ހިނގާފައިދަނިކޮށް ހަލާކުވެފައި އޮތް ކާނުގަނޑަކަށް ފައި ވަދެ އަނެއްކާ ވެސް މީހެއްގެ ފައި ވަރަށް ބޮޑަށް ޒަހަމްވެއްޖެ އެވެ.
މީގެ ކުރިން ވެސް މިފަދަ ބައެއް ހާދިސާތައް މާލޭގެ މަގުމަތީގައި ހިނގާފައި އެބަހުއްޓެވެ. އެގޮތުން ގަލޮޅު ދަނޑު ކައިރީގައި ހަދާފައިވާ ހީނާމާގެ ޕާކިން ޒޯނު ކުރިމަތިން ހިނގާފައި ދަނިކޮށް ކުޑަކުއްޖަކު ވެއްޓި މިދިޔަ އޮކްޓޯބަރުގެ ތެރޭގައި ހާދިސާއެއް ހިނގާފައިވެ އެވެ.
ސޯޝަލް މީޑިއާގައި ދައުރުވަމުންދާ ޕޯސްޓުގައި ބުނެފައި މިފަހަރު ހަލާކުވެފައިވަނީ އުމުރުން 82 އަހަރުގެ މީހެއްގެ ފައި ކަމަށެވެ. އުމުރުން ދުވަސްވެފައިވާ މީހާގެ ފައި ވަރަށް ބޮޑަށް ކަފައިގެން ގޮސްފައިވާ ތަން ދައުރު ވަމުން އަންނަ ފޮޓޯތަކުން ފެނެ އެވެ.
މިކަމާ ގުޅިގެން މާލެ ސިޓީ ކައުންސިލްގެ މީޑިއާ އޮފިޝަލް މަރިޔަމް ޝިއުނާ ވިދާޅުވީ މާލޭގައި ހަލާކުވެފައި ހުރި ކާނުތައް ބަދަލުކުރުމުގެ މަސައްކަތް މެދުނުކެނޑި ކުރިއަށްދާ ކަމަށެވެ.
އޭނާ ހިއްސާކުރެއްވި ތަފާސް ހިސާބުތަކަށް ބަލާއިރު، މިދިޔަ އަހަރު 80 މަގެއްގެ 160 ކާނުގަނޑެއް ބަދަލުކޮށްފައިވެ އެވެ.
އަދި ހިނގަމުންދާ މިދާ 2022 ވަނަ އަހަރުގެ މިހާތަނަށް 119 މަގެއްގެ 220 ކާނުގަނޑެއް ބަދަލުކޮށްފައިވާ ކަމަށް ތަފާސްހިސާބުތަކުން ހާމަވެ އެވެ. އޭގެ ތެރޭގައި މިދިޔަ މަހު އެކަނި ވެސް 26 ކާނުގަނޑެއް ސިޓީ ކައުންސިލުން ބަދަލުކޮށްފައިވެ އެވެ.
ގިނަ މަގުތަކެއްގައި ހުރި ކާނުތައް ހަލާކުވެ މަގުން ދުއްވާ އުޅަނދުތަކަށާއި ހިނގާބިިނގާވެ އުޅޭ މީހުންނަށް އަންނަނީ ގެއްލުންވަމުންނެވެ. މާލޭގެ މަގުތައް މެއިންޓެއިންކޮށް ބެލެހެއްޓުމުގެ ޒިންމާ އޮތީ މާލެ ސިޓީ ކައުންސިލުގައި ކަމަށްވާއިރު މަގުތައް ހަލާކުވެ އަނިޔާ ލިބޭ ކަމުގެ ޝަކުވާ ދޭތެރެ ދޭތެރެއިން އާންމުން ކުރެ އެވެ.
