މާލޭގެ ބޮޑުތަކުރުފާނު މަގުގައި އިންދާފައިވާ ކަދުރު ރުއްތަކުގެ ބުޑުގައި، ގަސްމުށިތަކެއް ހެން ރާނާފައިވާ ބައިގައި ޑިޖިޓަލް ބޯޑު ހަރުކުރާނެ ބަޔަކު ހޯދަން ސިޓީ ކައުންސިލުން މިއަދު އިއުލާނުކޮށްފި އެވެ.
މާލޭ ސިޓީ ކައުންސިލުން މިއަދު ކުރި އިއުލާނެއްގައިވާ ގޮތުން، ބޯޑުތައް ހަރުކުރުމުގެ މަސައްކަތް ބަޔަކާ ހަވާލުުކުރާނީ ހަރުކުރާ ބޯޑުތައް މެނޭޖުކުރުމުގެ މަސައްކަތާ ވެސް އެކުގަ އެވެ.
އެ މަސައްކަތަށް ކުރިމަތިލާން އެދޭ ފަރާތްތަކަށް މައުލޫމާތު ދިނުން އޮންނާނީ ސިޓީ ކައުންސިލުގެ ޕްރޮކިއުމަންޓް ސެކްޝަނުގައި، އަންނަ ބުރާސްފަތި ދުވަހު އެވެ. އެއަށް ފަހު، އެ މަސައްކަތަށް އަގު ހުށަހެޅުން އޮންނާނީ މިމަހުގެ 15 ވަނަ ދުވަހު ކަމަށް ވެސް ކައުންސިލުގެ އިއުލާނުގައި ބުންޏެވެ.
މީގެ އިތުރުން، މާލޭގެ އެހެން ސަރަހައްދުތަކުގައި ޑިޖިޓަލް ބޯޑު ހަރުކޮށް މެނޭޖްކުރާނެ ބަޔަކު ހޯދަން ވެސް ސިޓީކައުންސިލުން މިއަދު އިއުލާނުކުރި އެވެ.
މި ދެ މަސައްކަތަކީ ވެސް ސިޓީކައުންސިލްގެ 68 ވަނަ ބައްދަލުވުމުން ފާސްކުރި ދެ މަސައްކަތެވެ. މިދިޔަ މަހު ބޭއްވި އެ ބައްދަލުވުމުގައި މާލޭގެ މޭޔަރު ޑރ. މުހައްމަދު މުއިއްޒު ވިދާޅުވި ގޮތުގައި ކަދުރުއްތަކުގެ ބުޑުގައި ރާނާފައިވާ ބައިގައި ޑިޖިޓަލް ބޯޑު ހަރުކުރުމުން، މަގަށް ލިބޭ ޒީނަތްތެރި ކަމުގެ އިތުރުން އެ ބޯޑުތައް ވާނީ ވަރަށް ބޭނުންތެރި ބޯޑުތަކަކަށެވެ.
"މިސާލަކަށް މާލޭ ސިޓީ ކައުންސިލުން ދައްކަން ބޭނުންވާ އިޝްތިހާރު ނޫނިއްޔާ މެސެޖެއް ވެސް [ދެއްކޭނެ]. މިސާލަކަށް އީދު އަންނަނީ، ހަމަ އެއްކޮޅުން އަނެއް ކޮޅަށް އަރާފައި ހުންނާނެ އީދުމުބާރިކު،" މުއިއްޒު އެ ދުވަހު ވިދާޅުވި އެވެ.
އޭގެ އިތުރުން އެއީ ވިޔަފާރި އުސޫލުން އިޝްތިހާރުކުރުމަށް ވެސް ބޭނުންކުރެވޭނެ ބޯޑުތަކެއް ކަމަށާއި ބޯޑުހަރުކުރާ ފަރާތުގެ އިތުރުން ކައުންސިލަށް ވެސް އެކަމުން އާމްދަނީ ލިބޭނެ ކަމަށް ވެސް މުއިއްޒު އޭރު ވިދާޅުވި އެވެ.
