ރައްޔިތުންގެ މަޖިލީހުގެ މެންބަރެއްގެ ގޮތުގައި މިހާރުގެ ރައީސް އިބްރާހިމް މުހައްމަދު ސޯލިހު ބަޖެޓާ ގުޅޭ ގޮތުން ފާޅުކުރެއްވި ކަންބޮޑުވުންތައް، އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގައި ވެސް ހުރީ ހަމަ އެގޮތަށް ކަމަށް ވިދާޅުވެ، މެދު ހެންވޭރު ދާއިރާގެ މެންބަރު އަލީ އާޒިމް ވަރަށް ބޮޑަށް ފާޑުވިދާޅުވެއްޖެ އެވެ.
ރައްޔިތުންގެ މަޖިލީހުގައި މިހާރު ކުރިއަށްދާ ބަޖެޓު ބަހުސްގައި ވަރަށް ބޮޑަށް ފާޑުވިދާޅުވަމުން އާޒިމް ވިދާޅުވީ ބަޖެޓުގައި ގިނަ ކަންކަން ހުރީ އެމްޑީޕީގެ ސިޔާސަތުތަކާއި އަސާސްތަކާ ދިމާ އިދިކޮޅަށް ކަމަށެވެ.
"ދައުލަތަކުން ސަރުކާރަކުން ވިޔަފާރި ނުކުރުން މިއީ އެމްޑީޕީގެ އެއް ސިޔާސަތު، އެއް ވިސްނުން، އެއް ފިކުރު، އެހެންނަމަވެސް މި ފަސް އަހަރު އެކަން ހިނގަމުން ދަނީ ހަމަ ސީދާ ދިމާ އިދިކޮޅަށް،" ސަރުކާރު ކުންފުނިތަކުން ކުރަމުން އަންނަ ވިޔަފަރިތަކަށް ފާޑުވިދާޅުވަމުން އާޒިމް ވިދާޅުވި އެވެ.
މިކަމުގެ ނަތީޖާއަކީ އާންމު ވިޔަފާރިތަކަށް ހުރަސް އެޅި، އެ ވިޔަފާރިތައް "ފުނޑެމުން، ނެތެމުން" އަންނަ ކަމަށް އޭނާ ވިދާޅުވި އެވެ. އަދި އަލަށް ވިޔަފާރިތައް ފެށުމުގެ މަގު ވެސް ބަންދު ވެފައިވާ ކަމަށް ވިދާޅުވި އެވެ.
ދެން އާޒިމް ހަނދާން އާ ކުރެއްވީ ރައީސް ސޯލިހު މަޖިލީހުގައި ހުންނެވިއިރު، 2015 ވަނަ އަހަރުގެ ބަޖެޓުގެ ބަހުސްގައި ވިދާޅުވި ވާހަކަފުޅެކެވެ.
"އަމިއްލަ ވިޔަފާރިތަކަށް ފަހި މުސްތަގްބަލެއް އޮތް ކަމަށް ވިދާޅުވި، އެހެންނަމަވެސް އަޅުގަނޑަށް މި ބަޖެޓު ފެންނަނީ ސަރުކާރުން ވިޔަފާރިތަކަށް ވަންނަ ތަން، އެސްޓީއޯގެ އާމްދަނީ އިތުރުވަމުންދާ ކަން، އޭގެ ނަތީޖާއަކަށް ވެގެންދަނީ އެސްއެމްއީއަށް ދަތި އުނދަގޫ ގޮތްތައް ކުރިމަތިވުން،" ރައީސްގެ ވާހަކަފުޅު ބަހުން ބަހަށް ތަކުރާރު ކުރައްވަމުން އާޒިމް ވިދާޅުވި އެވެ.
ރައީސް ސޯލިހުގެ އޭރުގެ ވާހަކަތަކަށް އިޝާރާތް ކުރައްވައި އާޒިމް އިތުރަށް ވިދާޅުވީ މިހާރު ކުރިއަށް ވުރެ ބޮޑަށް ސަރުކާރުން އަންނަނީ އަމިއްލަ ވިޔަފާރިތަކުގެ ތެރެއަށް ވަންނަމުން ކަމަށެވެ.
