ސަލްމާން މިސްކިތުގެ އޭސީތަކުގެ މަސައްކަތް މިމަހުގެ 25 ގެ ކުރިން ނިންމާލެވޭނެ ކަމަށް އެ މަސައްކަތް ކުރާ ކޮންޓްރެކްޓަރު މައުލޫމާތު ދީފައިވާ ކަމަށް އިސްލާމިކް މިނިސްޓްރީން ބުނެފި އެެވެ.
ސަލްމާން މިސްކިތުގެ އޭސީތައް ހަލާކުވެފައި ހުންނަތާ ގިނަ ދުވަސްވެފައިވާއިރު، މިސްކިތަށް ނަމާދު ކުރަންދާ މީހުން ދަނީ އެކަމުގެ ޝަކުވާ ކުރަމުންނެވެ.
އޭސީތަކުގެ މައްސަލަ އާއި ގުޅިގެން މި ނޫހުން ސުވާލުކުރުމުން އިސްލާމިކް މިނިސްޓްރީން ބުނީ، އޭސީތަކުގެ މަސައްކަތް ބަޔަކާ ހަވާލުކޮށްގެން މިހާރު ކުރިއަށްދާ ކަމަށެވެ. އަދި، އެ މަސައްކަތަށް ބޭނުންވާ ބައެއް ސާމާނު ރާއްޖޭން ބޭރުން މި މަހުގެ 15 ގެ ކުރިން ލިބޭނެ ކަމަށެވެ.
އަދި، ތަކެތި ލިބުމުން މުޅި މަސައްކަތް މިމަހުގެ ފަންސަވީހުގެ ކުރިން އެއްކޮށް ނިންމާލެވޭނެ ކަމަށް ކޮންޓްރެކްޓަރު މައުލޫމާތު ދީފައިވާ ކަމަށްވެސް މިނިސްޓްރީން ބުންޏެވެ.
ރައީސް އަބްދުﷲ ޔާމީންގެ ދައުރުގައި 2018 ވަނަ އަހަރު އަޅަން ފެށި ކިންގް ސަލްމާން މިސްކިތަކީ 25 މިލިއަން ޑޮލަރުގެ މަޝްރޫއެކެވެ. އޭގެ ތެރެއިން 14 މިލިއަން ޑޮލަރަކީ ސައުދީގެ ހިލޭ އެހީ އެވެ. ބާކީ ހަރަދުކުރީ ދިވެހި ސަރުކާރުންނެވެ.
އެ މިސްކިތުގައި އަރާފޭބުމަށް ލިފުޓު ހަރުކޮށްފައިވާއިރު އެއްފަހަރާ 10،000 މީހުންނަށް ނަމާދުކުރެވެ އެވެ. ލައިބްރަރީއަކާއި ކްލާސްރޫމްތަކުގެ އިތުރުން ސެމިނާ ރޫމްތައް ވެސް މި މިސްކިތުގައި ހުރެ އެވެ.
