މަނީ ލޯންޑްރިން އަދި ހިޔާނާތުގެ މައްސަލާގައި ކުރީގެ ރައީސް އަބްދުﷲ ޔާމީންގެ މައްޗަށް ހުކުމްކުރުމަށް ކްރިމިނަލް ކޯޓަށް ހާޒިރުކޮށްފައިވާއިރު، އެމަނިކުފާނަށް ތާއިދުކުރާ އިދިކޮޅު ކޯލިޝަނުގެ ބައިވެރިންނާއި އިސްވެރިން އަންނަނީ އެ ސަރަހައްދަށް އެއްވެ މުޒާހަރާ ކުރަމުންނެވެ.
ރައީސް ޔާމީންގެ މައްޗަށް މި ދަނޑިވަޅުގައި ހުކުމެއް ކުރަނީ އަންނަ އަހަރުގެ ރިޔާސީ އިންތިހާބުގައި އެމަނިކުފާނަށް ވާދަކުރެވޭނެ ފުރުސަތު ނުދިނުމަށް ކަމަށް އިދިކޮޅު މުޒާހަރާގެ ބައިވެރިން ތުހުމަތުކުރެ އެވެ.
"ހުކުމް އިއްވާ ފަނޑިޔާރު ހުންނެވީ ރަހީނުކޮށްފައި"
މުޒާހަރާގެ ބައިވެރިން ތުހުމަތުކުރާ ގޮތުގައި މިއަދުގެ ހުކުމަށް ދައުލަތުން އަންނަނީ "އިންތިހާއަށް" ނުފޫޒު ފޯރުވަމުންނެވެ. މިކަމަށް ބާރުދީ އެފަރާތްތަކުން ގޮވާލަމުން އަންނަނީ މިހާރު މީސްމީޑިއާގައި ދައުރުވަމުން އަންނަ ރައީސް ޔާމީންގެ މައްޗަށް ކުރާ ހުކުމުގެ ކޮޕީއެއް ކަމަށް ބުނާ ލިއުމެވެ. މި ޝަރީއަތަށް ދައުލަތުގެ ނުފޫޒެއް ނެތް ނަމަ އެފަދަ ލިއުންތަކެއް ލީކުވާން ޖެހޭ ސަބަބެއް ނޯންނާނެ ކަމަށް އެމީހުން އަންނަނީ ބުނަމުންނެވެ.
އެމީހުން ތުހުމަތުކުރާ ގޮތުގާ ރައީސް ޔާމީންގެ މައްޗަށް ހުކުމް އިއްވާ ފަނޑިޔާރުން ތިއްބެވީ ރަހީނުކޮށްފަ އެވެ. އެއީ ފަނޑިޔާރުންްގެ އެއްވެސް ހިއްސާއެއް އޮންނާނެ ހުކުމެއް ނޫން ކަމަށް އެމީހުން ތުހުމަތުކުރެ އެވެ.
"އޭރުންސުރެ [ރައީސް ޔާމީން ޖަލަށް ލުމަށް ފުރަތަމަ ހުކުމް ކުރި ދުވަހުން ފެށިގެން] އަޅުގަނޑުމެން އައީ މިކަމަށް ނުފޫޒު އޮތް ކަމަށް ބުނަމުން. އަޅުގަނޑުމެން ދައްކާ ވާހަކަ ދިމާވާ އެއް ސަބަބު އެއީ ފަނޑިޔާރުކަމުގައި ތިއްބަވާ ބޭފުޅުން މަގާމުން ވަކިކުރީމަ ދެން އަޅުގަނޑުމެންނާ ދިމާވެގެން ދެކެވޭ ވާހަކަތައް އެއީ" އިދިކޮޅު ޕީއެންސީގެ ނައިބު ރައީސް އަދި މާލެ ސިޓީ ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު ވިދާޅުވި އެވެ.
"އަދިވެސް އުންމީދެއް ކަނޑައެއް ނުލަން، ނަސްރު ދެއްވާނެ"
މި ހުކުމުގައި ނުފޫޒު ބޮޑުވާނެ ކަމަށް ބުނަމުން އައި ނަމަވެސް އިދިކޮޅު މުޒާހަރާގެ ބައިވެރިން ތިބީ އަދިވެސް އުންމީދު ކަނޑާނުލާ ކަމަށް ބުނަަމުންނެވެ.
"އިރާދަކުރެއްވިއްޔާ މިއަދުގެ ހުކުމުންވެސް ސާބިތުވާނެ ރައީސް ޔާމީނަކީ މައުސޫމް ބޭފުޅެއްކަން. އެމަނިކުފާނުގެ މައުސޫމްކަން ސާބިތުވާނެ. މާތްﷲ ރައީސް ޔާމީނަށް ނަސްރު ދެއްވާނެ" މުޒާހަރާގެ ބައިވެެރިއަކު ބުންޏެވެ.
އެ ސަރަހައްދުގައި ތިބި ކޯލިޝަނުގެ އިސްވެރިންވެސް ތިބީ މި އަޒުމުގަ އެވެ. ޕީއެންސީގެ ރައީސް އަބްދުއްރަހީމް އަަބްދުﷲ ވިދާޅުވީ، 2023 ވަނަަ އަހަރުގެ އިންތިހާބުގެ ވޯޓު ކަރުދާހުގައި ރައީސް ޔާމީނުގެ ނަން އޮންނާނެކަމާ މެދު ޝައްކު ނުކުރައްވާ ކަމަށެވެ.
"ޕީޕީއެމް ޕީއެންްސީގެ ރިޔާސީ ކެނޑިޑޭޓަކީ ރައީސް ޔާމީން. ޖަލަށް ލިއަސް އެހެން ތާކަށް ލިއަސް ރައީސް ޔާމީން. އަޅުގަނޑުމެންގެ 2023ގެ ރިޔާސީ ކެނޑިޑޭޓަކީ ރައީސް ޔާމީން" އަބްދުއްރަހީމް ވިދާޅުވި އެވެ.
"މިއީ ރައީސް ޔާމީނަށް ކުރާ ޖެއްސުމެއް، އަނިޔާއެއްް"
"ސަރުކާރުން ކަނޑައެޅިގެން ރައީސް ޔާމީން ރިޔަސީ ކެނޑިޑޭޓަށް ވާތީ ކުރާ ކުރާ ޖެއްސުމެއް ނުވަތަ އަނިޔާއެއް މިއީ." ޕީއެންސީގެ ނައިބުރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވި އެވެ.
