ރާއްޖޭގައި ހިންގާ ސިޔާސީ ޕާޓީތަކުން މެމްބަރުން އިތުރުކުރަން ސައްހަ ނޫން ފޯމު ހުށަހަޅާ މައްސަލަ ބޮޑުވެ، އެ ގޮތަށް ހުށަހަޅާ ސައްހަ ނޫން ފޯމުތަކަށް ބޮޑު ޖޫރިމަނާ ކުރަން ނިންމި ނިންމުމަށް އަމަލު ނުކުރަން ނިންމާފައިވާ ކަމަށް އިލެކްޝަންސް ކޮމިޝަން (އީސީ)އިން ބުނެފި އެވެ.
ޕާޓީއަކުން ހުށަހަޅާފައިވާ ސައްހަ ނޫން ކޮންމެ ފޯމަކަށް، ޕާޓީގެ ރަޖިސްޓްރާ ފުރަތަމަ ފަހަރު 5،000ރ. އިން އަދި އޭގެ ފަހުން 10،000ރ. އިން ޖޫރިމަނާކުރަން އީސީން ނިންމާފައިވަނީ މިދިޔަ ޖޫން މަހު އެވެ.
އީސީގެ މި ނިންމުމަށް ފަހު އެއްވެސް ޕާޓީއެއް ޖޫރިމަނާކޮށްފައިވޭތޯ "އަދަދު" އިން ސުވާލުކުރުމުން އެ ކޮމިޝަންގެ ރައީސް ފުއާދު ތައުފީގު ވިދާޅުވީ މި މައްސަލައިގައި ޖޫރިމަނާ ނުކުރަން ނިންމާފައިވަނީ ޕާޓީތަކާ އެކު އެތައް ފަހަރެއްގެ މަތީން މަޝްވަރާ ކުރުމަށް ފަހުގައި ކަމަށެވެ.
ޖޫރިމަނާ ކުރުމަށް ވިސްނި ނަމަވެސް، އެކަމުގައި "ޕާޓީތަކުގައި ވިދާޅުވާ އެއްޗެއް ވެސް" އަޑު އަހަން ޖެހޭ ކަމަށް އޭނާ ވިދާޅުވި އެވެ.
"އެ ބޭފުޅުންގެ ވަރަށް ބޮޑު އެދިވަޑައިގަތުމެއް އަދި އިތުރު ފުރުސަތެއް އެ ބޭފުޅުންނަށް ދެއްވުމަކީ، އެހެންވީމާ އަޅުގަނޑުމެން އަދި ޖޫރިމަނާއެއް ނުކުރަން މިކަމުގައި،" ފުއާދު ވިދާޅުވި އެވެ.
ފުއާދު ވިދާޅުވި ގޮތުގައި ޕާޓީތަކުން ފާހަގަކުރާ ގޮތުގައި ގިނަ ފޯމުތަކަކީ އެކިއެކި ރަށްރަށުން ހެޔޮ އެދޭ ފަރާތްތަކުން ފޮނުވާ ފޯމުތަކެވެ. މިފަދަ ފޯމުތައް އީސީއަށް ހުށަހެޅުމުގެ ކުރީން ޕާޓީތަކުން ވެސް ޗެކްކުރާ ކަމަށް ސިޔާސީ ޕާޓީތަކާ ހަވާލާދީ ފުއާދު ވިދާޅުވި އެވެ.
ޖޫރިމަނާނުކުރަން ނިންމުމުގައި ރިއާޔަތް ކުރި އަނެއް ކަމަކީ ދައުލަތުގެ ބަޖެޓުން ދޭ ފައިސާ ލިބެނީ އެންމެ ހަތަރު ޕާޓީ ކަމަށް ވެފައި، އެހެން ޕާޓީތަކުގެ މަސައްކަތް ކުރަނީ އެހެނިހެން ގޮތްގޮތުން ލިބޭ އެހީތަކުން ކަމަށްވުމުންނެވެ. އަދި، ޖޫރިމަނާ ކޮށްފިނަމަ ވެގެން ދާނީ އެ ޕާޓީތަކަށް ވަރަށް ބޮޑު މާލީ ބުރައަކަށް ކަމަށް ވިދާޅުވި އެވެ.
"[ޕާޓީތަކުން ބުނަނީ] ޕާޓީތަކަށް ލިބޭ ވަރަށް ބޮޑު ދެރައަކަށް ވާނެޔޭ އެތައް ހާސް ރުފިޔާއަކުން އަޅުގަނޑުމެން ޖޫރިމަނާ ކޮށްފިއްޔާ، އެ ގޮތަށް ޖޫރިމަނާ ކުރަންޏާ އެ ޕާޓީއަށް ޑިމޮކްރެސީއަށް ޓަކައި ކުރަން އޮތް މަސައްކަތުގެ ބަދަލުގައި ޖޫރިމަނާގެ ފައިސާއަށޭ ހޭދަ ކުރަން ޖެހޭނީ،" ފުއާދު ވިދާޅުވި އެވެ.
ޕާޓީތަކާ އެކު ކުރިއަށް ގެންދަމުން އަންނަ ސިލްސިލާ މަޝްވަރާތަކާއި، އީސީން ދެމުން އަންނަ ލަފާތައް ގަބޫލުކޮށް، ޕާޓީތަކުން ހުށަހަޅާ ވަގު ފޯމުތައް މިހާރު ވަރަށް ބޮޑު ތަނުން މަދުވެފައިވާ ކަން ވެސް ފުއާދު ވިދާޅުވި އެވެ.
