ދަނޑުވެރިކަމުގެ ބޭނުމަށް ރާއްޖެއަށް އެތެރެކުރި ތަފާތު އެކި ވައްތަރުގެ ކެމިކަލްގެ އަދަދު އިންތިހާއަށް އިތުރުވެފައިވާ ކަމަށް ތިމާވެއްޓާ ބެހޭ މިނިސްޓްރީގެ ބޭސްލައިން ކެމިކަލް އެސެސްމެންޓް ރިޕޯޓުން ދައްކައިފި އެވެ.
ތިމާވެއްޓާ ބެހޭ މިނިސްޓްރީން ބުނީ ބޭސްލައިން ކެމިކަލް ދިރާސާ ރިޕޯޓަކީ 2016 ވަނަ އަހަރު މި މިނިސްޓްރީން ތައްޔާރުކުރި ކެމިކަލް ޕްރޮފައިލްގެ މައުލޫމާތު އަދާހަމަކޮށް، 2017 ވަނަ އަހަރުން ފެށިގެން 2021 ވަނަ އަހަރަށް ދިވެހިރާއްޖެއަށް އެތެރެކުރި އަދި އެކި ސިނާއައްތަކުގައި ބޭނުންކުރި ކެމިކަލްގެ ބާވަތްތަކާއި، ތަފާތު ބާވަތްތަކުގެ ކެމިކަލް މާއްދާ ބޭނުންކޮށްފައިވާ އުފެއްދުންތައް ބޭނުންކުރިގޮތް ދަނެގަތުމަށް ކުރިއަށްގެންދިޔަ ދިރާސާގެ ރިޕޯޓު ކަމަށެވެ.
ރިޕޯޓުގެ ބައެއް މައުލޫމާތު މިނިސްޓްރީން ހާމަކޮށްފައިވާއިރު، ރިޕޯޓުގައިވާ ގޮތުގައި އެ މުއްދަތުގެ ތެރޭގައި ރާއްޖެއަށް އެތެރެކުރި ކެމިކަލް މާއްދާތަކާއި އުފެއްދުންތައް ވަނީ އަހަރަކަށްވުރެ އަހަރެއް އިތުރުވެފަ އެވެ.
"2021 ވަނަ އަހަރު ރާއްޖެއަށް 10 ބިލިއަން ރުފިޔާގެ ކެމިކަލް އެތެރެކޮށްފައިވެ އެވެ. މީގެތެރެއިން 7 ބިލިއަން ރުފިޔާ ހިއްސާކުރަނީ ހަކަތަ އުފެއްދުމަށް އެތެރެކުރި ތެލަށް،" މިނިސްޓްރީން ބުނެފައިވެ އެވެ.
ކޮވިޑްގެ ބަލިމަޑުކަމާ ގުޅިގެން 2020 ވަނަ އަހަރުކެމިކަލް މާއްދާތައް އެތެރެކުރި މިންވަރު މަދުވި ނަމަވެސް އެ އަހަރު ރާއްޖެއަށް އެތެރެކުރި ޖަރާސީމު މެރުމަށް ބޭނުންކުރާ ޑިސްއެންފެކްޓަންޓާއި ބޭހުގެ ބާވަތްތައް އަދި ގަސްކާނާގެ މިންވަރު އިތުރު ކަމަށް ރިޕޯޓުން ދައްކަ އެވެ.
ރިޕޯޓުގެ އިތުރު ހޯދުންތަކުގައިވާ ގޮތުން 'އިންޓަނޭޝަނަލް އެޖެންސީ ފޯރ ރިސާޗް އިން ކެންސާ' ގެ ފަރާތުން ކެންސަރަށް މަގުފަހިވާ ކަމަށް ކަނޑައަޅާފައިވާ 14 ވައްތަރެއްގެ ޕެސްޓިސައިޑް 2021 ވަނަ އަހަރު އެތެރެކޮށްފައިވެ އެވެ.
އޭގެ އިތުރުން، ސޫފާސޫފި މެރުމަށް ބޭނުން ކުރާ އިންސެކްޓިސައިޑް އިތުރުކުރި މިންވަރު 2017 ވަނަ އަހަރާ އަޅާ ބަލާއިރު 462 ޕަސެންޓު ވަނީ އިތުރުވެފަ އެވެ.
ކެންސަރަށް ފަހިވާ ކެމިކަލްތައް ކަމަށްވާ އެސްބެސްޓޯސް އަދި އޮޑިދޯނި ފަހަރު ބަނުމާ ބޭނުން ކުރާ ސްޓައިރީން ރާއްޖެ އިތުރުކުރި މިންވަރު ވެސް އިތުރުވެފައިވާ ކަމަށް ރިޕޯޓުގައިވެ އެވެ.
"މި މާއްދާތައް ބޭނުންކުރާ ސިނާއައްތަކުގައި މަސައްކަތްކުރާ ފަރާތްތަކާއި މިފަދަ ކުނިނައްތާލުމުގައި ހަރަކާތްތެރިވާ ފަރާތްތަކުގެ ސިއްހަތަށް މިމާއްދާތަކުން ނޭދެވޭ އަސަރުކުރުވާ، ވީމާ، މަސައްކަތުގެ މާހައުލުގައި އުޅުއްވާ ފަރާތްތަކުން ރައްކާތެރިކަމަށް ސަމާލުކަންދިނުން ވަރަށް މުހިއްމު،" މިނިސްޓްރީން ބުނެފައިވެ އެވެ.
ތިމާވެއްޓާ ބެގޭ މިނިސްޓްރީން ބުނީ ރިޕޯޓުން ފާހަގަވި ކަންކަމަށް ބިނާކޮށް، ރާއްޖޭގެ ނާޒުކު ތިމާވެއްޓަށާއި އިންސާނުންގެ ސިއްހަތަށް ކުނިބުންޏާއި ކެމިކަލް ގެ ސަބަބުން ކުރިމަތިވާ ނޭދެވޭ އަސަރުތަކަށް ހައްލުހޯދައި ދިނުމަށް ސަރުކާރުން ސިޔާސަތު ކަނޑައެޅުމަށް ބޭނުންވާ މައުލޫމާތު ލިބޭނެ އެވެ.
