އެމްޑީޕީގެ ކުރީގެ ޗެއާޕާސަން އަދި 18 ވަނަ ރައްޔިތުންގެ މަޖިލީހުގެ ނައިބު ރައީސް މޫސާ މަނިކު (ރީކޯ މޫސަ) އެމްޑީޕީއާ އަލުން ގުޅިވަޑައިގަތުމަކީ "ޕާޓީ އަށާއި އަޅުގަނޑުމެން އެންމެނަށް ލިބުނު އިތުރު ހިތްވަރެއް" ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މޫސާ މަނިކުގެ މެމްބަޝިޕް ފޯމް އެމްޑީޕީގެ ޗެއާޕާސަންގެ ގޮތުގައި ހުންނެވި އިކޮނޮމިކް މިނިސްޓަރު ފައްޔާޒު އިސްމާއީލްއާ ހަވާލު ކުރުއްވި ފޮޓޯ ޝެއާ ކުރެއްވުމަށް ފަހު ކުރެއްވި ޓްވީޓްގައި ރައީސް ސޯލިހު ވިދާޅުވީ މޫސަ އަކީ އަބަދުވެސް އިސްލާހަށް މަސައްކަތްކުރައްވާ ބޭފުޅެއް ކަމަށެވެ.
މޫސާ މަނިކު އެމްޑީޕީއާ އަލުން ގުޅިވަޑައިގަނެ، މެމްބަޝިޕް ފޯމް ހަވާލުކުރީ ރައީސްގެ ރަސްމީގެކޮޅު މުލިއާގޭގަ އެވެ. އެ ރަސްމިއްޔާތުގައި ރައީސް ސޯލިހުގެ އިތުރުން ފޮރިން މިނިސްޓަރު އަބްދުﷲ ޝާހިދު އާއި ޑިފެންސް މިނިސްޓަރު މާރިޔާ އަހުމަދު ދީދީގެ އިތުރުން އެމްޑީޕީގެ ޕާލިމެންޓްރީ ގްރޫޕުގެ ބައެއް މެމްބަރުން ބައިވެރިވެ ވަޑައިގަތެވެ.
ދެހާސް ފަނަރަ ވަނަ އަހަރު މޫސާ މަނިކު އެމްޑީޕީން ވަކިކުރީ ވިޕްލައިނާ ހިލާފަށް ރައްޔިތުންގެ މަޖިލީހުގައި ތަކުރާރުކޮށް ވޯޓު ދެއްވުމުންނެވެ.
އޭނާގެ މައްސަލަ ފުރަތަމަ ބަލަން ފެށީ، އެމްޑީޕީގެ 2014 ވަނަ އަހަރު އޭރުގެ އުއްތަމަ ފަނޑިޔާރު އަހުމަދު ފާއިޒް ހުސައިނާއި ސުޕްރީމް ކޯޓުގެ ފަނޑިޔާރު އަހުމަދު މުއުތަސިމް އަދުނާން ފަނޑިޔާރުކަމުގެ މަގާމުން ވަކިކުރަން ރައްޔިތުންގެ މަޖިލީހުން ވޯޓު ލީ ދުވަހު މަޖިލީހަށް ވަޑައިނުގަތުމުންނެވެ.
ކުރީގެ ރައީސް މައުމޫން އަބްދުލްގައްޔޫމުގެ ވެރިކަމުގައި ސިޔާސީ ހަރަކާތްތައް ހިންގުމާއި ހިޔާލުފާޅުކުރުން ތަޅުއަރުވާފައި އޮތް ދުވަސްވަރު އިސްލާހީ ހަރަކާތްތައް ހިންގުމުގައި އިސްކޮޅު އުޅުއްވި މޫސާ މަނިކަކީ އެމްޑީޕީ އުފެއްދުމުގައި ވެސް އިސް ދައުރެއް އަދާކުރެއްވި ބޭފުޅެކެވެ.
ރައްޔިތުންގެ މަޖިލީހުގެ ތިން ދައުރެއްގައި މެމްބަރުކަން ކުރެއްވި މޫސާ މަނިކު އެމްޑީޕީން ވަކި ކުރުމާއެކު ޕާޓީއަކާ ނުގުޅި ގިނަ ދުވަސްތަކެއް ވުމަށް ފަހު، ރައީސް އަބްދުﷲ ޔާމީންގެ ވެރިކަމުގައި ޕީޕީއެމްއާ ގުޅިވަޑައިގަތެވެ. ނަމަވެސް 2018 ގެ ރިޔާސީ އިންތިހާބަށް ފަހު ޕީޕީއެމްގެ ހަރަކާތެއްގައި އޭނާ ބައިވެރިވެވަޑައި ނުގަންނަވަ އެވެ.
އިންތިހާބަށް ފަހު ފެނިގެން ދިޔައީ ރައީސް ރައީސް ސޯލިހާ ގާތްގުޅުމެއް އޮތް ބޭފުޅެއްގެ ގޮތުގަ އެވެ. އަދި އެމްޑީޕީގައި އޮތް، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފެކްޝަނަށް ފާޑުވިދާޅުވެ މޫސާ މަނިކު އަބަދުވެސް ވާހަކ ދައްކަވަ އެވެ.
