އަންނަ އަހަރަށް ލަފާކުރާ ދައުލަތުގެ ބަޖެޓްގައި ޝަރުއީ ނިޒާމަށް ކަނޑައަޅާފައިވާ 500 މިލިޔަން ރުފިޔާ އިތުރުކޮށްދޭން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ރައްޔިތުންގެ މަޖިލީހުގައި މިއަދު އެދިއްޖެ އެވެ.
ބަޖެޓް ކޮމިޓީގެ މިއަދުގެ ބައްދަލުވުމަށް ޑީޖޭއޭއިން މިއަދު ހުށަހެޅި ކަރުދާހުގައި އެދުނީ ޖުޑީޝަރީން މިހާރު ކުރިއަށް ގެންދާ ޕީއެެސްއައިޕީ މަޝްްރޫއުތަކާއި އަލަށް ފަށާ މަޝްރޫއުތަކަށް 171 މިލިޔަން ރުފިޔާއާއި މުވައްޒަފުން އިތުރުކޮށްދޭށެެވެ. މުވައްޒަފުން އިތުރުކުރުމަށާއި އިންޓަނެޓްގެ ސްޕީޑް އަވަސްކުރުން އަދި އިދާރީ އެހެން ބައެއް ކަންތައްތަަކަށް 49 މިލިޔަން ރުފިޔާ އިތުރުކޮށްދޭން ވެސް އެދުނެވެ.
ޑީޖޭއޭގެ ބަޖެޓަށް އެ އަދަދަށް ފައިސާ އިތުރުކޮށްދޭން އެދުނު އިރު އެ އިދާރާއަށް ބަޖެޓްގައި މިހާރު ޖަހާފައި އޮތީ 579 މިލިޔަން ރުފިޔާ އެވެ. މިއަދު އެދުނު އަދަަދަށް ފައިސާ އިތުރުކޮށްފި ނަމަ އެ އިދާރާގެ ބަޖެޓްގެ ޖުމްލަ 799 މިލިޔަން ރުފިޔާ އަށް އަރާނެ އެވެ.
ބަޖެޓް ކޮމިޓީގެ މިއަދުގެ ބައްދަލުވުމުގައި ޗީފް ޖުޑިޝަލް އެެޑް މިނިސްޓްރޭޓާ އައިޝަތު ރިޒްނާ ވިދާޅުވީ އަންނަ އަހަރަށް ލަފާކުރާ ބަޖެޓްގައި ޝަރުއީ ދާއިރާއަށް ކަނޑައަޅާފައިވާ ފައިސާގެ އަދަދާ މެދު ހިތްހަމަޖެހިވަޑައިގަންނަވާ ކަމަށެވެ. ޝަރުއީ ދާއިރާއަށް މިހާރު އޮތް ބަޖެޓަކީ ހިންގުމުގެ ދާއިރާއިން ހާސިލުކުރަން ބޭނުންވާ ކަންތައްތަކަށް ފުދޭ ބަޖެޓެއް ކަަމަށް ވެސް އޭނާ ވިދާޅުވި އެވެ.
އެހެން ނަމަވެސް ޝަރުއީ ދާއިރާއަށް ކަނޑައަޅާފައިވާ މެދު ރާސްތާއާއި ދުރު ރާސްތާގެ ލަނޑުދަނޑިތައް ހާސިލުކުރުމާއި އާ ސިޔާސަތުތައް ތަންފީޒުކުރުމުގެ ދާއިރާއިން ބަޖެޓާ މެދު ކަންބޮޑުވުންތައް އެބަހުރި ކަމަށް ވެސް އޭނާ ވިދާޅުވި އެވެ.
"އަޅުގަނޑުމެން ހާސިލުކުރަން ބޭނުންވާ، އަދި ޖުޑީޝަރީގެ ތަރައްގީއާ، ޖުޑީޝަރީ ހަރުދަނާކުރުމަށް ޓަކައި ކުރަން ހުރި މުހިއްމު ކަންކަމަށް ބޭނުންވާ ކަންކަން މިވަގުތު ބަޖެޓްގައި ހިމެނިފައި ހުރީ އެންމެ އެކަށީގެންވާ ގޮތުގައި ނޫންކަން ފާހަގަކުރަން،" ރިޒްނާ ވިދާޅުވި އެވެ.
އޭނާ ވިދާޅުވި ގޮތުގައި އެންމެ ބޮޑު ކަންބޮޑުވުމެއް އޮތީ އަލަށް ފާސްކުރި މަދަނީ އިޖުރާއަތުގެ ގާނޫނާ ގުޅިގެން ކޯޓްތަކަށް ބޭނުންވާ ވަސީލަތްތައް ފޯރުކޮށްދޭން، ބަޖެޓް މިހާރު އޮތް ގޮތުން ދަތިވާނެތީ އެވެ.
