ކޮރަޕްޝަންގެ މައްސަލަތަކެއްގައި ރ. ދުވާފަރު ރަށު ކައުންސިލުގެ ހުރިހާ މެމްބަރުން ގެއަށް ފޮނުވާލާފައި ހުއްޓައި، މިދިޔަ އަހަރު އެ ކައުންސިލުން ބިޑަކަށް ނުލައި 2.3 މިލިއަން ރުފިޔާ ހަރަދުކޮށްފައިވާކަން ހާމަވެއްޖެ އެވެ.
ދުވާފަރު ކައުންސިލުގެ ފަސް މެމްބަރުންގެ އިތުރުން އެ ކައުންސިލުގެ ގިނަ މުވައްޒަފުންތަކެއް ވަޒީފާއަށް ނިކުތުން މިދިޔަ ނޮވެމްބަރު މަހުން ފެށިގެން މަނާ ކުރީ ރައްޔިތުންގެ ފައިސާގެ 1.7 މިލިއަން ރުފިޔާ އަމިއްލަ އެކައުންޓުތަކަށް ޖަމާކޮށް، ހަރަދު ކުރި މައްސަލަތަކެއް ފަޅާއެރުމުންނެވެ.
އޮޑިޓު އޮފީހުން މިއަދު ނެރުނު ދުވާފަރު ކައުންސިލުގެ މިދިޔަ އަހަރުގެ އޮޑިޓު ރިޕޯޓުގައި ވެސް ވަނީ ވަރަށް ގިނަ މައްސަލަތަކެއް ފާހަގަކޮށްފަ އެވެ. އެގޮތުން، ގާނޫނާއި ގަވާއިދާ ހިލާފަށް މުދާ ގަތުމާއި ފައިސާ ހަރަދު ކުރުމާއި ވިޔަފާރިކުރުން ހިމެނެ އެވެ. އެކަމަކު، އެންމެ ބޮޑު މައްސަލައެއްގެ ގޮތުގައި ރިޕޯޓުން ފާހަގަ ވަނީ ކޮރަޕްޝަނަށް މަގުފަހިވާ ގޮތަށް ބިޑަކަށް ނުލައި އަދި ބިޑު ކޮމެޓީގެ ހުއްދަ ނެތި 2.3 މިލިއަން ރުފިޔާގެ މުދަލާއި ހިދުމަތް ހޯދާފައިވުމެވެ.
"ކައުންސިލުގެ އިދާރާއިން އާންމުކޮށް ބީލަމަށް ހުޅުވާލުމާއި ޕްރޮކިއުމެންޓުގެ ކަމެއް ކުރުމަށް ހުއްދަ ދެވޭ މިންގަނޑާއި އެއްގިތަށް ތަކެއްޗާއި ހިދުމަތް ހޯދުމުގައި މި ގަވާއިދާ އެއްގޮތަށް އަމަލުކޮށްފައެއް ނުވޭ. މިގޮތުން 2021 ވަނަ އަހަރު އާންމުކޮށް އިއުލާނުނުކޮށް، މީލަމުގެ އުސޫލަށް ނުގޮސް އަދި ބިޑު ކޮމެޓީގެ ހުއްދައާ ނުލައި ޖުމްލަ 2،373،969ރ. ހަރަދުކޮށްފައިވޭ،" އެ ރިޕޯޓުގައި ބުނެފައިވެ އެވެ.
އޭގެ އިތުރުން ވެސް، ފައިސާ އާއި މުދާ ހަރަދު ކުރުމާއި ގެންގުޅުމުގައި ވެފައި ހުރި ބޮޑެތި އިހުމާލުތަކެއް ވެސް އޮޑިޓު ރިޕޯޓުން ހާމަވި އެވެ. އެގޮތުން ގާނޫނާއި ގަވާއިދާ ހިލާފަށް ކުރި 15 ކަމެއް ފާހަގަކޮށް އެކަންތައްތައް އިސްލާހު ކުރުމަށް އޮޑިޓު އޮފީހުން އޮތީ ލަފާ ދީފަ އެވެ.
ދުވާފަރު ކައުންސިލުގެ އޮޑިޓުން ފާހަގަވި ބައެއް މައްސަލަތައް
- މުދާ ގަންނަ ފޯމު ފުރިހަމަނުކޮށް 1.8 މިލިއަން ރުފިޔާ ހަރަދު ކުރި
- މުދަލަށް އޯޑަރު ކުރި ފޯމު ފުރިހަމަނުކޮށް 1.6 މިލިއަން ރުފިޔަ ހަރަދު ކުރި
- ޝޮޕިން އުސޫލާ ހިލާފަށް 1.8 މިލިއަން ރުފިޔާގެ މުދަލާއި ހިދުމަތް ހޯދާފައި
- ބީލަމަށް ނުގޮސް 2.3 މިލިއަން ރުފިޔާގެ މުދަލާއި ހިދުމަތް ހޯދި
- ކައުންސިލުގައި ބެހެއްޓި ނަގުދު ފައިސާގެ ލިޔެކިޔުން ނެތުމާއި ހިސާބު ދިމާނުވުން
- އާމްދަނީގެ ގޮތުގައި ލިބޭ ފައިސާ ގަވާއިދުން ބޭންކަށް ޖަމާނުކުރުން
- ތިޖޫރީން ނެގި 242،000ރ. ހަރަދު ކުރި ގޮތް އެނގެން ނެތުން
- ސްޓޮކާއި ހަރުމުދަލުގެ ރަޖިސްޓްރީ ނުބެލެހެއްޓުން
- ދަތުރުތަކުގެ އެއްވެސް މައުލޫމާތެއް ނުލިޔެ، 387،900ރ. ގެ ދަތުރުފަތުރު ކުރުން
- ބިމު ކުލީގެ ގޮތުގައި ލިބެންޖެހޭ 1.3 މިލިއަން ރުފިޔާ ހޯދަން މަސައްކަތް ނުކުރުން
- ދަރަންޏަށް 1.3 މިލިއަން ރުފިޔާ ނެގުމަށްފަހު ފައިސާ ލިބެންވީ މީހާގެ ބަދަލުގައި މެމްބަރުން އެކައުންޓުތަކަށް ޖަމާކުރުން