އާޒިމް ވިދާޅުވި ގޮތުގައި އަންނަ އަހަރުގެ ބަޖެޓުގައި އޮތް އެންމެ ބޮޑު ކަންބޮޑުވުމަކީ މި އަހަރު ކުރާ ހަރަދު އަންނަ އަހަރުގެ ބަޖެޓާ އެއްކޮށްލައި، ކޮންމެ އަހަރަކު މަޖިލީހުގެ ރުހުމާއެކު ބަޖެޓު ފާސްކުރި ނަމަވެސް، ބަޖެޓު ހަރަދު ކުރަނީ "ބޭނުން ގޮތަކަށް" ގާނޫނާ ހިލާފަށް މަޖިލީހުގެ ރުހުމެއް ވެސް ނެތި އެވެ. އަދި ބަޖެޓުގައި އޮތް އެންމެ ބޮޑު ކަންބޮޑުވުމަކީ މި އަހަރު ކުރާ ހަރަދު އަންނަ އަހަރުގެ ބަޖެޓުގެ ތެރެއަށް އެއްކޮށްލުން ކަމަށެވެ.
"މި އަހަރު ހަރަދުކޮށްލާފަ އެއޮތީ އޭގެ ތެރެއަށް ލާފައި، އަޅުގަނޑުމެން ކައިރީ ހޭ ވެސް އަހާ ނުލާ، ނުޖެހޭތަ އަޅުގަނޑުމެން ކައިރީ އަހާކަށް، އެހެންނަމަވެސް ގާނޫނު އަސާސީން އެބަ ބުނޭ ވަރަށް ސާފުކޮށް އެއްވެސް ހަރަދެއް ކުރަން ވާނީ ރައްޔިތުންގެ މަޖިލީހުގައި އަހާ އެތަނުން ފާސްކުރާ ގޮތަކަށޭ،" އާޒިމް ވިދާޅުވި އެވެ.
މިކަން މިގޮތަށް ހިނގަމުން އައި ނަމަވެސް، މިއީ ވެސް ރައީސް ސޯލިހު މަޖިލީހުގައި އިންނެވިއިރު އެކަމާ ކަންބޮޑުވުން ފާޅުކުރެއްވި ކަމެއް ކަން އާޒިމް ފާހަގަކުރެއްވި އެވެ.
"ފާސްކޮށްފައި އޮތް ބަޖެޓެއްގައި އޮތް ކަމަކަށް ނޫން ކަމަކަށް މަޖިލީހުން ފާސްނުކުރަނީހެން ހަރަދެއް ނުކުރެވޭނެއޭ، މިއީ އެ ދުވަހު އަޅުގަނޑުުމެންގެ ހިންނަވަރު ދާއިރާގެ މެންބަރު މިއަދުގެ ރައީސުލްޖުމްހޫރިއްޔާ ދެއްކެވި ވާހަކަފުޅު، ކަންބޮޑުވުން އެބަހުރި މަޖިލީހުން ފާސްނުކޮށް ބަޖެޓުން ހަރަދު ކުރީތީވެ،" އާޒިމް ވިދާޅުވި އެވެ.
އަދި އެއީ މަޖިލީހުން "ބަޖެޓު ފާސްކުރީމާ ފިނޭންސް މިނިސްޓަރު ކަންކުރަންވީ ގޮތްތޯ" ރައީސް ސޯލިހު އެ ދުވަހު ފިނޭންސް މިނިސްޓަރާ ކުރެއްވި ސުވާލު އާޒިމް ވަނީ މިއަދު ތަކުރާރު ކުރައްވާފަ އެވެ.
ކަންކަން މިހެން ހުރިއިރު، ރައީސް ސޯލިހު އެ ދުވަހު އިސްލާހަށް މަސައްކަތް ކުރައްވަން ދެއްކެވި ވާހަކަފުޅުތައް ރައީސް ވެސް ހަނދުމަފުޅު ހުންނާނެ ކަމަށާއި އެ މަގުން ކަންކަން ކުރުން މުހިންމު ކަމަށް އޭނާ ވިދާޅުވި އެވެ.
"ބަހާއި އަމަލާ ދިމައެއް ނުވޭ، ދައްކާ ވާހަކަ ދެކޮޅެއް ނުޖެހޭ، ބުނާ އެއްޗެއް ހަނދާނެއް ނުހުރޭ، އަމިއްލަ ދުލުން ނިކުންނަ ބަހެއްގެ އިތުބާރެއް ނެތް، ދެން އަޅުގަނޑުމެން ކިހިނެއްތޯ ދެ ވަނަ ދައުރެއް ދޭނީ،" ވާހަކަކޮޅު ނިންމާލަމުން އާޒިމް ސުވާލު އުފެއްދެވި އެވެ.
