ދިރާގު ޓީވީގެ ލައިސެންސް އާކޮށް ނުދިނުމަށް ނިންމައި ރާއްޖޭގައި ރީބްރޯޑްކާސްޓު ކުރުމުގެ ހުއްދަ ދިރާގަށް ނުދެވޭނެ ކަމަށް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން ކަނޑައަޅާފައިވާތީ އެ ހިދުމަތް ހުއްޓާލައި ސަން ސިޔާމް ނެޓު މެދުވެރިކޮށް ދިނުމަށް ކުންފުނީގެ ބޯޑުން ނިންމާފައިވާކަން ހާމަކޮށްފި އެވެ.
ދިރާގު ޓީވީއަށް ލައިސެންސް ނުދޭން ކޮމިޝަނުން ނިންމީ ރީބްރޯޑްކާސްޓްކުރުމުގެ ގަވާއިދަށް ގެނައި އިސްލާހަކަށް ރިއާޔަތްކޮށެވެ. އިސްލާހުގައިވާ ގޮތުން ސަތޭކަ ޕަސެންޓް ދިވެހި ކުންފުންްޏަކަށް ނޫނީ ރާއްޖޭގައި ރީބްރޯޑްކާސްޓްކުރުމުގެ ހުއްދަ ނުލިބޭނެ އެވެ.
ދިރާގަކީ އެފަދަ ކުންފުންޏެއް ނޫނެވެ. ދިރާގުގެ މެޖޯރިޓީ ހިއްސާދާރަކީ ބަހުރެއިންގެ ބަޓެލްކޯ އެވެ. އެހެންވީމާ، ރީބްރޯޑްކާސްޓްކުރުމުގެ ހިދުމަތް ދިނުމުގެ ލައިސަންސަށް ދިރާގު މިހާރު ޝަރުތު ހަމައެއް ނުވެ އެވެ. އަދި، މިހާރު އެ ކުންފުނީގެ އަތުގައި އޮތް ލައިސެންސް އަންނަ ޖެނުއަރީ 29، އަށް ހަމަވެ އެވެ.
ރެގިއުލޭޓަރީ ގޮތުން ކުރިމަތިވި ގޮންޖެހުންތަކަށް ރިއާޔަތްކޮށް، އެ ކުންފުންޏާއި ހިއްސާދާރުންގެ ރައްކަލާއި މަންފާއަށާއި އަދި އެ ކުންފުންޏަށް ލިބޭނެ ގެއްލުން އިތުރުވިޔަ ނުދިނުމަށްޓަކައި، ދިރާގުޓީވީ އަދި ދިރާގުޕްލޭގެ ހިދުމަތް ހުއްޓާލުމަށް އެ ކުންފުނީގެ ބޯޑުން ނިންމާފައިވާކަން ދިރާގުން ވަނީ ހާމަކޮށްފަ އެވެ.
"ގަވާއިދުގައިވާ ގޮތުގެ މަތިން ހިދުމަތް ހުއްޓާލުމުގެ 30 ދުވަސް ކުރިން ކަސްޓަމަރުންނަށް އެންގުމަށް ލާޒިމްކޮށްފައިވާތީ، 29 ޖެނުއަރީ 2023 އަކީ ދިރާގުޓީވީ އަދި ދިރާގުޕްލޭ ހިދުމަތް ފޯރުކޮށްދިނުމުގެ އެންމެފަހު ދުވަސް،" އެ ނިންމުމާ ގުޅިގެން ކަސްޓަމަރުންގެ ފަރާތުން މައާފަށް އެދި ދިރާގުން ނެރުނު ބަޔާނެއްގައި ބުނެފައިވެ އެވެ.
އަދި، އެއަށްފަހު އެ ހިދުމަތް ދެމުންދާނީ ސަން ސިޔާމް ނެޓުން ކަމަށާއި އެކަމަށް ވާން ޖެހޭ އެއްބަސްވުންތައް މިހާރު ވެފައިވާ ކަމަށް ދިރާގުން ނެރުނު ބަޔާނެއްގައި ބުނެފައިވެ އެވެ.
