އަންނަ އަހަރު ވިލާ ކޮލެޖުގައި ފެށުމަށް ހަމަޖެހިފައިވާ ކޯސްތަކާ ބެހޭ މައުލޫމާތު ދިނުމަށް ބާއްވާ "އޯޕަން ޑޭ" އެއް އަންނަ ހުކުރު ދުވަހު ބޭއްވުމަށް ނިންމައިފި އެވެ.
މި ހަރަކާތް ބޭއްވުމަށް ހަމަޖެހިފައިވަނީ އަންނަ ހުކުރު ދުވަހުގެ ހަވީރު 4:00 އިން ރޭގަނޑު 10:00 އަށް ވިލާ ކޮލެޖުގަ އެވެ.
މި ހަރަކާތުގައި ވިލާ ކޮލެޖުގައި އަންނަ އަހަރު ފަށާ ގިނަ ކޯސްތަކާ ބެހޭ މައުލޫމާތާއި، ކިޔަވައިދޭ ލެކްޗަރާއިންނާ ބައްދަލުކުރެވޭނެ އިންތިޒާމު ހަމަޖެހިގެންދާނެ ކަމަށް ވިލާ ކޮލެޖުން މައުލޫމާތުދެ އެވެ.
މީގެ އިތުރުން ކުރީގެ އަދި މިހާރު ކިޔަވަމުންދާ ދަރިވަރުންނާއި ބައްދަލުވެ އެކުދީންގެ ތަޖުރިބާ ހިއްސާކޮށްލުމުގެ ފުރުސަތުވެސް ވަނީ ހުޅުވާލެވިފަ އެވެ.
ހަމަ އެއާއެކު ކޯސްތަކަށް ވަނުމަށް އެޕްލިކޭޝަން ހުށަހެޅުމާއި، ވަގުތުން ކޯހަށް ހޮވުނުކަމުގެ ލިޔުން އަދި ކޯހަށް ރަޖިސްޓްރީ ވެވޭނެ އިންތިޒާމް ވެސް ހަމަޖެހިގެންދާނެ ކަމަށް ކޮލެޖުން މައުލޫމާތުދެ އެވެ.
އަންނަ ހުކުރު ދުވަހު ބާއްވާ "އޯޕަން ޑޭ" ގެ ތެރެއިން ތަފާތު ކުޅިވަރު ހަރަކާތްތަކާއި، ލައިވް މިއުޒިކް އަދި ފުޑް ސްޓޯލްތައް ވެސް ކުރިއަށް ގެންދަން ވަނީ ނިންމާފަ އެވެ. އަދި އޯޕަންޑޭއަށް ޒިޔާރަތް ކުރާ ފަރާތްތަކުގެ މެދުގައި ނެގޭ ގުރުއަތުން ނަސީބު ވެރި ފަރާތަކަށް ހާއްސަ އިނާމެއް ލިބިގެންދާނެ އެވެ.
މި އޯޕަންޑޭގައި ވިލާ ކޮލެޖުން ހިންގާ ކްލާސްތަކުގެ ތެރެއިން ބައެއް ކްލާސްތައް ތަޖުރިބާ ކޮށްލުމަށްޓަކައި ހިލޭ ބައިވެރިވެވޭ "ޑެމޯ ކްލާސް" ތަކާއި ވިލާ ކޮލެޖުގެ ދަރިވަރުންނަށް ހުރި ވަސީލަތްތައް ބަލައިލުމުގެ އިންތިޒާމު ވެސް ވަނީ ހަމަޖެހިފަ އެވެ.
