މަކަރާއި ހީލަތުން މީހުންގެ އަތުން ފައިސާ އަތުލާ ގިނަ މައްސަލަތަކުގައި ކޯލުތައް ކުރަނީ ޖަލުގައި ތިބޭ ގައިދީންކަމަށް ބުނެވޭނެ ހެއްކެއް މިހާތަނަށް ލިބިފައިނުވާ ކަމަށް ބޭންކް އޮފް މޯލްޑިވްސް އިން މިއަދު ބުނެފި އެވެ.
ބޭންކު ކަސްޓަމަރުންނަށް އޮޅުވާލައިގެން ފައިސާ އަތުލަމުންދާ މައްސަލައިގައި މަޖިލީހުގެ އެސްއޯއީ ކޮމިޓީއަށް ވަނީ ބޭންކުގެ ބޭފުޅުން ހާޒިރުކޮށް ސުވާލުކޮށްފަ އެވެ. މި ކޮމިޓީގައި ސްކޭމްކޯލުތައް ކުރަނީ ޖަލުން ކަމަށް ބުނާތީ އެކަމާ ގުޅޭ ގޮތުން ކޮމިޓީގެ މުގައްރިރު، ހުޅުދޫ ދާއިރާގެ މެންބަރު އިލްޔާސް ލަބީބް ވަނީ ސުވާލުކުރައްވާފަ އެވެ.
"ބައެއް މީހުން ބުނޭ ވަރަށް ގިނަ މި [ސްކޭމް] ކޯލުތައް އައިސްފައި ހުންނަނީ ޖަލުންނޭ، އޭގެ އެއްވެސް އަޕްޑޭޓެއް ތިބޭފުޅުންނަށް [ލިބިފައިވޭތޯ] ޖަލުންނޭ މި ދަންނަވަނީ ޖަލުގައި ތިބޭ ގައިދީންނޭ، އެ ތަނަށް ފޯނު ވެއްދުމަކީ މަނާ ކަމެއް،" އޭނާ ސުވާލުކުރެއްވި އެވެ.
އިލްޔާސްގެ ސުވާލަށް ޖަވާބު ދެއްވަމުން ބީއެމްއެލްގެ ޗީފް ކޮމްޕްލައިންޓްސް އޮފިސަރު މަރިޔަމް ހަމީދު ވިދާޅުވީ ސޯޝަލް މީޑިއާއާއި ހަބަރުތަކުގައި އެ ވާހަކަ ދެކެވުނުނަމަވެސް އެ ކަން ކުރަނީ ސީދާ ޖަލުންނޭ ބުނެވެން ނެތް ކަމަށެވެ.
"އެކަން ކުރަނީ ޑައިރެކްޓްލީ ޖަލުންނޭ ބުނެވޭކަށް ނެތް، އެ ކަމުގެ އެވިޑެންސެއް ނެތް،" މަރިޔަމް ވިދާޅުވި އެވެ.
އޭނާ ވިދާޅުވި ގޮތުގައި ފުލުހުންނާއެކު ބޭއްވި ބައްދަލުވުންތަކުގައި ވެސް އެފަދަ ކަމެއް ފުލުހުން ފާހަގަކޮށްފައިނުވާ ކަމަށެވެ.
"ވަކި ސްޕެސިފިކް ތަނަކުން އަންނަ ކޯލްތަކެކޭ، އެގޮތަށް [ފުލުހުން ވެސް] ފާހަގަކޮށްފައެއް ނެތް،" އޭނާ ވިދާޅުވި އެވެ.
މޯބައިލް ފޯނު މެދުވެރިކޮށް ހިންގޭ އެކި ކުށްތައް އިންތިހާއަށް އިތުރުވެފައިވާއިރު، ގައިދީން އެ ކަން ކުރާ ކަމުގެ ވާހަކަ ވަރަށް ގަދައަށް ދެކެވެ އެވެ.
މި މައްސަލައާ ގުޅިގެން މިދިޔަ ހަފުތާގައި ބޭއްވި ނޫސްވެރިންގެ ބައްދަލުވުމުގައި ކޮމިޝަނާ އޮފް ޕްރިޒަންސް އަހުމަދު މުހައްމަދުފުޅު ވިދާޅުވީ ޖަލަށް ގަވާއިދާއި ހިލާފަށް ވައްދާ ފޯނުތަކުގެ މައްސަލަތައް ހައްލު ކުރުމަށްޓަކައި މާފުށީ ޖަލުގައި މީގެ ކުރިން ވަނީ ޖޭމަރު ހަރުކުރިނަމަވެސް އެކަމުގެ ނަތީޖާ ހާސިލް ނުވާ ކަމަށެވެ.
"އޭގެ ސަބަބުން ޖަލު ވަށައިގެން ދިރިއުޅޭ އާންމު ރައްޔިތުންނަށާއި، ކައިރި ރަށްތަކާއި ރިސޯޓުތަކަށް ނެޓްވޯކް ޖޭމްވާ މައްސަލަ ފާހަގަކުރެވިފައި އެބަހުރި،" އޭނާ ވިދާޅުވިއެވެ.
މި ނޫސްވެރިންގެ ބައްދަލުވުމުގައި ކޮމިޝަނާ އޮފް ޕޮލިސް މުހައްމަދު ހަމީދު ވަނީ މިފަދަ ސްކޭމްކޯލުތަކުގެ މައްސަލަ ހައްލުކުރަން ގާނޫނީ ގޮތުން ގިނަ ގޮންޖެހުންތަކެއް ހުރި ކަމަށް ވިދާޅުވެފަ އެވެ.