"ދިރާގުގެ އައިޕީޓީވީ އަދި އޯޓީޓީ ވިއުގަ ހިދުމަތެއްގެ ގޮތުގައި ފޯރުކޮށްދިނުމަށް އެފަރާތާ އެކު ވަނީ އެއްބަސްވުމަކަށް އައިސްފަ އެވެ. އަދި އައު ރީބްރޯޑްކާސްޓަރުގެ ހިދުމަތަށް ބަދަލުވާން ބޭނުންވާނަމަ، އެކަން ފަސޭހަކަމާއިއެކު ކުރެވޭނެ އިންތިޒާމުވެސްވަނީ ހަމަޖެހިފަ އެވެ،" ދިރާގުން ނެރުނު ބަޔާނެއްގައި ބުނެފައިވެ އެވެ.
ސަން ސިޔާމް ނެޓަކީ މީދޫ ދާއިރާގެ މެމްބަރު އަދި މޯލްޑިވްސް ޑިމޮކްރަޓިކް އެލަޔަންސް (އެމްޑީއޭ) ގެ ލީޑަރު އަހްމަދު ސިޔާމް މުހައްމަދުގެ ވިޔަފާރިއެކެވެ. ރީބްރޯޑްކާސްޓް ކުރުމުގެ ލައިސެންސް އެ ކުންފުންޏަށް ވަނީ ލިބިފަ އެވެ.
ވޭތުވެދިޔަ 7 އަހަރުގެ ތެރޭގައި ދިރާގުޓީވީގެ ހިދުމަތް ކަސްޓަމަރުންނާއި ހަމައަށް ގެނެސްދިނުމަށް 100 އަށް ވުރެ ގިނަ ޕްރިމިއަމް ޗެނަލްތަކާ އެކު، ރާއްޖޭގެ 95 ރަށް ހިމެނޭގޮތަށް، ރާއްޖޭގެ 85 އިންސައްތަ ގޭބިސީއަށް ދިރާގުޓީވީގެ ހިދުމަތް ވަނީ ފޯރުކޮށްދީފަ އެވެ.
ބްރޯޑްކާސްޓިންގެ ލައިންސެންސް ދިރާގަށް ދޫކޮށްފައިވަނީ 2013 ވަނަ އަހަރުގެ ޖެނުއަރީ މަހުގެ 30 ވަނަ ދުވަހު އެވެ.
ރީބްރޯޑްކާސްޓްކުރުމުގެ ގަވައިދަށް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން އެންމެ ފަހުން ގެނައި އެެ ބަދަލާ ގުޅިގެން ރައްޔިތުންގެ މަޖިލީހަށް މެމްބަރަކު ގަރާރެއް ވެސް ހުށަހެޅުއްވި އެވެ. އަދި މިނިވަން މުއައްސަސާތަކުގެ ކޮމިޓީއަށް އެ ގަވައިދުގެ މައްސަލަ ވެސް ވަނީ ހުށަހަޅާފަ އެވެ.
އެ ކޮމިޓީއަށް ހާޒިރުކުރުމުން ދިރާގުގެ ވެރިން އޭރު ވިދާޅުވީ ގަވައިދަށް ކުއްލިއަކަށް ގެނައި އިސްލާހުގެ ބޭނުމެއް ނުވިސްނޭ ކަމަށާއި އެކަންވީ ސަޕްރައިޒަކަށް ކަމަށެވެ. އެ ކުންފުނިން ވަނީ ޓީވީގެ ހިދުމަތް މެދުކަނޑާނުލާ ކުރިއަށް ގެންދެވޭތޯ އޮތްތޯ ބްރޯޑްކޮމްއާއެކު މަޝްވަރާ ކުރަމުންދާ ކަމަށް ވެސް ބުނެފަ އެވެ.
