ސިޔާސީ ޕާޓީއަކަށް އެމީހަކު އަމިއްލައަށް ރެޖިސްޓްރީވެވޭނެ އޮންލައިން ޕޯޓަލެއް ތައާރަފްކުރުމަށް ތައްޔާރުވަމުން އަންނަ ކަމަށް އިލެކްޝަންސް ކޮމިޝަން (އީސީ) ބުނެފި އެވެ.
މިހާރު ހަމަޖެހިފައި އޮންނަ ގޮތުން ޕާޓީތަކަށް ރެޖިސްޓްރީވުމުގެ އިންތިޒާމު ހަމަޖެހިފައި އޮންނަނީ ޕާޓީތައް މެދުވެރިކޮށެވެ.
އީސީގެ ރައީސް ފުއާދު ތައުފީގު "އަދަދު"އަށް ވިދާޅުވީ ޕޯޓަލް މެދުވެރިކޮށް ޕާޓީއަށް ރެޖިސްޓްރީވުމަށް ޓަކައި، އެ މީހެއްގެ އަމިއްލަ ފޯނަށް ހާއްސަ އޯޓީޕީއެއް ދާނެ ކަމަށެވެ.
"ޕޯޓަލަކަށް ވަދެގެން އެންޓާ ކުރާނީ، އަދި އަޅުގަނޑުމެންނަށް އޭގެ ތެރޭގައި ހިމެނޭނެ އޯޓީޕީއެއް، އޮޓޯމެޓިކުން އަންނަ ގޮތަށް،" ފުއާދު ވިދާޅުވި އެވެ.
މިހާރު ކުރިއަށް ދަނީ މި ސޮފްޓްވެއާ ޓެސްޓު ކުރުމުގެ މަސައްކަތް ކަން ފުއާދު ފާހަގަކުރެއްވި އެވެ.
"ވަރަށް ރަނގަޅަށް ޓެސްޓުކޮށްފައި ނޫނިއްޔާ މިކަހަލަ ސޮފްޓްވެއާއެއް ދޫކޮށްލާކަށް ބޭނުމެއް ނޫން،" އޭނާ ވިދާޅުވި އެވެ.
ފޮޓޯ ޖެހި ފޯމާއެކު އަދަދު ދަށަށް
ސައްހަ ނޫން ފޯމުގެ މައްސަލަ ހައްލުކުރުމުގެ ގޮތުން ޑިސެންބަރު މަހުން ފެށިގެން އިލެކްޝަންސް ކޮމިޝަނަށް ހުށަހަޅާ ފޯމަށް ވަނީ ބަދަލުތަކެއް ގެނެސްފަ އެވެ.
ފުއާދު ވިދާޅުވި ގޮތުގައި މިހާރު ހުށަހަޅަން ޖެހޭ ފޯމުގައި ޕާޓީއަށް ވަންނަ މީހާގެ ޕާސްޕޯޓު ސައިޒު ފޮޓޯ ޖެހުމުގެ އިތުރުން އެ މީހާގެ މަންމަގެ މައުލޫމާތު ހިމަނަން ޖެހޭނެ އެވެ.
ޑިސެންބަރު މަހުގެ ފަހުން ހުށަހަޅާ ފޯމުގައި ފޮޓޯއާއި މަންމަގެ ނަން ހިމަނަން ޖެހޭ---
"މިކަން މިގޮތަށް ކުރަން ޖެހުނު ސަބަބަކީ އައިޑީކާޑުގެ ކޮޕީ ލިބޭ ކޮންމެ މީހަކަށް ޕާޓީތަކަށް އެބަ ވަދެވޭ ކޮންމެވެސް މީހެއްގެ އިނގިލީގެ ނިޝާން ޖަހައިގެން، އައިޑީކާޑުގައި ނީންނާނެ މަންމަގެ ނަމެއް، އެކަމަކު އަޅުގަނޑުމެންނަށް ޗެކް ކުރެވެން އެބައޮތް،" ފުއާދު ވިދާޅުވި އެވެ.
މި ބަދަލާއެކު މިހާރު އިލެކްޝަންސް ކޮމިޝަނަށް ހުށަހަޅާ ފޯމުގެ އަދަދު ވަރަށް ބޮޑަށް މަދުވެފައިވާ ކަން އޭނާ ފާހަގަކުރެއްވި އެވެ.
އެގޮތުން ކުރިން ދުވާލެއްގެ މައްޗަށް 600 އެއްހާ ފޯމު ހުށަހެޅުނު ނަމަވެސް މިހާރު ދުވާލެއްގެ މައްޗަށް އެވްރެޖުކޮށް 100 ފޯމު ވެސް ނުލިބޭ ކަމަށް އޭނާ ވިދާޅުވި އެވެ.
