ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރުގެ މައްޗަށް ހަދިޔާއެއް ބަލައިގަތް ކަމަށް ތުހުމަތުކޮށް ޖުޑީޝަލް ސާވިސް ކޮމިޝަން (ޖޭއެެސްސީ) އިން ބަލަމުންދާ މައްސަލައިގެ އަޑުއެހުންތައް އާންމުކޮށް ހުޅުވާލައިގެން ބޭއްވުމަށް އޭނާ އެދިވަޑައިގެންފި އެވެ.
"ދިވެހި ފަނޑިޔާރުންގެ ޖަމިއްޔާ" ނަމުގައި އޮންނަ ފަނޑިޔާރުން ތިބޭ ވައިބާ ގްރޫޕަކަށް ފަނޑިޔާރު މަހާޒު ރޭ ފޮނުއްވި މެސެޖެއްގައި އޭނާގެ ސުލޫކީ މައްސަލައެއް ބަލަން ޖޭއެސްސީން ނިންމާފައިވާ ކަމުގެ ހަބަރު ލިބިފައިވާ ކަމަށް ލިޔުއްވާފައިވެ އެވެ.
އެ ކަމާ ގުޅޭ ގޮތުން ސުވާލު ކުރުމުން ޖޭއެސްސީގެ މީޑިއާ އޮފިޝަލް އިޒްމީރާ ޒާހިރު "އަދަދު" ނޫހަށް ވިދާޅުވީ އެ ކޮމިޝަނަށް ހުށަހެޅިފައިވާ މައްސަލާގައި ކޮށްފައިވާ ތުހުމަތަކީ ފަނޑިޔާރު ބެއްލެވި މައްސަލައެއްގައި ހިމެނޭ ހަސްމެއްގެ ފަރާތުން ހަދިޔާއެއް ބަލައިގަތުން ކަމަށެވެ. މައްސަލައިގެ އިތުރު ތަފްސީލެއް ނުދެއްވަ އެވެ.
"ކާއެއްޗެހި ގެނައީ އަމިއްކަ ހަރަދު ކޮށްފައި. ފައިސާ ދެއްކި ސްލިޕްވެސް އެބަ އޮތް. ހިލޭ ނުވަތަ ނުއަގުގައި ގެނައި އެއްޗެއްވެސް ނޫން. އަދި ވަކި ހާއްސަ އެއްޗެއް ގެނައީވެސް ނޫން. އަމިއްލައަށް އީޑަރު ދިނީމާ އޯޑަރު ދިންތަނުން ގުޅާނީ އަޅުގަނޑަށް ވާތީވެ އިދާރީ ކުއްޖަކަށް ކާ އެއްޗެހި ގެނެސްދޭނެ ފަރާތުގެ ނަމްބަރު ދިނިން،" އެ ތުހުމަތު ސާފުކޮށްދެއްވުމުން އޭނާ ކުރެއްވި ޓްވީޓެއްގައި ވިދާޅުވި އެވެ.
އަދި، އެއީ ސިއްރިއްޔާތުގައި ކުރި ކަމެއް ނޫން ކަމެއް ކަމަށް ވެސް އޭނާ ވިދާޅުވި އެވެ. އޭގެ އިތުރުން، އެ މައްސަލައިގެ އަޑުއެހުންތައް "އާންމުކޮށް ހުޅުވާލައިގެން އިންސާފުން ގެންގޮސްދިނުމަށް" އޭނާ ވަނީ އެދިވަޑައިގެންފަ އެވެ.
ހަމައެހެންމެ، މިއީ އާންމު އުސޫލެއްގެ ގޮތުން ވެސް މެންދުރުގެ ފަރިއްކޮޅު ވެސް ކުރިއަށްގެންދާ ގޮތް ކަމަށް އޭނާ ވިދާޅުވި އެވެ.
އެގޮތުން، ރައީސް އަބްދުﷲ ޔާމީނަށް ހުކުމް ކުރި ދުވަހު މެންދުރުގެ ފަރިއްކޮޅު ގެންނެވީ މަހާޒްގެ އަމިއްލަ ހަރަދުގައި ކަމަށާއި އެއީ ރިސެސްއަށް ކޯޓު ދިޔުމުގެ ކުރިން ހުރިހާ ފަނޑިޔާރުންނާ ދިމާވާނެ ފަހު މަސައްކަތު ދުވަހަށް ވުމުން ކަމަށް އޭނާ ހާމަކުރެއްވި އެވެ.
މި ނޫހަށް އެނގިފައިވާ ގޮތުގައި މައްސަލަ ހުށަހަޅާފައިވަނީ ކުރީގެ ރައީސް އަބްދުالله ޔާމީން ޖަލު އަދަބުން މިނިވަންވި ހުކުމް އިއްވުމަށްފަހު ސުޕްރީމް ކޯޓުގައި ބޭއްވި މެންދުރުގެ ފަރިއްކޮޅަކާ ގުޅިގެންނެވެ.
އެ މައްސަލާގެ ރިޔާސަތު ބެލެހެއްޓެވީ ފަނޑިޔާރު މަހާޒެވެ.
"ފަނޑިޔާރު ކަމުގެ މަގާމުގައި ހުރުމަށް ނުވަތަ މަގާމު ދިފާއު ކުރުމަށް މީހެއްގެ ގާތުގައި އެދޭނެ އެދުމެއް، ކުރާނެ ކަމެއް ނޯންނާނެ،" ފަނޑިޔާރުންގެ ގްރޫޕަށް ފޮނުއްވި މެސެޖެއްގައި އޭނާ ވިދާޅުވި އެވެ.
