ހިޔާލުފާޅުކުރުމުގެ މިނިވަންކަމުގެ ތެރެއިން އެހެން މީހުންގެ ހައްގުތަކަށް ރައްކާތެރިވުމަށާއި އަނެކާގެ އަބުރަށް ގެއްލުން ނުދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ގޮވާލައްވައިފި އެވެ.
މިއަދު ފާހަގަކުރާ ބައިނަލްއަގުވާމީ އިންސާނީ ހައްގުތަކުގެ ދުވަހުގެ މުނާސަބަތުގައި ދެއްވި ހިތާބުގައި ރައީސް ވިދާޅުވީ ތިމާއަށް ލިބިފައިވާ އަސާސީ ހައްގުތަކުގެ ބޭނުން ކުރަންޖެހޭނީ އަނެކާގެ ހައްގުތަކަށް ވެސް އިހުތިރާމް ކުރަމުން ކަމަށެވެ.
"... ތިމާގެ އަބުރާއި ކަރާމާތް ރައްކާތެރިކުރުމަށް އެދޭއިރު، ކުރާ ކަމަކުން ނުވަތަ ބުނެލާ ބަހަކުން ވިޔަސް، އަނެކާގެ އަބުރާއި އިއްޒަތަށް އުނިކަމެއް ނުދިނުމުގެ ޒިންމާ. ހިޔާލު ފާޅުކުރުމުގެ މިނިވަންކަމުގެ ހައްގަށް ވަކާލާތުކުރާއިރު، އަނެކާގެ އަބުރާއި އިއްޒަތް ގެއްލިގެންދާ މިންވަރަށް ތިމާގެ މިނިވަންކަމުގެ ލަގަން ދޫކޮށްނުލުމުގެ ޒިންމާއެއް،" ރައީސް ވިދާޅުވި އެވެ.
ރައީސް ވިދާޅުވީ ހިޔާލުފާޅުކުރުމުގެ މިނިވަންކަން ރަނގަޅުގޮތުގައި ބޭނުންކުރުމަކީ ވެސް އެފަދަ ޒިންމާއެއް ކަމަށެވެ. އެގޮތުން ހިޔާލު ފާޅުކުރުމުގެ މިނިވަންކަމަށް ވަކާލާތު ކުރާއިރު، އަނެކާގެ އަބުރާއި އިއްޒަތް ގެއްލޭ މިންވަރަށް އެ މިނިވަންކަން ބޭނުންނުކުރުމަކީ ކޮންމެ މީހެއްގެވެސް ޒިންމާއެއްކަން ރައީސް ފާހަގަކުރެއްވި އެވެ.
އޭގެއިތުރުން ތިމާގެ އަބުރު ރައްކާތެރިކުރުމަށް އެދޭއިރު, ބުނެވޭ ބަހަކުން ނުވަތަ ކުރާ އަމަލަކުން އަނެކާގެ އަބުރަށް އަރައިނުގަތުމަށާއި މުދަލާއި އާމްދަނީގެ ހައްގަށް އެދޭއިރު އަނެކާގެ މުދަލަށް ނުހައްގުން އަރައިނުގަތުމަށް ރައީސް ވަނީ ގޮވާލައްވާފަ އެވެ.
