ޗާގޯސް ޖަޒީރާތަކުގެ ސިޔާދަތީ ބާރު ހޯދަން މޮރިޝަސް އިން ކުރާ ދައުވާގައި ދިވެހި ސަރުކާރުގެ ސިޔާސަތު ބަދަލުވެފައިވާކަން ނުވަތަ ނޫންކަން ހާމަކުރަން ގޮވާލައި ރައްޔިތުންގެ މަޖިލީހަށް ހުށަހެޅި ގަރާރު ފާސްނުކުރަން މަޖިލީހުން މިއަދު ފާސްކޮށްފި އެވެ.
ދަނގެތި ދާއިރާގެ އެމްއެންޕީ މެމްބަރު މުހައްމަދު ނާޒިމު ހުށަހެޅުއްވި އެ ގަރާރު ފާސްކުރަން ފެނޭތޯ މިއަދު ނެގި ވޯޓުގައި އެ ގަރާރު ފާސް ކުރަން ނުފެންނަ ކަމަށް 42 މެމްބަރަކު ވޯޓު ދެއްވި އިރު އެ ގަރާރު ފާސްކުރަން ފެންނަ ކަމަށް ވޯޓުދެއްވީ 30 މެމްބަރެކެވެ. ވަކި ގޮތަކަށް ވޯޓު ނުދެއްވަނީ އެންމެ މެމްބަރެކެވެ.
އެ ވޯޓުގައި 72 މެމްބަރަކު ބައިވެރިވެވަޑައިގެންނެވި އިރު ފާސްވުމަށް ބޭނުންވަނީ 37 ވޯޓެވެ.
އެ ގަރާރު ފާސްކުރަން ވޯޓް ދެއްވި މެމްބަރުންގެ ތެރޭގައި ރައްޔިތުންގެ މަޖިލީހުގެ ސުޕަމެޖޯރިޓީ އޮންނަ އެމްޑީޕީގެ ބައެއް މެމްބަރުން ވެސް ހިމެނެ އެވެ.
ނާޒިމު ހުށަހެޅުއްވި އެ ގަރާރުގައި ވިދާޅުވީ ޗާގޯސް މައްސަލައިގައި 2010 ވަނަ އަހަރުން ފެށިގެން ރާއްޖޭން ގެންގުޅުނު ސިޔާސަތު ބަދަލުކޮށްފައި ވޭތޯއާއި އެ ފަދަ ބަދަލެއް ގެނައި ނަމަ އެކަމުގެ ސަބަބުތައް ރައްޔިތުންނަށް ސާފުކޮށްދޭން ސަރުކާރަށް ގޮވައިލާ ކަމަށެވެ. ޗާގޯސް މައްސަލައިގައި ރާއްޖޭން ގެންގުޅުނު ސިޔާސަތު ސަރުކާރުން ބަދަލުކޮށްފައި ވާ ނަމަ އެކަން ކޮށްފައި ވަނީ ގާނޫނީ ތަރަހައިގެ ތެރެއިންކަން ޔަގީންކުރުމަކީ ގަރާރު ހުށަހެޅުއްވުމުގެ މަގުސަދެއް ކަމަށް ނާޒިމް ވިދާޅުވި އެވެ.
"... މި މައްސަލާގައި މީގެ ކުރިން މޮރިޝަސްއާ ދެކޮޅަށް، އިނގިރޭސިވިލާތާ އެއްކޮޅަށް ބައިނަލް އަގުވާމީ އިދާރާތަކުގައި ރާއްޖޭން ވޯޓުދިން ސަބަބަކީ މޮރިޝަސްގެ ހުށަހެޅުުން ކާމިޔާބުވެއްޖެ ނަަމަ ރާއްޖޭގެ ސަރަހައްދުން ބައެއް އުނިވުމުގެ ފުރުސަތު އޮތުން ކަމަށް މީގެ ކުރިން ސަރުކާރުން ބުނެފައި ވާތީއާއި ، ޗާގޯސް މައްސަލާގައި ރާއްޖޭގެ ސިޔާސަތު ބަދަލުވިކަން ދިވެހިންނަށާއި ރާއްޖޭގެ ގާނޫނުހަދާ މަޖިލީހަށް ނާންގަ[އެވެ]، ގަރާރުގައި ނާޒިމު ވިދާޅުވި އެވެ.
