މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރިޔާސީ ޕްރައިމަރީ އަންނަ ޖެނުއަރީ 28، ގައި ބޭއްވުމަށް އެ ޕާޓީން މިއަދު އިއުލާނުކުރުމާ ގުޅިގެން އެމްޑީޕީގެ މެދު ހެންވޭރު ދާއިރާގެ މެންބަރު އަލީ އާޒިމް ނުރުހުން ފާޅުކުރައްވައިފި އެވެ.
ޖެނުއަރީ މަހު އިންތިހާބު ބޭއްވުމަށް ނިންމެވުމާ ގުޅިގެން ނުރުހުން ފާޅުކުރައްވައި ކުރެއްވި ޓުވީޓެއްގައި އާޒިމް ވިދާޅުވީ، ކޮންމެ ކަމެއްވެސް ހުތުރުކޮށް ކުރަން އުޅުމުން ނަތީޖާ ރަނގަޅު ނުވާނެ ކަމަށެވެ.
އަދި އެމްޑީޕީ ޕްރައިމަރީއަށް ކުރިމަތިލާނެކަން ޕާޓީގެ ރައީސް މުހައްމަދު ނަޝީދު ވިދާޅުވެފައިވަނިކޮށް އެމަނިކުފާނު ރަށުގައި ނޫޅުއްވަނީސް ޕްރައިމަރީއަށް ކުރިމަތިލުމަށް ދިނީ އެންމެ ފަސް ދުވަހުގެ މުއްދަތު ކަމަށެވެ.
އެމްޑީޕީގެ ޕްރައިމަރީގައި ވާދަ ކުރައްވާނެ ކަމަށް ރައީސް ސޯލިހު އިއުލާނު ކުރެއްވީ ޖޫން 8، ގަ އެވެ. އޭގެ ފަހުން ނަޝީދު ވެސް އިންތިހާބުގައި ވާދަ ކުރައްވާނެކަމުގެ އެކި އިޝާރާތް ވަނީ ދެއްވައިފަ އެވެ.
ޕްރައިމަރީއަށް ވާދަކުރުމަށް ހުޅުވާލި މުއްދަތާ މެދު އާޒިމް ނުރުހުން ފާޅުކުރިއިރު, 2018 ވަނަ ބޭއްވި, ނަޝީދު އެކަނި ވާދަކުރެއްވި ޕްރައިމަރީއަށް ހުޅުވާލީ އެ އަހަރުގެ މެއި މަހުގެ 15 ވަނަ ދުވަހު އެވެ. އަދި އެ ފުރުސަތު 19 ވަނަ ދުވަހު ބަންދުކޮށް, 30 ވަނަ ދުވަހު އިންތިހާބު ބޭއްވި އެވެ.
އޭގެކުރިން 2013 ވަނަ އަހަރުގެ ރިޔާސީ އިންތިހާބަށް ބޭއްވި ޕްރައިމަރީއަށް 2012 ވަނަ އަހަރުގެ ފެބުރުއަރީ މަހުގެ 21 ވަނަ ދުވަހު ހުޅުވާލިއިރު އެ ފުރުސަތު 28 ވަނަ ދުވަހު ބަންދުކުރި އެވެ. އިންތިހާބު ބޭއްވީ މެއި ފަސް ވަނަ ދުވަހު އެވެ.
