އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ރައީސް އިބްރާހީމް މުހައްމަދު ސޯލިހް އެ ޕާޓީގެ ހަރުގެ ތެރޭގަ އެވެ. ރައީސް ސޯލިހު ވާހަކަ ވެސް ދައްކަވަމުން ގެންދެވި ދަނޑިވަޅެވެ. އެމްޑީޕީގެ ހަރުގެ ކުރިމައްޗަށް އޮތް އާޓިފިޝަލް ބީޗު ފުރާލައި، އެއްވެ ތިބީ އިދިކޮޅު ޕީޕީއެމް/ޕީއެންސީގެ ސަޕޯޓަރުންނެވެ.
ގައުމީ ދިދަ ހިފައިގެން ތިބި އިދިކޮޅު ކޯލިޝަންގެ ސަޕޯޓަރުން އެ ސަރަހައްދަށް އެއްވިއިރު، އެ ކޯލިޝަންގެ ސަޕޯޓަރުންގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން ހުންނެވީ 11 އަހަރުގެ ހުކުމެއް ތަންފީޒު ކުރެއްވުމަށް، މާފުށީ ޖަލުގަ އެވެ. އެއީ، ޔާމީން މިނިވަން ކުރުމަށް ގޮވާލައި ހަރަކާތެކެވެ.
ރައީސް ސޯލިހު ވާހަކަ ދައްކަވަމުން ގެންދެވި ދަނޑިވަޅުގައި އާޓިފިޝަލް ބީޗު ސަރަހައްދުގައި ޕީޕީއެމްގެ ޕޯޑިއަމްގައި ވާހަކަ ދައްކަވަމުން ގެންދެވީ ޕީއެންސީގެ ރައީސް އަބްދުލްރަހީމް އަބްދުﷲ އެވެ. އޭނާ ގެންދެވީ އެ ވަގުތުކޮޅުގައި ރައީސް ސޯލިހަށް ވަރަށް ބޮޑަށް ފާޑުވިދާޅުވަމުންނެވެ.
"ތިޔައީ ތަންދޮރު ނުދަންނަ، ހިޔާނާތްތެރި، ޣައްދާރު، ވެރިކަމަށް ނާގާބީލް ބޭފުޅެކޭ، މިއީ ދިވެހިން [ރައީސް] ސޯލިހުއާ މެދު ދެކޭ ގޮތަކީ، ދެވަނަ ދައުރަކަށް ވޯޓު ދޭން އެހިޔަސް ރައްޔިތުން ވޯޓެއް ނުދޭނެޔޭ،" ރައީސް ސޯލިހު އެ ވާހަކަތައް އަޑު އެއްސެވުމަށް ތަކުރާރުކޮށް ގޮވަމުން އަބްދުލްރަހީމް ވިދާޅުވި އެވެ.
ދެހާސްއަށާރަވަނަ އަހަރުގެ ރިޔާސީ އިންތިހާބުގައި ވެވަޑައިގެންނެވި ބައެއް ވައުދުތައް ނުފުއްދޭ ކަން އަބްދުލްރަހީމް ހަނދުމަކޮށްދެއްވި އެވެ. މާލެ ސަރަހައްދުގައި ފްލެޓެއް ނޭޅެ އެވެ. އުފަންވާ ކުއްޖަކަށް ހަދިޔާ ފޮއްޓެއް ނުލިބެ އެވެ. ޖުޑީޝަރީ އިސްލާހުގެ މަސައްކަތެއް ނުހިނގަ އެވެ.
އާޓިފިޝަލް ބީޗު ސަރަހައްދުގައި ޕީޕީއެމްގެ ސަޕޯޓަރުން - ފޮޓޯ: އަބްދުﷲ އިޔާން / އަދަދު
އޭގެ އިތުރަށް ކޮވިޑް-19 ގެ ބަލިމަޑުކަމުގެ ހާލަތުގެ ތެރޭގައި، ވެންޓިލޭޓަރުތައް ހިޔާނާތް ހިނގައި ދިޔުމާއި، ދިވެހި ދައުލަތުގެ މިނިވަން ކަމަށް އަސަރުކުރާ ވަރަށް އިންޑިއާގެ ނުފޫޒު ގަދަވާން ދޫކޮށްލާފައި އޮތުމުން ދިވެހި ރައްޔިތުންގެ ތާއީދު ގެއްލިފައިވާ ކަމަށް އަބްދުލްރަހީމް ވިދާޅުވި އެވެ.
"ރައީސް ސޯލިހަކަށް ނެތޭ ތާއީދެއް، ޕާޓީގެ ތެރެއިން ވެސް ނެތޭ ތާއީދެއް، ލަދު ހަޔާތުގެ ކަންފުޅެއް ކިރިޔާ ހުއްޓަސް ދެވަނަ ދައުރެއް ތިމަންނައަށް ދޭށޭ ބުނާކަށް ނާންނާނޭ، ވޯޓު ކަރުދާހުން، ސޯލިހުގެ ނަން ނަގަން ގޮވާލަން،" އަބްދުލްރަހީމް ވިދާޅުވި އެވެ.
އިދިކޮޅު ސަޕޯޓަރުން އާޓިފިޝަލް ބީޗު ސަރަހައްދަށް ޖަމާވެ - ފޮޓޯ: އަބްދުﷲ އިޔާން / އަދަދު
އިދިކޮޅު ލީޑަރު ޔާމީން ޖަލަށް ލާފައި ބަންދުކޮށްފައި ހުއްޓަސް "މި ސަރުކާރު ކުރިމަތީ ކުޑަކަކޫ ނުޖައްސަވާނެ" ކަމުގެ ޔަގީންކަން އެބަ އޮތް ކަމަށް އަބްދުލްރަހީމް ވިދާޅުވި އެވެ. އަދި އިދިކޮޅު ލަޝްކަރު ވެސް އެ ސާބިތުކަމާއެކު ތިބުމަށް ގޮވާލެއްވި އެވެ.
ހުޅުމާލޭގެ ކައުންސިލަރު އިބްރާހީމް ޝުޖާއު، ރައްޔިތުންގެ މަޖިލީހުގެ ކުރީގެ މެންބަރު އަބްދުލްލަތީފް، މަޖިލީހުގެ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް ފަދަ ލީޑާޝިޕްގެ ބޭފުޅުން ވެސް ވާހަކަ ދެއްކެވި އެވެ. އެ ބޭފުޅުން ވެސް ރައީސް ސޯލިހަށް ފާޑުވިދާޅުވި އެވެ.
