އިންސާނީ ހައްގުތަކުގެ ދާއިރާއިން ދިވެހި ދައުލަތުގެ އެންމެ އިސް ސިޔާސަތަކީ، އަސާސީ ހިދުމަތްތައް ފޯރުކޮށްދިނުމުގައި ރައްޔިތުންގެ މެދުގައި ތަފާތު ނުކުރުން ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މިއަދު ފާހަގަ ކުރާ ބައިނަލްއަގުވާމީ އިންސާނީ ހައްގަތުގެ ދުވަހުގެ މުނާސަބަތުގައި ރައީސް ސޯލިހު ފޮނުއްވި ހިތާބުގައި އިތުރަށް ވިދާޅުވީ މި ސިޔާސަތުގެ ދަށުން ދިވެހި ކޮންމެ ރައްޔިތަކަށް އިންސާނީ އަސާސީ ހައްގުތަކާ ގުޅިފައިވާ ހިދުމަތްތައް ދިނުމަށް ސަރުކާރުން މުހިންމު މަސައްކަތްތަކެއް ކުރަމުން ކަމަށެވެ.
"ރަށްރަށުގައި ގާއިމުނުކުރެވި ހުރި އަސާސީ ހިދުމަތްތައް ގާއިމުކުރުމުގެ މަސައްކަތް މެދުކެނޑުމެއް ނެތި ކުރުމަށް ސަރުކާރުން ނިންމައިގެން އެ މަސައްކަތް ކުރިއަށް ގެންދަނީ އިންސާނީ އަސާސީ ހައްގުތައް ދިވެހި ރައްޔިތުންނަށް ފޯރުކޮށްދިނުމަށް،" ރައީސް ވިދާޅުވި އެވެ.
އޭގެ އިތުރުން އިންސާނީ ހައްގަތުއް ހޯދުމަށް ކުރަމުންދާ މަސައްކަތުގައި އެންމެ އިސްކަމެއް ދޭންޖެހިފައިވަނީ އެ ހައްގުތަކަށް ހުރަސްއެޅޭ ގޮތަށް ހުރި ނުރަނގަޅު އާދަތަކަށް ނައްތާލުމަށް ކަމަށް ރައީސް ވިދާޅުވި އެވެ. އެގޮތުން ކުޑަކުދިންނާއި އަންހެނުންނަށް ކުރާ ޖިސްމާނީ އަދި ޖިންސީ އަނިޔާ އާއި ގެވެށި އަނިޔާގެ އަމަލުތައް ހުއްޓުވުމަށް މުޖުތަމައު އެކީގައި މަސައްކަތް ކުރަންޖެހޭކަން ރައީސް ފާހަގަކުރެއްވި އެވެ.
އިންސާނީ ހައްގުތަކުގެ ދުވަސް މިއަދު ފާހަގަކުރަމުންދާއިރު ރައީސް ވަނީ ރާއްޖޭގެ މުޖުތަމައުގައި އިންސާނީ އެހީއަށް އެންމެ ބޮޑަށް ބޭނުންވެފައިވާ ފަރާތްތައް ފާހަގަކުރައްވާފަ އެވެ. އެގޮތުން އުމުރުން ދޮށީ މީހުންނަށް ހައްގުވާ އާއިލީ ލޯބި ފޯރުކޮށްދިނުމާއި، މައިން ބަފައިންގެ ލޯބިން މަހުރޫމުވެފައިވާ ކުޑަކުދިންނަށް އަޅާލުމަކީ މުޖުތަމައެއްގެ ސިފައިގައި ކުރަންޖެހޭ ކަމެއްކަން ރައީސް ވަނީ ފާހަގަކުރައްވާފަ އެވެ.
ހުރިހާ ރަށެއްގައި ތަފާތު ކުރުމެއް ނެތި އަސާސީ ހައްގުތަށް ފޯރުކޮށްދިނުމަކީ މި ސަރުކާރުގެ ވައުދެކެވެ. އެގޮތުން ނަރުދަމާއި ފެނުގެ ނިޒާމް މީހުން ދިރިއުޅޭ ހުރިހާ ރަށެއްގައި މި ދައުރު ނިމުމުގެ ކުރިން ގާއިމް ކުރާނެ ކަމަށް ސަރުކާރުން ވަނީ ބުނެފަ އެވެ.
