ސިނަމާލެ ބްރިޖާއި ހުޅުމާލެއާ ދެމެދު އޮންނަ ހައިވޭގައި ސަރުކާރުން ގާއިމްކުރަމުން އަންނަ ސޯލާ ޕެނަލް ނިޒާމުގެ ސަބަބުން މިހާރު ދައުލަތުން ތެލަށް ކުރާ ހޭދައިން ގާތްގަނޑަކަށް 20 މިލިއަން ރުފިޔާ ސަލާމަތްކުރެވޭނެ ކަމަށް އެންވަޔަރަމެންޓް މިނިސްޓްރީން ބުނެފި އެވެ.
ވޯލްޑް ބޭންކުގެ އެހީގައި ހައިވޭގައި މިހާރު ގާއިމްްކުރަމުން އަންނަ ސޯލާ ޕެނަލް ނިޒާމުގެ އަމަލީ މަސައްކަތްް ފަށާފައިވަނީ އެކަމަށްޓަކާ މިއަދު ބޭއްވި ރަސްމިއްޔާތެއްގަ އެވެ. އެ މަސައްކަތް ފައްޓަވައިދެއްވާ ފުރަތަމަ ޕެނަލް ބޯޑު ހަރުކުރެއްވީ މިނިސްޓްރަ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އައިމިނަތު ޝައުނާ، ވޯލްޑް ބޭންކްގެ ސައުތު އޭޝިއާ ރީޖަންގެ ވައިސް ޕްރެޒިޑެންޓް މާޓިން ރެއިސާގެ އިތުރުން ވޯލްޑް ބޭންކާއި ސްޓެލްކޯ އަދި އެޗްޑީސީގެ އިސްވެރިންނެވެ.
މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ޝައުނާ ވިދާޅުވީ، ރާއްޖެއަކީ ކަންބޮޑުވާ މިންވަރަށް ތެލަށް ބަރޯސާވާ ގައުމެއް ކަމަށެވެ. މިނިސްޓަރު ވިދާޅުވީ ރާއްޖެއިން ތެލަށް ކުރާ ހޭދަ އިތުރު ކަމަށާއި، ޖީޑީޕީގެ 10 އިންސައްތަ ކޮންމެ އަހަރަކު ހޭދަކުރެވެނީ ތެޔޮ އެތެރެކުރުމަށް ކަމަށެވެ. އަދި މިއީ އިގްތިސާދަށް އޮތް ބޮޑު ބުރައެއް ކަމަށް މިނިސްޓަރު ފާހަގަކުރެއްވި އެވެ.
ދިވެހިރާއްޖެ ހިމެނެނީ މޫސުމީ ގޮތުން ނާޒުކު ގައުމުތަކުގެ ތެރޭގައި ކަމަށް ވެސް ޝައުނާ ވިދާޅުވި އެވެ. ޝައުނާ ވިދާޅުވީ އިއާދަކުރުވަނިވި ހަކަތައަށް އިންވެސްޓުކުރެވުމަކީ ގައުމުގެ ކުރިއެރުމަށް ކުރެވޭ އިންވެސްޓެއްގެ ގޮތުގައި ދެކެވަޑައިގަންނަވާ ކަމަށެވެ.
"މިހާރު މިތިބަ ހާލަތުން އަރައިގަތުމަށް އަވަސް ފިޔަވަޅުތަކެއް އެޅުމަކީ މުހިންމު ކަމެއް. މި ސަރުކާރުގައި ވާނީ ތެލަށް ދިވެހިން ބަރޯސާވާ މިންވަރު ކުޑަކުރުމަށް އިއާދަކުރުވަނިވި ހަކަތައިގެ އެތައް މަޝްރުއޫއެއް ކުރިއަށް ގެންގޮސްފައި," މިނިސްޓަރު ޝައުނާ ވިދާޅުވި އެވެ.
މި ރަސްމިއްޔާތުގައި ވާހަކަ ދައްކަވަމުން ވޯލްޑު ބޭންކުގެ މި ރީޖަނުގެ ނައިބު ރައީސް މާޓިން ވެސް ވަނީ ރާއްޖެއަކީ މޫސުމީ ގޮތުން ނާޒުކު ގައުމެއްކަން ފާހަގަކުރައްވާފަ އެވެ. އަދި ސަރުކާރުން އެކަން ދަނެގެން ކުރައްވާ މަސައްކަތްތަކަށް އޭނާ ވަނީ ތައުރީފްކުރައްވާފަ އެވެ.
