ކުރިއަށް މިއޮތް އާ އަހަރު ފެށުން ފާހަގަކުރަން ހަވާ އެރުވުމަށް ނިންމައިފި އެވެ.
މިނިސްޓްރީ އޮފް ޔޫތް ސްޕޯޓްސް އެންޑް ކޮޮމިއުނިޓީ އެމްޕަވާމެންޓުން ކުރި ޓްވީޓަކާ އެކު އާންމުކޮށްފައިވާ ވީޑިއޯއެއްގައި ވަނީ އާ އަހަރު ފެށުން ފާހަގަކުރުމަށް ހުޅުމާލޭގައި ޝޯއެއް ބޭއްވުމަށް ނިންމާފައިވާކަން ހާމަކޮށްފަ އެވެ. އެ ޝޯ އޮންނާނީ މިމަހުގެ 31 ވަނަ ދުވަހުގެ ރޭ 8:30 އިން ފެށިގެން ހުޅުމާލޭ ސިންތެޓިކް ޓްރެކުގަ އެވެ.
މި ޝޯގައި ހަވާ އެރުވުމާއި މިއުޒިކުގެ އެކި ހަރަކާތްތައް ފެނިގެން ދާނެ އެވެ. ޔޫތް މިނިސްޓްރީން ބުނީ މި ޝޯގައި ބޮލީވުޑްގެ މަޝްހޫރު ލަވަކިއުންތެރިޔާ ޕައުނީ ޕާންޑޭގެ ހުށަހެޅުންތައް ފެނިގެންދާނެ ކަމަށެވެ.
މީގެ އިތުރުން "ހަބޭސް ބޮޑުބެރު"ގްރޫޕްގެ ހުށަހެޅުންތަކެއް ވެސް މި ޝޯގެ ތެރެއިން ފެންނާނެ އެވެ.
އާ އަހަރު ފާހަގަކުރުމަށް މީގެ ކުރިން ވެސް މާލެ ސަހަރަހައްދުގައި ހަވާއެރުވުމުގެ ހަރަކާތްތަކާއި، ބޭރު ފަންނާނުން އަދި ރާއްޖޭގެ މިއުޒިކް ގްރޫޕްތަކުގެ ހުށަހެޅުންތައް ހިމަނައިގެން އެކި ހަފްލާތައް ބޭއްވި އެވެ. ނަމަވެސް ކޮވިޑް-19އާ އެކު މި ކަންކަމަށް ހުއްޓުމެއް އައުމާއެކު މިދިޔަ ދެ އަހަރު އާ އަހަރު ފާހަގަކުރުމުގެ ހަފްލާތައް މަޑުޖައްސާލި އެވެ.
