ޓްވިޓާ ހޭންޑަލް، ހަސަން ކުރުސީގެ ނަމުގައި ޓްވީޓު ކުރަމުން ދަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކަމަށް ދެކެވޭ ވާހަކަތައް އެމަނިކުފާނު ދޮގު ކުރައްވައިފި އެވެ.
ހަސަން ކުރުސީގެ ނަމުގައި ޓްވީޓު ކުރައްވަނީ ނަޝީދު ކަމަށް މީގެ ކުރިން ވެސް ވާހަކަ ދެކެވުނު ނަމަވެސް މިފަހުން އަނެއްކާ ވެސް އެ ތުހުމަތު ކުރެއްވީ އައްޑޫ މީދޫ ދާއިރާގެ މެންބަރު ރޮޒައިނާ އާދަމް އެވެ.
އެ ހޭންޑަލް އިން ކުރި ޓްވީޓަކަށް ރައްދު ދެއްވަމުން ރޮޒައިނާ ވިދާޅުވީ އެއީ ނަޝީދުކަން "ޔަގީންވެއްޖެ" ކަމަށެވެ.
މިކަމާ ގުޅިގެން ނަޝީދު މިއަދު ކުރެއްްވި ޓްވީޓެއްގައި ވިދާޅުވީ ހަސަން ކުރުސީއަކީ އެމަނިކުފާނުގެ ބައެއް ލިޔުންތަކުގައި ގެންގުޅުއްވާ ހަގީގީ-ހިޔާލީ ޝަހުސިއްޔަތެއް ކަމަށެވެ. އެހެންނަމަވެސް އޭނާއަކީ އެމަނިކުފާނުގެ ތޮބިއްޔަތު ބަޔާން ކޮށްދޭ ޝަހުސިއްޔަތެއް ކަމަށް ދަންނަވަން ދަތި ކަމަށް ވެސް ވިދާޅުވެފައިވެ އެވެ.
"އެހެނަސް އޭނާއަކީ ޖިސްމާނީ ގޮތުން އަޅުގަނޑެއް ނޫން، ލިޔުމަކުން އުފެދުނު ޝަހުސިއްޔަތެއް މި ދަރަޖައަށް ދާ ކަމީ އަޅުގަނޑަށް ލިބޭ ވަރަށް ބޮޑު އުފަލެއް،" ނަޝީދު ވިދާޅުވި އެވެ.
ފާއިތުވީ 24 ގަޑިއިރުތެރޭގައި ރޮޒައިނާއާއި ނަޝީދު ފެކްޝަންގެ މެންބަރުން ދަނީ ޓްވީޓާގައި ވަރަށް ހޫނު ބަހުގެ ހަމަލާތައް ރައްދު ކުރަމުންނެވެ. މި ކޯޅުން ބޮޑުވެ، އެމްޑީޕީ ގައުމީ މަޖިލީހުގެ ގުރޫޕަށް ވަނީ މެސެޖު ނުކުރެވޭ ގޮތް ވެސް ހަދާފަ އެވެ.
