ރައްޔިތުންގެ މަޖިލީހުގެ ރިޔާސަތަށް ކުރީގެ ރައީސް މުހައްމަދު ނަޝީދުގެ ބަދަލުގައި، ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ތާއީދު ކުރައްވާ މެންބަރަކު ވަޑައިގެންފި ނަމަ މަޖިލީހުގެ ހާލަތު މިހާރަށް ވުރެ ގޯސް ވާނެ ކަމަށް އިދިކޮޅު ޕީޕީއެމާއި ޕީއެންސީ ކޯލިޝަނުން މިއަދު ބުނެފި އެވެ.
ރައްޔިތުންގެ މަޖިލީހަށް ސަރުކާރުގެ ފަރާތުން ޓެކްސް ބޮޑުކުރުމަށް ހުށަހެޅި ބިލާއެކު، ރައީސްގެ ފެކްޝަނާއި ނަޝީދުގެ ފެކްޝަންގެ ކޯޅުން އިތުރަށް ބޮޑުވެފައި އޮއްވައި މިއަދު ބޭއްވި ނޫސްވެރިންގެ ބައްދަލުވުމެއްގައި ޕީއެންސީގެ ޕާލިމެންޓްރީ ގްރޫޕްގެ ލީޑަރު އާދަމް ޝަރީފް ވިދާޅުވީ ނަޝީދު މަޖިލިސް ހިންގަވާ ގޮތް ފެށުނީއްސުރެން ވެސް ރަނގަޅު ނޫން ކަމަށާއި ނަމަވެސް ރައީސް ސޯލިހަށް ތާއިދު ކުރައްވާ މެމްބަރަކު ރިޔާސަތަށް ވަޑައިގެންފި ނަމަ މާ ގޯސްވާނެ ކަމަށެވެ.
ނަޝީދު ނޫން ބޭފުޅަކު ވަޑައިގެންފިނަމަ ނަޝީދަށް ވުރެ އަދި އެއް ދަރަޖަ ނުލަފާވާނެ،
ނަޝީދު ވަކިކުރުމާ ގުޅޭ ގޮތުން ނޫސްވެރިން އަމާޒުކުރި ސުވާލުތަކުގެ ޖަވާބުގައި އާދަމް ޝަރީފް ވިދާޅުވީ، ވާދަވެރި ފަރާތްތަކަށް ފުރުސަތު ދީގެން އަދި އާންމު ރައްޔިތުންގެ މަސްލަހަތުގައި ނަޝީދު "ކޮންމެވެސް" ވަރަކަށް މަސައްކަތް ކުރެއްވި ކަމަށާއި މިހާރު އެ ފުރުސަތު ވެސް އެމަނިކުފާނަށް ނެތް ކަމަށެވެ.
ރައީސް ނަޝީދުގެ ފެކްޝަނާއެކު "ނުރަސްމީ" ކޯލިޝަނެއް އުފެއްދައިގެން އިދިކޮޅު ފަރާތްތަކުުން މަސައްކަތް ކުރަމުންދާ ކަމަށް ބައެއް މެންބަރުން ދައްކަވާ ވާހަކަތަކާ ގުޅިގެން ވެސް ނޫސްވެރިން ސުވާލުކުރި އެވެ. އޭގެ ޖަވާބުގައި އާދަމް ޝަރީފް ވިދާޅުވީ އެ ފެކްޝަނާ ގުޅިގެން އެއްވެސް މަސައްކަތެއް ނުކުރައްވާ ކަމަށެވެ.
"ރައީސް ނަޝީދުގެ ފެކްޝަނާއެކު އަޅުގަނޑުމެން ކުރާނެ މަސައްކަތެއް ނޯންނާނެ، އެމްޑީޕީއާއެކު އަޅުގަނޑުމެން ކުރާނެ މާ ބޮޑު މަސައްކަތެއް ދުވަހަކު ވެސް ނޯންނާނެ، އެ ގޮތުގެ މަތީގައި އެކަން އޮންނާނީ،" އާދަމް ޝަރީފް ވިދާޅުވި އެވެ.
ޖީއެސްޓީ ހަ ޕަަސެންޓުން އަށް ޕަސެންޓަށް އަދި ޓީޖީއެސްޓީ 12 ޕަސެންޓުން 16 ޕަސެންޓަށް ބޮޑުކުރަން ސަރުކާރުގެ ފަރާތުން އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހަޅުއްވި ބިލު ރައްޔިތުންގެ މަޖިލީހުގެ މިއަދުގެ ޖަލްސާގައި ފާސްކުރީ އެ ކަމަށް ނެގި ވޯޓުގައި ބައިވެރިވެވަޑައިގެންނެވި 82 މެމްބަރުންގެ ތެރެއިން 55 މެމްބަރުން ވޯޓު ދެއްވައިގެންނެވެ.
އެ ބިލަށް އިއްޔެއާއި ހޯމަ ދުވަހު މަޖިލީހުގެ ރިޔާސަތުން ވޯޓަށް ނޭހުމުން، ނަޝީދު ވަކިކުރުމުގެ އަޑު ގަދަވެގެން ދިޔަ އެވެ. އިދިކޮޅު ފަރާތްތަކުން ސިފަކުރަނީ އެއީ ސަރުކާރުން ރައީސް ނަޝީދަށް ދިން "އިންޒާރެއް" ގޮތުގަ އެވެ.
