އެމްއެންޕީގެ ރިޔާސީ ޕްރައިމަރީއަށް އެ ޕާޓީގެ ރައީސް މުހައްމަދު ނާޒިމް ފިޔަވައި އިތުރު މީހަކު ކުރިމަތި ނުލުމުން، ޕާޓީގެ ރިޔާސީ ޓިކެޓް އޭނާއަށް ޔަގީން ވެއްޖެ އެވެ.
އަންނަ އަހަރު ބާއްވާ ރިޔާސީ އިންތިހާބުގައި ވާދަކުރާނެ އެމްއެންޕީގެ ކެންޑިޑޭޓަކު ކަނޑައެޅުމަށް ބާއްވާ އެ ޕާޓީގެ ރިޔާސީ ޕްރައިމަރީއަށް ކުރިމަތިލުމުގެ ވަގުތު މިއަދު މެންދުރުފަހު 2:00 އަށް ވަނީ ހަމަވެފަ އެވެ.
އެމްއެންޕީގެ ތަރުޖަމާނު ޝިދާތާ ޝަރީފް "އަދަދު" ނޫހަށް ވިދާޅުވީ ކުރިމަތިލުމުގެ ސުންގަޑި ހަމަވިއިރު ރިޔާސީ ޕްރައިމަރީއަށް ކުރިމަތިލެއްވީ ނާޒިމް އެކަނި ކަމަށެވެ.
އެ ޕާޓީގެ އަސާސީ ގަވާއިދު ބުނާ ގޮތުން، ޕްރައިމަރީއަށް އެންމެ މީހަކު ކުރިމަތިލައިފި ނަމަ، އިތުރު ވޯޓަކަށް ނުގޮސް އޭނާއަށް ޓިކެޓް ޔަގީން ކުރެވޭނެ އެވެ.
"ރަސްމީކޮށް ރިޔާސީ ޓިކެޓު ހަވާލުކުރުމަށް ރަސްމިއްޔާތެއް ބާއްވާނެ، އަދި ވަކި ތާރީހެއް ނުނިންމާ އެ ކަމަކަށް، އެ ރަސްމިއްޔާތަށް ފަހު އެމްއެންޕީގެ ރިޔާސީ ކެމްޕޭން ފެށޭނެ،" ޝިދާތާ ވިދާޅުވި އެވެ.
އެމްއެންޕީ އުފެއްދީ، ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު ނާޒިމްގެ އިތުރުން ތިމަރަފުށި ދާއިރާގެ މެންބަރު އަބްދުﷲ ރިޔާޒާއި ވިލިމާލެ ދާއިރާގެ މެންބަރު އަހުމަދު އުޝާމް އިސްވެ ހުންނަވަ އެވެ.
އެމްއެންޕީގެ އިތުރުން ރިޔާސީ ކެންޑިޑޭޓް ކަނޑައަޅައި ނިންމާފައިވަނީ އިދިކޮޅު ޕީޕީއެމާއި އެމްޑީއޭ އެވެ. ޕީޕީއެމްގެ ރިޔާސީ ކެންޑިޑޭޓަކީ ކުރީގެ ރައީސް އަބްދުﷲ ޔާމީނެވެ. އެމްޑީއޭއިން ވާދަކުރައްވަނީ އެ ޕާޓީގެ ލީޑަރު އަހުމަދު ސިޔާމް މުހައްމަދެވެ.
ވެރިކަން ކުރާ މައި ޕާޓީ، އެމްޑީޕީގެ އެތެރޭގައި ދެ ފެކްޝަން އުފެދި ހިޔާލުތަފާތުވުންތައް އޮތީ ބޮޑުވެފަ އެވެ.
އެ ޕްރައިމަރީގައި ވާދަކުރައްވާނެ ކަމަށް ރައީސް އިބްރާހީމް މުހައްމަދު ސޯލިހް ވަނީ އިއުލާންކުރައްވައިފަ އެވެ. ނަމަވެސް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ބޭނުންވަނީ ޕްރައިމަރީގެ ކުރިއަށް، ވެރިކަމުގެ ނިޒާމު ބަދަލުކުރުމާ މެދު ރައްޔިތުންގެ ފެންނަ ނުފެންނަ ވޯޓަކަށް ދިއުމަށެވެ.
