ކުރީގެ ރައީސް އަބްދުﷲ ޔާމީން 11 އަހަރަށް ޖަލަށްލުމަށް އިއްޔެ ކްރިމިނަލް ކޯޓުން ކުރި ހުކުމުގެ ރިޕޯޓު ދޫކުރުން ލަސްވެގެން އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ އިސްވެރިން މިއަދު ކޯޓު ވަޑައިގަނެފި އެވެ.
ޔާމީންގެ މައްޗަށް ކްރިމިނަލް ކޯޓުން ހިންގި ޝަރީއަތް ނިމުނު ގޮތުގެ ރިޕޯޓު ހޯދުމަށް މިއަދު ޔާމީންގެ ދިފާއީ ވަކީލުންނާއެކު ޕީޕީއެމްގެ ޑެޕިއުޓީ ލީޑަރު އަބްދުއްރަހީމް އަބްދުﷲ ވަޑައިގެންނެވި އެވެ. އޭނާއާއެކު ރައްޔިތުންގެ މަޖިލީހުގެ ބައެއް މެމްބަރުންނާއި މާލޭ މޭޔަރު ޑރ. މުހައްމަދު މުއިއްޒު ވެސް ވަޑައިގަތެވެ.
ސުޕްރީމް ކޯޓުގެ ޕްރެކްޓިސް ޑައިރެކްޝަންގައި ބުނާ ގޮތުން ކޮންމެ ކޯޓަކުން ވެސް ޝަރީއަތް ނިންމައި ހުކުމް ކުރާ ދުވަހު "ޝަރީއަތް ނިމުނު ގޮތް" މައްސަލަ ބެލި ފަނޑިޔާރުންގެ ސޮޔާއެކު އެ މައްސަލާގައި ހިމެނޭ ކޮންމެ ފަރާތަކާވެސް ހަވާލުކުރަން ވާނެ އެވެ.
މަނީ ލޯންޑަރިން އަދި ރިޝްވަތު ގަބޫލު ކުރުމުގެ ދައުވާ ސާބިތުވެ ޔާމީން ޖަލަށްލުމަށް ހުކުމް ކުރުމާއެކު ޕީޕީއެމުން ވަނީ ރޭ މާލޭގެ މަގުތަކަށް ނިކުމެ މުޒާހަރާކޮށްފަ އެވެ. ބާރުގެ ބޭނުންކޮށްގެން ފުލުހުން މުޒާހަރާ ރޫޅާލީ އެއްވި މީހުންގެ ތެރެއިން 16 މީހުން ހައްޔަރު ކުރުމަށްފަހެވެ. ނަމަވެސް އެ އެންމެން ވެސް މިހާރު ދޫކޮށްލައިފި އެވެ.
ޔާމީންގެ މައްޗަށް ޖަލު ހުކުމް އިއްވުމުން ޕީޕީއެމުން ބުނެފައި ވަނީ އެމަނިކުފާނުގެ މައްޗަށް އިއްވީ ސިޔާސީ ހުކުމެއް ކަމަށެވެ. އެ މައްސަލައިގައި އިންސާފާއެކު ދިފާއުވުމުގެ ފުރުސަތު ވެސް ޔާމީނަށް ލިބިވަޑައިނުގަތް ކަމަށް ޕީޕީއެމުން ބުނެ އެވެ.