"މި ކަންކަމަށް ފަރުވާލެއް ނެތި ކުރިއަށް ގޮސްފި ނަމަ 2050 ވަނަ އަހަރާ ހަމައަށް ރާއްޖޭގެ ބައެއް ނެތިގެން ދިއުމަކީވެސް އެކަށީގެންވާ ކަމެއް." މާޓިން ވިދާޅުވިއެވެ.
މާޓިންގެ ވާހަކައިގައި ވެސް ވަނީ އިއާދަކުރުވަނިވި ހަކަތައަކީ މިހާރު ބޭނުންކުރާ ތިމާވެއްޓަށް ގެއްލުންހުރި ހަކަތައާ އަޅާ ބަލާއިރު ދެގުނަ އަގު ހެޔޮ ވަސީލަތެއްކަން ފާހަގަކޮށް މިއީ އިގްތިސާދަށް ވެސް ލިބިގެންދާނެ ލުޔެއް ކަމުގައި ފާޙަގަކުރައްވާފަ އެވެ.
ދިވެހިރާއްޖޭގައި މިހާތަނަށް އެއް ކޮންޓެރެއްޓެއްގެ ދަށުން އެންމެ ގިނަ އަދަދަކަށް ސޯލާ ޕީވީ ނިޒާމެއް ގާއިމްކުރުމުގެ އަމަލީ މަސައްކަތް ފެށުމުގެ ސަބަބުން ދައުލަތުން ތެލަށް ކުރާ ހަރަދު ބޮޑުތަނުން ކުޑަވެގެން ދާނެ ކަމަށް އަންދާޒާކުރެވޭ ކަމަށް އެންވަޔަރަމެންޓް މިނިސްޓްރީން ބުންޏެވެ.
މި މަޝްރޫއިން އަހަރަކަށް އުފައްދާ 7.3 މިލިއަން ކަރަންޓް ޔުނިޓުން ދައުލަތުން ކަރަންޓް އުފެއްދުމަށްޓަކައި ތެލަށް ކުރާ ހޭދައިން ގާތްގަނޑަކަށް 15 އާއި 20 މިލިއަން ދިވެހި ރުފިޔާ ތެލަށް ކުރާ ހޭދައިން ކުޑަކުރެވޭނެ ކަމަށް އަންދާޒާ ކުރެވޭނެ ކަމަށް ވެސް ބުންޏެވެ.
މި މަސައްކަތް ކުރަމުން ދަނީ ތައިލޭންޑްގެ އެންސިސް ކޯ ލިމިޓެޑާ ހަވާލުކޮށްގެންނެވެ.
މި މަޝްރޫއުގެ ދަށުން އުފައްދާ ކަރަންޓް ސްޓެލްކޯއަށް ވިއްކުމަށް ހަމަޖެހިފައިވާ ރޭޓަކީ ކަރަންޓް ޔުނިޓަކަށް 10.09 ޔޫއެސް ސެންޓެވެ. އެއީ ދިވެހި ފައިސާއިން ކަރަންޓް ޔުނިޓަކަށް އެއް ރުފިޔާ 68 ލާރި އެވެ. އެސްޕަޔާ ގެ ފުރަތަމަ ފިޔަވަހީގެ ދަށުން ހުޅުމާލޭގައި 1000 ހައުސިންގް ޔުނިޓްތަކުގައި ގާއިމްކޮށްފައިވާ 1.5 މެގަވޮޓްގެ ސޯލާ ޕީވީގެ ނިޒާމުން އުފައްދާ ކަރަންޓް ސްޓެލްކޯއަށް ވިއްކަމުން ދަނީ 21 ޔޫއެސް ސެންޓަށެވެ. އެހެންކަމުން ފަސް މެގަވޮޓް ސޯލާ ޕީވީން އުފައްދާ ކަރަންޓް ސްޓެލްކޯއަށް ގަންނަން ލިބެނީ މީގެ ކުރީން ސޯލާ ހަކަތައިން އުފައްދާ ކަރަންޓް ޔުނިޓަކަށް ޖެހޭ އަދަދުގެ ދެބައިކުޅަ އެއްބައި އަގުހެޔޮ ރޭޓެއްގަ އެވެ.
