ކުރިއަށް އޮތް ރިޔާސީ އިންތިހާބުގެ ކެމްޕެއިނުގައި ކެންޑިޑޭޓުންގެ ޕޯސްޓަރާއި ބެނާ ހަރު ކުރުމަށް ހުއްދަ ނަގަންޖެހޭ ގޮތަށް ނިންމައި، އެ އުސޫލާ ހިލާފުވާ ފަރާތްތައް ޖޫރިމަނާ ކުރާނެ ކަމަށް މާލޭ ސިޓީ ކައުންސިލުން މިއަދު ބުނެފި އެވެ.
އެ ކައުންސިލުން މިއަދު ކުރި އިއުލާނެއްގައި ބުނެފައި ވަނީ އެފަދަ ޕޯސްޓަރާއި ބެނާ ހިއްޕުމަށް ބޭނުންވާ ފަރާތްތަކުން މިހާރު އެ އިދާރާގައި ހުއްދައަށް އެދެވޭނެ ކަމަށެވެ. އަދި ބުނެފައި ވަނީ އެ އުސޫލާ ހިލާފުވާ ފަރާތްތައް ދުވާލަކު 1000ރ. އިން ޖޫރިމަނާ ކުރާނެ ކަމަށެވެ.
"ހުއްދަނެތި މާލޭ ސިޓީގެ މަގުތަކާއި އާންމު ތަންތަނުގައި ބެނާ ދެމުމާއި އިސްތިހާރު ހިއްޕާ ހެދުމަކީ މަނާކަމެއް،" އެ އިއުލާނުގައި ބުނެފައިވެ އެވެ.
އޭގެ އިތުރުން އެ ކައުންސިލުން ބުނީ ހުއްދަ ނެތި ބެނާއެއް ހަރުކޮށްފި ނަމަ އެތަކެތި ނަގައި ވަގުތުން ނައްތާލާނެ ކަމަށާއި ގެއްލުންވާ އެއްވެސް މުދަލަކަށް އެ އިދާރާއިން ޒިންމާނުވާނެ ކަމަށެވެ.
"އެފަދަ އިސްތިހާރެއް ނުވަތަ ބެނާއެއް މާލޭ ސިޓީ ކައުންސިލުގެ ހުއްދަ ނެތި ބަހައްޓާފައިވާނަމަ އެފަދަ އިސްތިހާރާއި ބެނާތައް ވަގުތުން މިކައުންސިލުގެ ބެލުމުގެ ދަށުން ނަގާ ނައްތާލެވޭނެކަމުގައި ދެންނެވީން،" އެ އިއުލާނުގައިވެ އެވެ.
