މާލެސިޓީގެ އާންމު ތަންތަން ސާފުކުރުމުގެ މަސައްކަތް ސިޓީ ކައުންސިލުން ފެށި އިރު އަދި އެކަމަށް ބޭނުންވާ އުޅަނދުތައް ނުލިބޭތީ އުޅަނދުތަކެއް ކުއްޔަށް ނަގާފައިވާކަން އެނގިއްޖެ އެވެ.
މާލެ/ވިލިމާލޭގެ އާންމު ތަންތަނުން ކުނިނެގުމާއި ސާފުކުރުމަށް ވެމްކޯއާއެކު ސިޓީ ކައުންސިލުން 2016 ވަނަ އަހަރު ވެފައިވާ އެއްބަސްވުން ނިމުމަކަށް ގެނެސް އެ މަސައްކަތް ސިޓީ ކައުންސިލުން ކުރިއަށް ގެންދިއުމަށް ވަނީ ނިންމާފަ އެވެ.
ސިޓީ ކައުންސިލުން މި މަސައްކަތް ކުރުމަށް ވެމްކޯއާއެކު ވެފައިވާ އެއްބަސްވުން ނިމުމަކަށް ގެންނަން ނިންމި އެންމެ ބޮޑު އެއް ސަބަބަކީ ވެސް ވެމްކޯއިން ގެންގުޅެމުން އަންނަނީ ކުއްޔަށް ނަގާފައިވާ އުޅަނދުތަކެއް ކަމުން އެކަމަށްދާ ހޭދަ އިންތިހާއަށް ބޮޑުވުމެވެ.
މިމަހުގެ ކުރީކޮޅު ބޭއްވި ޖަލްސާއެއްގައި ސިޓީ ކައުންސިލުން ބުނީ ކުނި ނެގުމަށް ބޭނުންވާ އުޅަނދުތައް ބޭރުގެ ހިލޭ އެހީގައި ހޯދާނެ ކަމަށެވެ. އެ ކައުންސިލުގެ އޮފިޝަލަކު މިއަދު "އަދަދު"އަށް ބުނީ އަދިވެސް ވެހިކަލްތައް ނުގެނެވޭ ކަމަށާއި، ވެހިކަލްތައް ރާއްޖެ ގެނައުމަށް ތިން މަހާއި، ހަ މަހާއި ދެމެެދުގެ މުއްދަތެއް ނަގާނެ ކަމަށެވެ.
ވެހިކަލްތައް ނުލިބޭތީ ސިޓީ ކައުންސިލުން ވަނީ މިވަގުތަށް 10 ވެހިކަލެއް ކުއްޔަށް ނަގާފައިކަމަށް ވެސް އޭނާ ބުންޏެވެ.
"ވެހިކަލްތައް ނާންނާތީ އަޅުގަނޑުމެން ގާތްގަނޑަކަށް 10 ވެހިކަލް މިއުޅެނީ ހަޔަރކޮށްގެން. ތްރީ ޓު ސިކްސް މަންތްސް ތެރޭގައި އަޅުގަނޑުމެންނަށްް ވެހިކަލްތައް ލިބޭނީ،" އޭނާ ބުންޏެވެ.
ވެމްކޯއާއެކު މާލެ ސިޓީގެ އާންމު ތަންތަން ސާފުކުރުމަށް ވެފައިވާ އެއްބަސްވުމުގެ މުއްދަތު އިއްޔެއަށް ހަމަވެފައިވާއިރު، މިއަދު މެންދުރު ފަހު 15:30 އިން ފެށިގެން މާލެ ސިޓީ ކައުންސިލުގެ މުވައްޒަފުން މާލެ އަދި ވިލިމާލޭގެ އާންމު ތަންތަން ސާފުކުރުމުގެ މަސައްކަތް ފަށާނެ އެވެ.
މި މަސައްކަތަށް ބޭނުންވާ މުވައްޒަފުންގެ 90 އިންސައްތަ މިހާރު ހަމަވެފައިވާ ކަމަށް ސިޓީ ކައުންސިލުން ވާހަކަ ދެއްކެވި އޮފިޝަލު ވިދާޅުވި އެވެ. މި މަސައްކަތަށް 100 މުވައްޒަފުން މިހާރު ވަނީ ހަމަޖައްސާފަ އެވެ. އޭގެ ތެރޭގައި 80 ކުނިކަހާ މީހުންނާއި، 16 ސުޕަވައިޒަރުން އަދި ހަތަރު ސީނިއާ ސުޕަވައިޒަރުން ހިމެނެ އެވެ.
ސިޓީ ކައުންސިލުން އަންދާޒާކޮށްފައި ވާގޮތުގައި ކުނި ނެގުމުގެ މަސައްކަތް އެ ކައުންސިލުން ކުރަން ފެށުމާއެކު މިހާރު އެކަމަށް ވެމްކޯއިން ހޭދަކުރަމުން އަންނަ އަގުގެ ދެބައިކުޅައެއްބަޔަށްވުރެ ބޮޑު ހަރަދެއް ސަލާމަތް ވާނެ އެވެ. ކައުންސިލުން މި މަސައްކަތް ކުރެވޭނެ ކަމަށް ލަފާކުރީ 2.2 މިލިއަން ރުފިޔާއަށެވެ. ވެމްކޯއިން މިދިޔަ އަހަރު ވެސް 4.7 މިލިއަންް ރުފިޔާގެ ބިލެއް ފޮނުވި ކަމަށް ކައުންސިލުން ވަނީ ހާމަކޮށްފަ އެވެ.
ކުނި ނަގައި އުކާލުމަށް ވެމްކޯއިން މިހާރު މާލޭގައި 150 މުވައްޒަފުން އަދި ވިލިމާލޭގައި 30 މުވައްޒަފުން ގެންގުޅޭ އިރު، އެ މުވައްޒަފުންގެ ތެރެއިން ސިޓީ ކައުންސިލަށް ބަދަލުވާން ބޭނުންވާ ފަރާތްތަކަށް ފުރުސަތު ލިބޭނެ ކަމަށް ވެސް އެ ކައުންސިލުން މީގެ ކުރިން ބުނެފައި ވެއެވެ.
