އަންނަ މަހުގެ އެއްވަނަ ދުވަހުން ފެށިގެން ވެހިކަލްތަކުގެ އަހަރީ ފީ އާއި ޖޫރިމަނާ ފީ ބަލައިގަންނާނީ އެ ވެހިކަލެއް ނިސްބަތްވާ ރަށެއްގެ ކައުންސިލަކުން ކަމަށް މޯލްޑިވްސް އިންލެންޑް އޮތޯރިޓީ (މީރާ) އިން ބުނެފި އެވެ.
މީރާއިން ނެރުނު އިއުލާނެއްގައި ބުނީ އެގޮތަށް ނިންމާފައިވަނީ އެއްގަމު އުޅަނދާއި ކަނޑު އުޅަނދުގެ އަހަރީ ފީ ބަލައިގަންނާނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ތައްޔާރުކޮށްފައިވާ ސިސްޓަމް މެދުވެރިކޮށް އެ ވެހިކަލެއް ނިސްބަތްވާ ރަށުގެ ކައުންސިލަކަށް ކަމުގައި ފިނޭންސް މިނިސްޓްރީގެ މާލިއްޔަތު ސާކިއުލާ އިން ދަންނަވާފައިވާތީ ކަމަށެވެ.
އެހެންކަމުން އެއްގަމު އުޅަނދާއި، ކަނޑު އުޅަނދުފަހަރުގެ ފީ ސިުންގަޑިއަށް ނުދެއްކުމުންވާ ޖޫރިމަނާގެ އިތުރުން ޕާކިން ޓްރެފިކް ވަޔަލޭޝަނާ ގުޅިގެން ކުރާ ޖޫރިމަނާ މީރާއިން ބަލައި ނުގަންނާނެ އެވެ. މީގެ ކުރިން މި ފީތައް މީރާގެ އޮންލައިން ޕްލެޓް ފޯމް "ވާރުޕޭ" މެދުވެރިކޮށް އޮންލައިންކޮށް ދެއްކެ އެވެ.
މި ސިޔާސަތުގެ ދަށުން ދެން ވެހިކަލްތަކުގެ އަހަރީ ފީ ބަލައިގަންނަނާނީ ކައުންސިލްތަކުންނެވެ.
