ޓީވީ ފަދަ އާލާތްތައް ވެސް ހުންނާނެ ކަމަށް އޭނާ ވިދާޅުވި އެވެ. މި ހާދިސާގައި ލިބުނު ގެއްލުން އަދި އަންދާޒާކޮށްލަން ނޭނގުނު ނަމަވެސް ފޫނުބެދޭ ވަރުގެ ގެއްލުމެއް ލިބުނު ކަމަށް އޭނާ ވިދާޅުވި އެވެ.
ފިޔޯރީ ސްކޫލަކީ އެއް ދަންފަޅިއަށް ކިޔަވައިދޭ ސްކޫލެއް ނަމަވެސް މި ހާދިސާ އާއި ގުޅިގެން މާދަމާއިން ފެށިގެން ދެ ދަންފަޅިއަކަށް ބަހާލައިގެން ކިޔަވައިދިނުމުގެ މަސައްކަތް ކުރަމުން ދާކަމަށް އިގުބާލް ވިދާޅުވި އެވެ.
.
