މޯލްޑިވްސް މަނިޓަރީ އޮތޯރިޓީން މިދިޔަ އަހަރު ގާއިމުކުރަން ފެށި އޮންލައިން ޕޭމަންޓު ސިސްޓަމް އާއްމުކޮށް ބޭނުން ކުރުމަށް ހުޅުވާލުން ހަތަރު ވަނަ ފަހަރަށް ފަސްކޮށްފި އެވެ.
މި ނޫހުން ކުރި ސުވާލަކަށް ޖަވާބުދެއްވަމުން އެމްއެމްއޭގެ ތަރުޖަމާނު، މުހައްމަދު ނާސިހު ވިދާޅުވީ އަދިވެސް އެ ސިސްޓަމް ފުރިހަމަވެ ނުނިމޭ ކަމަށާއި ލަފާ ކުރެވެނީ އެ ހިދުމަތް ބޭނުން ކުރަން ފެށޭނީ އަންނަ އަހަރު ކަމަށެވެ. މިހާރު ކުރިއަށްދަނީ ބޭންކުތަކާއެކު ހަދަންޖެހޭ ޓެސްޓުތަކުގެ މަސައްކަތް ކަމަށް ވެސް އޭނާ ވިދާޅުވި އެވެ.
"މި ޓެސްޓުތައް ނިމި ބޭންކުތަކުން ފުރިހަމަކުރަންޖެހޭ ކަންކަން ނިމުމުން މި ސިސްޓަމުން ތައާރަފު ކުރެވޭ ހިދުމަތްތައް އާއްމުކޮށް ހުޅުވާލެވޭނެ،" ނާސިހު ވިދާޅުވި އެވެ.
އޮންލައިންކޮށް ވިޔަފާރިކުރުމުގައި އާއްމުންނަށް ލުއިފަސޭހަތަކެއް ހޯދައިދިނުމުގެ މަގުސަދުގައި އާ ޕޭމަންޓު ސިސްޓަމެއް ގާއިމުކުރުމުގެ މަސައްކަތް އެމްއެމްއޭއިން ފެށީ މިދިޔަ އަހަރު ކުރީ ކޮޅެވެ. އޭރު އެ އޮތޯރިޓީން ބުނީ އެ ސިސްޓަމް އެ އަހަރުގެ ފަހުކޮޅު އާއްމުކޮށް ބޭނުން ކުރަން ފެށާނެ ކަމަށެވެ.
އެހެންނަމަވެސް, ފަހުން އެ އޮތޯރިޓީން ބުނީ އެ ތާރީހުގައި އެކަން ނުކުރެވޭނެ ކަމަށާއި، އެ ސިސްޓަމް އާއްމުކޮށް ބޭނުންކުރަން ހުޅުވާލެވޭނީ މިއަހަރުގެ ފެބްރުއަރީ މަހު ކަމަށެވެ. ނަމަވެސް، އެ ތާރީހުގައި ވެސް އެކަން ނުކުރެވި އެ އޮތޯރިޓީން ވަނީ މިއަހަރު ފަހުކޮޅު އެ ސިސްޓަމްގެ ހިދުމަތް އާއްމުންނަށް ދޭން ފަށާނެ ކަމަށް ބުނެ ތިން ވަނަ ފަހަރަށް އެ ސިސްޓަމް އާއްމުކޮށް ބޭނުން ކުރުން ފަސްކޮށްފަ އެވެ.
އާ ޕޭމަންޓު ސިސްޓަމެއް ގާއިމު ކުރުމުގެ މަސައްކަތް އެ އޮތޯރިޓީން ފެށީ އޮންލައިން ޕޭމަންޓު ސިސްޓަމެއް ނެތުމުން ރާއްޖޭގައި އެކި ވިޔަފާރި ކުރާ ފަރާތްތަކުގެ ޝަކުވާތައް އިންތިހާއަށް ގޮސްފައި އޮއްވަ އެވެ. އެގޮތުން، އެ އޮތޯރިޓީން އެ މަސައްކަތް ފެށި އިރު، ރަށްރަށުގައި ދިރިއުޅޭ ފަރާތްތަކަށް އެއް ފަރާތުން އަނެއް ފަރާތަށް ފައިސާ ފޮނުވުމުގައި ދިމާވާ ދަތިތަކާއި، ރާއްޖޭގައި އުފެއްދުންތައް ބޭރު ގައުމުތަކަށް ވިއްކުމުގައި ހުރި ދަތިތަކުގެ ޝަކުވާ އޮތީ ފުނި ޖެހިފަ އެވެ.
