ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓު އަބްދުﷲ ޔާމީން އަބްދުލްގައްޔޫމްގެ މައްޗަށް ކުރި 11 އަހަރުގެ ޖަލު ހުކުމާއެކު އެމަނިކުފާނު މިނިވަންކުރުމަށް ގޮވާލާ މާލޭގެ މަގުތަކުގައި ކުރިއަށް ގެންދާ އެއްވުން ރޫޅާލުމުގެ މަސައްކަތް ފުލުހުން ފަށައިފި އެވެ.
އިދިކޮޅު ކޯލިޝަނުގެ އިސްވެރިން އަދި މެންބަރުން ބައިވެރިވާ އެއްވުން މިރޭ ފަށާފައިވަނީ މަޖީދީ މަގާއި ޗާންދަނީ މަގު ހުރަސްވާ ކަންމަތިންނެވެ. އެތަނުގައި ތިބެ އެއްވުމުގެ ބައިވެރިން ދިޔައީ ޔާމީނުގެ މައްޗަށް ކްރިމިނަލް ކޯޓުން ކުރި ހުކުމަކީ 'ހަރާމް' ހުކުމެއް ކަމަށާއި އެ ހުކުން އުވާލާ ޔާމީން މިނިވަން ކުރުމަށް ގޮވާލާފަ އެވެ.
އެއަށްފަހު އެ ސަރަހައްދަން އެސްއޯ ފުލުހުން ގޮސް އެއްވުން ރޫޅާލަން މަސައްކަތް ކުރުމުން އެއްވުމުގެ ބައިވެރިން ވަނީ މަޖީދީ މަގުން އައިސް ރައީސުލްޖުމްހުރިއްޔާ އިބްރާހިމް މުހައްމަދު ސޯލިހު ދިރިއުޅުއްވާ މުލިއާގެއާ ދިމާލަށް ދިއުމަށް މަސައްކަތް ކޮށްފަ އެވެ. ނަމަވެސް ފުލުހުން އެކަމަށް ހުރަސް އެޅުމުން އެއްވުމުގެ ބައިވެރިން ވަނީ އަނބުރާ މަޖީދީ މަގަށް ނުކުމެފަ އެވެ.
މިހާރު އެއްވުމުގެ ބައިވެރިން ތިބީ ފޮރިން މިނިސްޓަރު އަބްދުﷲ ޝާހިދުގެ ގެކޮޅު ކައިރީގަ އެވެ.
މިރޭގެ އެއްވުމުގެ ތެރެއިން މިހާތަނަށް އަށަކަށްވުރެ ގިނަ މީހުން ހައްޔަރުކޮށްފައިވާ ކަމަށް ޕީޕީއެމްއިން ވަނީ ބުނެފަ އެވެ.
ކުރީގެ ރައީސް ޔާމީން މިނިވަންކުރުމަށް ގޮވާލާ ކުރިއަށް ގެންދާ އެއްވުމުގެ ތެރެއިން -- ފޮޓޯ: އަބްދުﷲ އިޔާން / އަދަދު
ކުރީގެ ރައީސް ޔާމީނުގެ މައްޗަށް މިއަދު 11 އަހަރުގެ ޖަލު ހުކުމެއް އިއްވީ އެމަނިކުފާނުގެ މައްޗަށް ކުރެވުނު ރިޝްވަތު ހިފުމާއި މަނީ ލޯންޑަރިންގެ ދައުވާ ސާބިތުވުމުންނެވެ. ނަމަވެސް އިދިކޮޅުން އަދި ޔާމީނުގެ ވަކީލުންވެސް ވަނީ މި ހުކުމް ބަލައިނުގަންނާނެ ކަމަށް ބުނެ މަތީ ކޯޓުގައި މި މައްސަލަ އިސްތިއުނާފުކުރާނެ ކަމަށް ބުނެފަ އެވެ.
ޖަލު ހުކުމާއެކު ޔާމީން މިހާރު ވަނީ ކަރެކްޝަންސްގެ ބެލުމުގެ ދަށުން މާފުށީ ޖަލަށް ގެންގޮސްފަ އެވެ.
