އުތުރު އިންޑިއާގެ ބޭ އޮފް ބެންގަލް ސަރަހައްދު ހުރަސްކޮށް ރާއްޖޭގެ ޖައްވުތެރޭގައި މިހާރު އެނބުރޭ ހިރަފުހާއި ދުމުގެ އަސަރު ދެކުނުގެ އަތޮޅުތަކަށް ކުރުމުގެ ފުރުސަތު އެބަ އޮތް ކަމަށް މޫސުމާ ބެހޭ ގައުމީ އިދާރާއިން މިއަދު ބުނެފި އެވެ.
މެޓް އޮފީހުގެ އޮފިޝަލަކު މި ނޫހާ ވާހަކަ ދައްކަވަމުން ބުނީ އިންޑިއާއިން ދަތުރު ކުރާ ހޭޒް ނުވަތަ ފުސްކަމުގެ އަސަރު ރާއްޖޭގެ ދެކުނުގެ އަތޮޅުތަކަށް ފޯރުމުގެ ފުރުސަތު އެބަ އޮތް ކަމަށާއި ނަމަވެސް އެ ސަރަހައްދަށް ހިރަފުސްގަނޑު ދާނީ މޫސުން ބަދަލުވާން ފެށުމުން ކަމަށެވެ.
"[ދުމުގެ އަސަރު ދެކުނަށް ކުރަން ފަށާނީ] އިރުވައި މޫސުން ފެށުނީމަ. އަދި ނޭނގެ ބުނާކަށް އިރުވައި މޫސުން ފެށޭނެ ދުވަހެއް. އާންމު ގޮތެއްގައި ފެށެނީ ޑިސެމްބަރު މެދަކާ ހިސާބުން،" އޭނާ ވިދާޅުވި އެވެ.
ވާރޭ ނުވެހި ގިނަ ދުވަހު އޮންނަ ނަމަ ފުސްކަން އިތުރުވާނެ
މެޓް އޮފީހުން ބުނީ، ވާރޭ ނުވެހި ގިނަ ދުވަސްވާ ނަމަ ފުސްކަން އިތުުރުވާނެ ކަމަށެވެ. ރާއްޖެއާ ކައިރި ހިސާބުތަކުގައި ދުމުގެ އަސަރު ބޮޑަށް ހުންނަ ނަމަ ރާއްޖެއަށް ފުސްކަން އިތުރުވުމުގެ ފުރުސަތު ބޮޑު ކަމަށް ވެސް މެޓުން ބުންޏެވެ.
"އަދިއެއް ނޭނގޭނެ [އިރުވައި މޫސުން ފެށޭނެ މުއްދަތެއް] ޕްރެޑިކްޓް ކުރާކަށް. އެއީ ދުމުގެ އަސަރު ވެސް ޕްރެޑިކްޓެއް އަދި ނުކުރެވޭނެ،" އޭނާ ބުންޏެވެ.
މިހާރު އެ އޮފީހުން އަންނަނީ އޭވިއޭޝަން ރިޕޯޓް އެކުލަވާލުމުގެ މަސައްކަތް ކުރަމުންކަން ފާހަގަކޮށް މެޓް އޮފީހުން ބުނީ، އެ ރިޕޯޓު އެކުލަވާލާއިރު އޭގައި ދުރު ފެންނާނެ މިންވަރު ވެސް ބަޔާންކޮށްފައި އޮންނާނެ ކަމަށެވެ.
ފާއިތުވި ތިން ދުވަހުގެ ތެރޭގައި ދުރު ފެންނަ މިންވަރު އެންމެ ބޮޑަށް ދަށްވީ މިދިޔަ ބުރާސްފަތި ދުވަހުކަން ފާހަގަކޮށް މެޓް އޮފީހުން ބުނީ އެ ދުވަހު 5000 މީޓަރަށް ދުރު ފެންނަ މިންވަރު ދަށަށް ދިޔަ ކަމަށެވެ.
މިހާރު ފުސް ސަރަހައްދުތަކަށް ދުރު ފެންނަ މިންވަރު 6000 އާއި 5000 މީޓަރާ ދެމެދުގެ އަދަދަކަށް ދަށްވާކަމަށް މެޓް އޮފީހުން ވިދާޅުވިއެވެ. އާންމުކޮށް ހުންނާނީ 8000 މީޓަރާއި 7000 މީޓަރާ ދެމެދުގައި ކަަމަށް މެޓް އޮފީހުން މައުލޫމާތު ދެއްވިއެވެ.
ދުމާއި ހިރަފުހުގެ ސަބަބުން ޖައްވު ތެރެ ނުސާފްވުން މިއީ ކޮންމެ އަހަރަކުހެން ޑިސެމްބަރު އަދި މާޗް މަހާ ދެމެދުގެ ދުވަސްތަކުގައި ދިމާވާ ކަމެކެވެ.
ޖައްވު ނުސާފުކޮށްލާފައިވާ ހިރަފުހުގެ ސަބަބުން، ނޭވާލާ ނިޒާމުގެ މައްސަލަތައް ހުންނަ ފަރާތްތަކަށް އުނދަގޫވުން އެކަށީގެންވާ ކަމަށާއި މި ދުވަސްވަރު ވާރޭފެން ނެގުމާއި ބޭނުންކުރުމުގައި ސާފުތާހިރު ކަމަށް އިތުރަށް ސަމާލުކަން ދިނުމަށް މެޓް އޮފީހުން އިލްތިމާސްކުރެ އެވެ.
