ސަރުކާރުން ނުވަތަ އަމިއްލަ ފަރާތަކުން ހިންގާ ބޯހިޔާވަހިކަމުގެ މަޝްރޫއުތަކުގެ ދަށުން ގޯއްޗެއް ނުވަތަ ދިރިއުޅޭނެ ތަނެއް ގަތުން ނުވަތަ ކުއްޔަށް ހިފުމުގެ ހުއްދަ ފަނޑިޔާރުންނަށް ދީ ހުށަހަޅާފައިވާ ބިލު ފާސްނުކޮށް އަނބުރާ ކޮމިޓީއަށް ފޮނުވާލައިފި އެވެ.
ފަނޑިޔާރުންގެ ގާނޫނު އިސްލާހުކުރަން ސަރުކާރުގެ ފަރާތުން ހުށަހެޅުއްވީ ކަނޑިތީމު ދާއިރާގެ މެންބަރު އަބްދުﷲ ޝަހީމް އަބްދުލްހަކީމް އެވެ.
މި ބިލު ދިރާސާކުރުމަށް ފަހު ޖުޑީޝަރީ ކޮމީޓިން މިއަދު ހުށަހެޅި ބިލު ފާސްނުކުރަން 49 މެންބަރުން ދެއްވި އެވެ. ފާސްކުރަން ފެންނަ ކަމަށް ވޯޓު ދެއްވީ ހަތަރު މެންބަރުންނެވެ.
މި ބިލަކީ ފަނޑިޔާރުންނަކީ ފަނޑިޔާރުކަމުގެ މަގާމާއި ޝަރުއީ ދާއިރާގެ މުސްތަގިއްލުކަން ދެމެހެއްޓޭނެފަދަ އަދި ޝަރުއީ ދާއިރާގެ އިތުބާރު ދެމެހެއްޓޭނެ ގޮތަށް މަސްއޫލިއްޔަތު އަދާކުރާ ފަރާތްތަކެއްކަން ކަށަވަރުކުރުމަށްޓަކައި ކަމާގުޅޭ އުސޫލުތައް ކަނޑައެޅުމަށާއި ފަނޑިޔާރުކަމުގެ މަގާމާ އެކަށީގެންނުވާ އަމަލެއްކުރާ ހާލަތުގައި އެ ފަރާތްތަކާމެދު ފިޔަވަޅުއެޅުމާ ގުޅޭ ގޮތުން އުސޫލުތައް އިސްލާހުކުރަން ހުށަހެޅި ބިލެކެވެ.
ބިލުގައި ވަނީ ފަނޑިޔާރުންގެ މަސައްކަތުގެ ފެންވަރު ބެލުމާ ގުޅޭގޮތުން ގާނޫނުގައި ކަނޑައަޅާފައިވާ އުސޫލުތަކާއި ފަނޑިޔާރުން ވިޔަފާރިކުރުމާއި މާލީ މުއާމަލާތްތައް ކުރުމާގުޅޭ އުސޫލުތައް އިތުރަށް އިތުރަށް ތަފްސީލުކޮށްފަ އެވެ.
މިގޮތުން ވިޔަފާރިކުރުން މަނާ ކުރިނަމަވެސް އާންމު އަގުގައި ވިއްކުމާއި ކުއްޔަށް ދިނުމުގެ އިތުރުން ސަރުކާރުން ނުވަތަ އަމިއްލަ ފަރާތަކުން ހިންގާ ބޯހިޔާވަހިކަމުގެ މަޝްރޫއުތަކުގެ ދަށުން ގޯއްޗެއް ނުވަތަ ދިރިއުޅޭނެ ތަނެއް ގަތުން ނުވަތަ ކުއްޔަށް ހިފުން ނުހިމެނޭނެ ކަމަށް ބިލުގައި ބުނެފައިވެ އެވެ.
ބިލަށް ކޮމިޓީން ގެނައި އިސްލާހުތަކުގެ ތެރޭގައި ފަނޑިޔާރެއްގެ މަގާމުގައި ހުރި މީހެއްގެ މައްޗަށް ނުވަތަ ފަނޑިޔާރުކަން ކޮށްފައިވާ މީހެއްގެ މައްޗަށް ޖިނާއީ ކުށެއް ކުރިކަމަށް ނިހާއީ ހުކުމަކުން ސާބިތުވެއްޖެނަމަ ޝަރުއީ ދާއިރާގެ އެއްވެސް މަގާމެއް އަދާ ނުކުރެވޭނެ ގޮތަށް ގެނައި ބަދަލު ހިމެނެ އެވެ.
ބިލު ހުށަހެޅިއިރު އޮތީ ރައްޔިތުންގެ މަޖިލީހުން ވަކިކުރާ ފަނޑިޔާރުންނަށް ވެސް އެއްވެސް ޝަރުއީ މަގާމެއް އަދާ ނުކުރެވޭ ގޮތަށެވެ.
މީގެ އިތުރުން ބިލު ހުށަހެޅިއިރު ކޯޓުތައް ހިންގުމަށް ބެނުންވާ އެންމެހައި ގަވާއިދުތަކާއި އުސޫލުތައް ކަނޑައެޅުމުގައި އިސްކޮށް ހަރަކާތްތެރިވާން ޖެހޭނެ ކަމަށް ބުނެފައި އޮތް ނަމަވެސް ކޮމިޓީ މަރުހަލާގައި އެ މާއްދާ ވަނީ އުނިކޮށްފަ އެވެ.
އަދި، ފަނޑިޔާރަކު ވަކިކުރުމަށް މަޖިލީހަށް ހުށަހަޅައިފައިވަނިކޮށް އިސްތިއުފާދީނިނަމަ މަޖިލީހަށް ހުށަހަޅާ މުއްދަތުގައި އިނާޔަތްތައް ނުލިބޭނެ ކަމަށް ހިމަނާފައިވީނަމަވެސް، މަޖިލީހަށް ޖޭއެސްސީިން ހުށަހެޅި ނިންމުމުގެ އިޖުރާއީ ގޮތުން ފުރިހަމަ ވާން ޖެހޭ ކަންކަން ފުރިހަމަ ނުވާކަމަށް މަޖިލީހުން ނިންމައިފިނަމަ އިސްތިއުފާ ދިންނަމަވެސް އިނާޔަތް ލިބޭނެ ކަމަށް ކޮމިޓީން ވަނީ އިތުރު ކޮށްފަ އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފެކްޝަނުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ރިޔާސަތު ބަލަހައްޓަވާ އެ ކޮމިޓީގެ މި ނިންމެވުމާ ސަރުކާރުން ހިލާފުވީ އެ ސަބަބަކާ ހުރެ ކަމަށް ބެލެވެ އެވެ.
މީގެ ކުރިން ވެސް މަޖިލީހަށް ހުށަހެޅުނު ފަނޑިޔާރުން ވަކިކުރުމުގެ މައްސަލައެއްގައި އިޖުރާތް ފުރިހަމަ ނުވާ ކަމަށް ޖުޑީޝަރީ ކޮމީޓިން ބުނެ ހިޔާލު ތަފާތުވެފައިވެ އެވެ.
