ސަން ސިޔާމް ނެޓު (އެސްއެސްނެޓް) އިން މުޅި ރާއްޖެއަށް ކޭބަލް ޓީވީގެ ހިދުމަތް ދިނުމަށް ތައްޔާރުވަމުން އަންނަ ކަމަށް އެ ކުންފުނިން ބުނެފި އެވެ.
އެ ކުންފުނިން މިއަދު ނެރުނު ބަޔާނެއްގައި ބުނީ އެސްއެސްނެޓުގެ ކޭބަލް ޓީވީ ހިދުމަތުގެ ދަށުން ދިވެހިންނަށް މިހާރު ފެންނަ ޗެނަލްތަކުގެ އިތުރުން މުޅިން އާ ޗެނަލްތަކެއް ވެސް ފެނިގެންދާނެ ކަމަށެވެ. އަދި އެ ކުންފުނިން ދޭ ހިދުމަތުގެ އަގުތައް ވަރަށް އަވަހަށް އިއުލާން ކުރާނެ ކަމަށާއި ޕެކޭޖުތަކުގެ އަގުތައް ހެޔޮވާނެ ކަމަށް ވަނީ ބުނެފަ އެވެ.
މީގެ އިތުރުން އެސްއެސްނެޓުގެ ހިދުމަތައް އެދުމުގެ ފުރުސަތު ވެސް ވަރަށް އަވަހަށް ހުޅުވާލާނެ ކަމަށް އެ ކުންފުނިން ބުންޏެވެ. އަދި މިހާރު ދިރާގު ޓީވީ ބޭނުންކުރާ ފަރާތްތަކައް ފަސޭހަކަމާ އެކު އެސްއެސްނެޓަށް ބަދަލުވުމުގެ މަގުފަހިކޮށްދޭނެ ކަމަށް ވެސް ބުންޏެވެ.
ދިރާގު ޓީވީގެ ލައިސެންސް އާކޮށް ނުދިނުމަށް ނިންމައި ރާއްޖޭގައި ރީބްރޯޑްކާސްޓު ކުރުމުގެ ހުއްދަ ދިރާގަށް ނުދެވޭނެ ކަމަށް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން ކަނޑައެޅުމާ ގުޅިގެން އެ ހިދުމަތް ސަންސިޔާމް ނެޓު ދިނުމަށް ދިރާގުގެ ބޯޑުން ވަނީ ނިންމާފަ އެވެ. މި ނިންމުމާ އެކު ޖެނުއަރީ 29 އިން ފެށިގެން ދިރާގު ޓީވީގެ ހިދުމަތް ހުއްޓާލާނެ އެވެ.
ހިދުމަތް ހުއްޓާލާކަން ކަސްޓަމަރުންނަށް އެންގުމަށް ނެރުނު ބަޔާނުގައި ވެސް ދިރާގުން ވަނީ ދެން އެ ހިދުމަތް ދެމުންދާނީ ސަން ސިޔާމް ނެޓުން ކަމަށާއި އެކަމަށް ވާން ޖެހޭ އެއްބަސްވުންތައް މިހާރު ވެފައިވާ ކަމަށް ބުނެފަ އެވެ.
ސަން ސިޔާމް ނެޓަކީ މީދޫ ދާއިރާގެ މެމްބަރު އަދި މޯލްޑިވްސް ޑިމޮކްރަޓިކް އެލަޔަންސް (އެމްޑީއޭ) ގެ ލީޑަރު އަހްމަދު ސިޔާމް މުހައްމަދުގެ ވިޔަފާރިއެކެވެ. ރީބްރޯޑްކާސްޓް ކުރުމުގެ ލައިސެންސް އެ ކުންފުންޏަށް ވަނީ ދީފަ އެވެ.
