ކުޅުދުއްފުށީ ރީޖަނަލް ހޮސްޕިޓަލުގައި ހުޅުތަކުގެ އޮޕަރޭޝަން ކުރުމަށް ހާއްސަ ކޭމްޕެއް ފަށައިފި އެވެ.
މިއަދުން ފެށިގެން މި މަހުގެ 24 އަށް ކުރިއަށްދާ މި ކޭމްޕުގައި ކެމެރާގެ ޒަރީއާއިން ބަލައިން ކުރެވޭ ހުޅުތަކުގެ އޮޕަރޭޝަންތަކެއް ކުރިއަށް ގެންދާނެ ކަމަށް އެ ހޮސްޕިޓަލުން ބުނެ އެވެ.
އައިޖީއެމްއެޗާ ގުޅިގެން ކުރިއަށް ގެންދާ މި ކޭމްޕުގައި ކުރާ އޮޕަރޭޝަންތަކުގައި އިސްވެ ހުންނަވާނީ އެ ހޮސްޕިޓަލުގައި މަސައްކަތް ކުރައްވާ ތަޖުރިބާކާރު ކަށީގެ ޑޮކްޓަރު ޑރ. ހުސައިން ޝަކީލެވެ.
ޑރ. ޝަކީލްއާ އެކު އެ ހޮސްޕިޓަލުގެ ހޭނައްތާ ޑޮކްޓަރު، ޑރ. އަސްއަދު މުހައްމަދު ޝަހީދާއި ސެނަހިޔާ މިލިޓަރީ ހޮސްޕިޓަލުގައި މަސައްކަތް ކުރައްވާ ކަށީގެ ހާއްސަ ޑޮކްޓަރު، ޑރ. އަލީ މަފާޒް ރަޝީދު ބައިވެރިވާނެ ކަމަށް ވެސް ކޭއާރްއެޗުން ބުނެ އެވެ.
ކޭއާރްއެޗުން އިތުރަށް ބުނީ މި ކޭމްޕުގައި އެ ހޮސްޕިޓަލުގެ ކަށީގެ ޑިޕާރޓްމެންޓްގައި މަސައްކަތް ކުރައްވާ ސްޕެޝަލިސްޓުން ކަމުގައިވާ ޑރ. ގޮޑާ، ޑރ. އަދްލީ އަދި ޑރ. ޕަރާޝްގެ އިތުރުން، ނަރުހުންގެ ޓީމް އަދި ގުޅުންހުރި ފަރާތްތަކުން ދަނީ ކުރިއަށް މަސައްކަތްތަކެއް ކުރައްވަމުން އަންނަ ކަމަށެވެ.
މިފަދަ އެހެނިހެން ކޭމްޕުތައް ބޭއްވުމަކީ ވެސް އެ ހޮސްޕިޓަލުގެ އަމާޒެއް ކަން ފާހަގަކުރައްވާ ހޮސްޕިޓަލުން އިތުރަށް ބުނީ ތިން ދުވަހުގެ ތެރޭގައި ނުވަ އޮޕަރޭޝަން ކުރުމަށް ރޭވިފައިވާ ކަމަށެވެ. އަދި ވަގުތު ތަން ދޭ ނަމަ އިތުރު އޮޕަރޭޝަންތައް ވެސް ކުރެވިގެންދާނެ ކަމަށެވެ.