ޕޭމަންޓު ސިސްޓަމާއި ޕޭމަންޓު ހިދުމަތުގެ ބިލަށް 2020 ވަނަ އަހަރު ރައްޔިތުންގެ މަޖިލީހުގައި ބަހުސް ކުރި އިރު، މަޖިލީހުގެ ތަޅުމުގައި ވެސް އެ މަޖިލީހުގެ މެމްބަރުން އެކަމުގެ ހުރި ކަންބޮޑުވުންތައް ފާޅު ކުރި އެވެ.
"ހާއްސަގޮތެއްގައި އަޅުގަނޑަށް ތަަޖުރިބާ ކުރެވޭ ތޮއްޑޫގައި ހައްދާ ފަޅޯ ރަޝިޔާއަށް ބޭރުކުރުމުގެ އިންތިޒާމްތައް މިހާރު ވެސް އެ ދަނީ ހަމަޖެހެމުން. ދިމާވާ މައްސަލައަކީ މިހެން ހުންނަ ކުދި ކުދި ޕޭމަންޓްތައް ހެދުމުގެ ދިމާވާ މައްސަލަތައް،" ތޮއްޑޫ ދާއިރާގެ އިއްޒަތްތެރި މެމްބަރު މަޖިލީހުގައި ވިދާޅުވެފައިވެ އެވެ.
މިހާރު ވެސް ރާއްޖޭގައި ހައްދާ ބައެއް އުފެއްދުންތައް ބޭރުގެ ބައެއް ގައުމުތަކަށް ބޭރު ކުރެ އެވެ. އެހެން ނަމަވެސް، ޕޭމަންޓު ސިސްޓަމެއް ނެތުމުގެ ސަބަބުން އެކަމުގައި ވިޔަފާރިވެރިންނަށް ބޮޑެތި ދަތިތަކާ ކުރިމަތިލާން ޖެހެ އެވެ.
އާ ޕޭމަންޓު ސިސްޓަމާއި އެކު ވިޔަފާރީގެ މުއާމަލާތްތައް ހިންގުމުގައި އެއްމެ ޒަމާނީ ވަސީލަތްތައް ބޭނުންކޮށްގެން އެ ބޭނުންކުރާ ފަރާތްތަކަށް ރައްކާތެރި މާހައުލެއް ގާއިމުކުރެވޭނެ ކަމަށް އެމްއެމްއޭއިން ބުނެ އެވެ. މި ޕުރޮޖެކްޓުގެ ފުރަތަމަ މަރުހަލާގައި އިސްކަން ދެނީ ޑޮމެސްޓިކް ޓުރާންސެކްޝަން ތަކަށެވެ.
ނަމަވެސް، ދެވަނަ ފިޔަވަހީގައި އެހެން ގައުމުތަކުގެ ނެޝަނަލް ޕޭމަންޓު ސިސްޓަމްތަކާއި ގުޅި، ބޭރު ގައުމުތަކާ އެކު ވަގުތުން ވަގުތައް ފައިސާގެ މުއާމަލާތްތައް ހިންގުމުގެ މަގު ފަހިވެގެންދާނެ ކަމަށް އެ އޮތޯރިޓީން ބުނެ އެވެ. އެގޮތުން ޕޭޕަލް ފަދަ ޕޭމަންޓު ސިސްޓަމްތައް މެދުވެރިކޮށް ވިޔަފާރި މުއާމަލާތްތައް ހިންގުމުގެ މަގު ރާއްޖޭގައި ފަހިވެގެންދާނެ އެވެ.
