ޕީޕީއެމްގެ ބައެއް ދާއިރާތަކުގެ އިންތިހާބު މިއަދު ފެށިގެން ކުރިއަށް އެބަދެ އެވެ.
ޕީޕީއެމްގެ ތަރުޖަމާނު ހީނާ ވަލީދު ވިދާޅުވީ މިއަދު ކުރިއަށް ދަނީ ބައެއް ދާއިރަތަކުގެ އިންތިހާބު ކަމަށާއި، މެންބަރުން އިންތިހާބު ކުރަނީ ޖުމްލަ ހަތަރު މަގާމަކަށް ކަމަށެވެ.
އެ މަގާމުތަކަކީ ދާއިރާތަކުގެ ރައީސް، ދާއިރާތަކުގެ ނައިބު ރައީސް، ދާއިރާތަކުގެ ޒުވާނުންގެ ގޮފީގެ ރައީސްގެ މަގާމު އަދި އަންހެނުންގެ ގޮފީގެ ރައީސްގެ މަގާމެވެ.
މިއަދު ބާއްވަނީ ކިތައް ދާއިރާގެ އިންތިހާބުކަން ސާފުވެފައި ނުވާއިރު، މަގާމުތަކަށް ކުރިމަތިލީ ކިތައް ކެންޑިޑޭޓުންކަން ވެސް ސާފެއް ނުވެ އެވެ. އަދި ބަހައްޓަފައި ވަނީ ކިތައް ވޯޓު ފޮށި ކަމެއް ވެސް ސާފެއް ނޫނެވެ.
އޭގެ ތަފްސީލެއް އެ ޕާޓީން މިހާތަނަށް އާންމެއް ނުކުރެ އެވެ.
މިއަދުގެ އިންތިހާބުގެ ވޯޓު ފޮށިތައް މާލެ ސަރަހައްދުގެ ތިން ތަނެއްގައި ވަނީ ބަހައްޓަފަ އެވެ. އެގޮތުން، ހުޅުމާލެ އަދި ވިލިމާލެ ދާއިރާ ފިޔަވައި މާލޭގެ ދާއިރާތަކާއި، ރަށްރަށުގެ މީހުން މާލޭގައި ވޯޓުލުން ކުރިއަށްދަނީ ހެންވެއިރު ދަނޑުގަ އެވެ. ވިލިމާލޭ ވޯޓު ފޮށި ވިލިމާލޭ ޔޫތު ސެންޓަރުގައި ބަހައްޓާފައިވާއިރު، ހުޅުމާލޭ ވޯޓު ފޮށި ހުރީ ހުޅުމާލެ ސިންތެޓިކް ޓްރެކް ވީއައިޕީ ހޯލްގަ އެވެ.
އިންތިހާބުގައި ވޯޓު ނަގަން ޖެހޭ ދާއިރާރަކާއި ރަށްރަށުގެ ވޯޓު ނެގުން މިއަދު ހެނދުނު 10:00 ގައި ފެށިގެން ކުރިއަށްދާއިރު، މިއަދު ހަވީރު 4:00 އާހަމައަށް ވޯޓުލުން ކުރިއަށް ދާނެ އެވެ.
