މާފަރު އެއާޕޯޓުގެ ދެވަނަ ފިޔަވަހީގެ މަސައްކަތް އެމްޓީސީސީއާ ހަވާލުކޮށްފި އެވެ.
މާފަރު އެއާޕޯޓުގެ ދެވަނަ ފިޔަވަހީގެ ދަށުން ކުރުމަށް ހަމަޖެހިފައިވާ މަސައްކަތްތަކުގެ ތެރޭގައި ރަންވޭގެ 650 މީޓަރު ދިގުކުރުން ހިމެނެ އެވެ. އަދި ސްޓްރިޕް ފުޅާކުރުމަށްޓަކައި ބިން ހިއްކުމާއި ގޮނޑުދޮއް ހިމާޔަތްކުރުމާއި، މިހާރު ބޭނުންކުރާ ރަންވޭ ޕޭވްމަންޓް އަޕްގްރޭޑްކުރުން ހިމެނެ އެވެ.
މީގެ އިތުރުން ޓެކްސީވޭ ފުޅާކުރުމާއި، އޭޖީއެލް އަޕްގްރޭޑްކުރުމުގެ އިތުރުން ޕަވާ ސިސްޓަމް އަޕްގްރޭޑްކުރުން ވެސް މި މަޝްރުއޫގެ ދަށުން ކުރިއަށް ދާނެ އެވެ.
މާފަރު އެއާޕޯޓު ތަރައްޤީކުރުމަށް ހަމަޖެހިފައި ވަނީ ބޮއިންގް 777-ER300 މަރުކާގެ މަތިންދާބޯޓުތައް އޮޕަރޭޓްކުރެވޭ ގޮތަށެވެ.
މަޝްރުއޫ ހަވާލުކޮށްފައި ވަނީ އެއް އަހަރު ދުވަހުގެ މުއްދަތެއްގެ ތެރޭގައި ނިިންމުމަށެވެ. މި މަޝްރުއޫއަކީ އަބޫދާބީ ފަންޑުން 27،180،835.29 ރުފިޔާ އަދި ދިވެހި ދައުލަތުގެ ބަޖެޓުން 25،147،708.81 ރުފިޔާ ހޭދަކޮށްގެން ކުރިއަށް ގެންދާ މަޝްރުއޫއެކެވެ.
މިއަދު މިނިސްޓްރީ އޮފް ނެޝަނަލް ޕްލޭނިން އެންޑް ހައުސިން އިންފްރާސްޓްރަކްޗާގައި ބޭއްވި ރަސްމިއްޔާތުގައި މި މަޝްރުއޫގެ އެއްބަސްވުމުގައި އެ މިނިސްޓްރީގެ ފަރާތުން ސޮއިކުރެއްވީ، ޑިރެކްޓާ ޖެނެރަލް ފާތިމަތު ޝާނާ ފާރޫގު އެވެ. އެމްޓީސީސީގެ ފަރާތުން ސޮއި ކުރެއްވީ ސީއޯއޯ އާދަމް އާޒިމް އެވެ.
