ހުޅުމާލެ-މާލެ ހައިވޭގައި މިހާރު ކުރިއަށް ގެންދާ ސޯލާ ޕެނަލް ނިޒާމް ގާއިމްކުރުމުގެ މަޝްރުއޫއާ ގުޅިގެން އެ މަގުގެ އެއް ލޭނު ކޮންމެ ދުވަހަކު ވެސް ވަކި ވަގުތަކަށް ބަންދުކުރަން އެންވަޔަރަމެންޓް މިނިސްޓްރީން ނިންމިއިފި އެވެ.
އެންވަޔަރަމެންޓް މިނިސްޓްރީން ބުނީ، ހައިވޭއިން ލޭނެއް ބަންދުކުރުމަށް ނިންމާފައި ވަނީ ސޯލާ ޕެނަލް މަޝްރުއޫގެ ދަށުން ހައިވޭގެ ވާތް ފަޅީ (ހުޅުމާލެއިން މާލެއަށް ދަތުރުކުރާ ފަޅީ)ގައި ސޯލާ ޕީވީ ހަރުކުރުމަށް ނިންމާފައިވާތީ ކަމަށެވެ.
ހައިވޭގެ މޫދާވީ ފަޅީގައި ސޯލާ ޕީވީ ހަރުކުރުމުގެ މަސައްކަތް ފަށާނީ މިމަހުގެ 25 ވަނަ ދުވަހުން ފެށިގެން އަންނަ ފެބްރުއަރީ މަހުގެ ފަސް ވަނަ ދުވަހާ ހަމައަށެވެ. ބަންދުކުރަން ހަމަޖެހިފައިވަނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 09:30 އިން 11:30 އަށް އަދި މެންދުރު 13:30 އިން 04:30 އަށެވެ.
ހަލިމަގުުން ބަންދުކުރާ ސަރަހައްދު
ލޭނު ބަންދުކުރަން ނިންމާފައި ވަނީ ކަމާ ގުޅުން ހުރި އިދާރާތަކުގެ ހުއްދައާ އެކުކަން ފާހަގަކޮށް އެ މިނިސްޓްރީން ބުނީ، ލޭނު ބަންދު ގަޑިތަކުގައި ލިންކް ރޯޑްގައި އެއްގަމު އުޅަނދު ދުއްވާ ފަރާތްތަކުން ސަމާލުކަން ދިނުމަށް އިލްތިމާސްކުރާ ކަމަށެވެ.
މި މަޝްރޫ ކުރިއަށް ގެންދަނީ ތައިލެންޑުގެ "އެންސިސް ކޯ" ކުންފުނިންނެވެ. މިމަހުގެ ހަވަަނަ ދުވަހު ފެށި މި މަޝްރުއޫ ނިންމާލެވޭނެކަމަށް ލަފާކޮށްފައި ވަނީ 2023 ވަނަ އަހަރުގެ ދެވަނަ ކުއާޓަރުގެ ނިޔަލަށެވެ. ގާތްގަނޑަކަށް 90 މިލިއަން ރުފިޔާ ހޭދަވާ މި މަޝްރުއޫއަށް ދައުލަތުން އެއްވެސް ހަރަދެއް ނުކުރާނެ އެވެ.
އެ މަޝްރޫއުން އުފައްދާ ކަރަންޓު ގަތުމަށް ހޭދަކުރާ މިންވަރާއި ކަރަންޓް އުފެއްދުމަށްޓަކައި ތެލަށް ކުރާ ހޭދަ އަޅައިކިރާއިރު، ގާތްގަނޑަކަށް 15 އާއި 20 މިލިއަން ދިވެހި ރުފިޔާ ދައުލަތަށް ސަލާމަތް ކުރެވޭނެ ކަމަށް ތިމާވެއްޓާ ބެހޭ މިނިސްޓްރީން ބުނެ އެވެ.
