ރޭޕް އާއި ހިޔުމަން ޓްރެފިކިންގެ ތުހުމަތުގައި ސޯޝަލް މީޑިއާ އިންފްލުއެންސަރު އެންޑްރޫ ޓޭޓް ރޮމޭނިއާގައި ހައްޔަރުކޮށްފި އެވެ.
އެންޑްރޫ ޓޭޓްގެ އިތުރުން އޭނާގެ ބޭބެ ޓްރިސްޓަން ހައްޔަރުކުރީ ރޮމޭނިއާގައި އެ މީހުން ދިރިއުޅޭ ގެ ބަލައި ފާސްކުރުމަށް ހިންގި އޮޕަރޭޝަނެއްގެ ތެރެއިންނެވެ.
ކުރިން ކިކްބޮކްސަރެއްގެ ގޮތުގައި އުޅުނު އެންޑްރޫ ޓޭޓް މަގްބޫލުވީ 2016 ވަނަ އަހަރު އިނގިރޭސި ޓީވީ ޝޯ ބިގް ބްރަދާއިން ވަކިކުރި ހިސާބުންނެވެ.
އެ ޝޯއިން އޭނާ ވަކިކުރީ އަންހެނަކަށް ހަމަލާ ދޭ ވީޑިއޯއެއް އާއްމުވުމުންނެވެ. ޖިންސީ އަނިޔާގެ ޒިންމާ އަންހެނުން އުފުލަން ޖެހޭނެ ކަމަށް ބުނުމުން، ޓްވިޓާއިން ވެސް އޭނާ ސަސްޕެންޑްކުރި އެވެ.
އެކަމަކު ބިލިއަނަރު އެލޮން މަސްކް ޓްވިޓާއާ ހަވާލުވި ފަހުން އޭނާގެ އެކައުންޓު އަލުން އަނބުރާ ދިނެވެ.
ރޮމޭނިއާގެ ފުލުހުން ބުނީ 30 ދުވަސް ވަންދެން އެންޑްރޫ ޓޭޓް ބަންދުކޮށްފައި ބެހެއްޓުމަށް އެދިފައި ވާނެ ކަމަށެވެ. އެކަމާ މެދު ގޮތް ނިންމާނީ ކޯޓުންނެވެ.
ފުލުހުން ބުނީ އިނގިރޭސިވިލާތަށް ނިސްބަތްވާ އެންޑްރޫ އާއި ޓްރިސްޓަންގެ އިތުރުން ރޮމޭނިއާގެ ދެ މީހުންނަށް ތުހުމަތު ކުރެވޭތީ، އެ މީހުންގެ މައްސަލަ މިދިޔަ އެޕްރީލް މަހުން ފެށިގެން ތަހުގީގު ކުރަމުން ދިޔަ ކަމަށެވެ.
"ތުހުމަތު ކުރެވޭ ހަތަރު މީހުން ރާވައިގެން ކުށް ކުރާ ގްރޫޕެއް ހަދައިގެން އުޅޭ ކަމަށް ބެލެވޭ. އެ ގްރޫޕުގެ ބޭނުމަކީ އަންހެނުން ރެކްރޫޓުކޮށް، އެ މީހުން ގެތަކުގައި ބައިތިއްބައިގެން، މަޖުބޫރުން އޮރިޔާން ކާޑު އުފައްދައި، ހާއްސަ ވެބްސައިޓުތަކުގައި ފައިސާ ދީގެން އެ ވީޑިއޯތައް ބެލޭނެ ގޮތް ހެދުން،" ރޮމޭނިއާ ފުލުހުން ބުންޏެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަނީ އެންޑްރޫ ޓޭޓް އާއި ޓްރިސްޓަން ދިރިއުޅޭ ލަގްޒަރީ ވިލާއިން ނެރިގެން ގެންދާ މަންޒަރެވެ.
