މިދިޔަ ތިން އަހަރު ދުވަހުގެ ތެރޭގައި އެމްޓީސީސީން 130 އަށްވުރެ ގިން ޕްރޮޖެކްޓް ނިންމާފައިވާނެ ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެ އެވެ.
ރ. އަލިފުށީ އެއާޕޯޓު ބިންގާ އެޅުމުގެ ރަސްމިއްޔާތުގައި ވާހަކަ ދައްކަވަމުން އާޒިމް ވިދާޅުވީ، މި ސަރުކާރުން އެމްޓީސީސީއާ ހަވާލުކޮށްފައިވާ ބޮޑު ޕްރޮޖެކްޓަކީ އެ އަތޮޅުގެ އެއާޕޯޓް އެޅުމުގެ މަޝްރޫއާއި ބިން ހިއްކުމުގެ މަޝްރޫއު ކަމަށެވެ.
"މިއީ ސަރުކާރުން އަޅުގަނޑުމެންނަށް ކުރާ އިތުބާރު. ދިވެހި ކުންފުނިތަކަށް ކުރާ އިތުބާރު ބޮޑުވެގެން މިދިޔައީ، ހަމަ ގައިމުވެސް ރައީސުލްޖުމްހޫރިއްޔާގެ ވިސްނުންފުޅާއި އެއްގޮތަށް. އަޅުގަނޑުމެން، [އެމްޓީސީސީ] އިން މިދިޔަ ތިން އަހަރު ނިންމައިފިން 130 އަށްވުރެ ގިނަ ޕްރޮޖެކްޓް. އެންމެ ދަތިވެގެން ދިޔައިރު އަޅުގަނޑުމެން މަސައްކަތް ކުރަމުން ކުރަމުން ގޮސް ނިންމާފަ މިހިރީ. އަޅުގަނޑުމެން ގަބޫލުކުރަނީ ދަތިވުމަކީ ކަންތައްތައް ހުއްޓާލަން ޖެހޭ ކަމެއް ނޫނޭ." އާޒިމް ވިދާޅުވި އެވެ.
އާޒިމް ވިދާޅުވީ، އަލިފުށީ ބިން ހިއްކުމުގެ މަސައްކަތް އެ ކުންފުންޏާ ހަވާލުކުރިތާ ދޮޅު އަހަރު ދުވަސް ތެރޭގައި ނިންމާފައިވާ ކަމަށެވެ.
"އަޅުގަނޑުގެ ތަޖުރިބާގައި މިވަރުގެ ބިމެއް ހިއްކެނީ އަށް އަހަރުން. އެކަމަކު މިތަން [ބިން] އަޅުގަނޑުމެން ހިއްކައިފިން ދޮޅު އަހަރުގެ ތެރޭގައި. މިއީ ދިވެހި ރާއްޖޭގެ ރައީސުލްޖުމްހޫރިއްޔާ ކަންތައްތައް ކޮށްދޭން ބޭނުންވާ ގޮތް. ބާރު ސްޕީޑުގައި ތަރައްގީ ގެނެސްދެމުން މިދަނީ." އާޒިމް ވިދާޅުވި އެވެ.
އަލިފުށީ އެއާޕޯޓުގެ މަސައްކަތް މިހާރު ކުރަމުންދާއިރު، އެންމެ ބޮޑު މަސައްކަތެއްގެ ގޮތުގައި އާޒިމް ފާހަގަކުރެއްވީ ޓާމިނަލްގެ މަސައްކަތެވެ. އަދި ޓާމިނަލަށް ބޭނުންވާ 17 ހެކްޓަރުގެ ބިން މިހާރު ހިއްކާފައިވާ ކަމަށްވެސް އާޒިމް ވިދާޅުވި އެވެ. އަދި އެއާޕޯޓް ރަންވޭއަށް ބޭނުންވާ ބިން ހިއްކުމުގެ މަސައްކަތް ކުރަމުން އަންނަ ކަމަށް ވެސް އާޒިމް ވިދާޅުވި އެވެ. އާޒިމް ވިދާޅުވީ، މި އަހަރު ތެރޭގައި އަލިފުއްޓަށް ފްލައިޓް ޖެއްސޭނެ ކަމުގެ އުންމީދު އެބައޮތް ކަމަށެވެ.
